যোৰহাট জিলাৰ টীয়কৰ এজাৰগুৰিত জাঁজী নদীৰ ওপৰত আজি টীয়ক সমষ্টিৰ বিধায়িকাৰ নেতৃত্বত তথা টীয়ক বিধান পৰিষদৰ সভাপতি বিকাশ শইকীয়াৰ প্ৰত্যক্ষ সহযোগিতাত ৰাইজৰ দীৰ্ঘদিনীয়া বহু প্ৰত্যাশিত এখন পকী দলঙৰ আধাৰশিলা স্থাপন কৰা হয়।
অসম চৰকাৰৰ লোক নিৰ্মাণ বিভাগৰ মহাবীৰ লাচিত চিলাৰায় সেতু নিৰ্মাণ আঁচনিৰ অধীনত আৰম্ভ হ’বলগীয়া এইখন দলঙৰ ফলত প্ৰায় কুৰিখনৰো অধিক গাঁৱৰ আৰ্থ-সামাজিক উন্নয়নত বিশেষ প্ৰভাৱ পেলাব বুলি আশা কৰিছে অঞ্চলবাসীয়ে।
যোৰহাট আৰু টীয়কৰ লোক নিৰ্মাণ বিভাগৰ কেইবাগৰাকীও বিষয়া কৰ্মচাৰীৰ উপস্থিতত এক উৎসৱ মুখৰ পৰিৱেশত আজি আধাৰশিলা স্থাপন কৰে স্থানীয় বিধায়িকা ৰেণুপমা ৰাজখোৱাইl
উল্লেখ্যযোগ্য যে বিগত সময়ত উক্ত স্থানত এখন পকী দলঙৰ দাবী উত্থাপন কৰি অহা বিভিন্ন সংবাদ মাধ্যম, জাতীয় সংগঠনৰ লগতে অসম চৰকাৰক ধন্যবাদ জ্ঞাপন কৰিছে নৈপৰীয়া ৰাইজে।
উল্লেখযোগ্য যে এই দলঙৰ আধাৰশিলাৰ পূৰ্বে টীয়ক গুৱালগাঁও এজাৰগুৰি সংযোগী পথৰ ওপৰত থকা জৰাজীৰ্ণ লোহাৰ দলঙৰ পৰিবৰ্তে এখন স্থায়ীভাৱে পকী দলঙৰ কামৰো আধাৰশিলা স্থাপন কৰে বিধায়িকা ৰেণুপমা ৰাজখোৱাই।
দুয়োখন দলঙৰ একে দিনাই আধাৰশিলা কৰি অগপই সমষ্টিটোত একপ্ৰকাৰৰ নিৰ্বাচনৰ ৰণ দুন্দুভি বজাইছে বুলি একাংশই মন্তব্য কৰিছে যদিও প্ৰকৃততে এই আধাৰশিলাই ৰাইজৰ বহুদিনীয়া দুখ-কষ্ট তথা যাতায়াতৰ ক্ষেত্ৰত এক ইতিবাচক পদক্ষেপ গ্ৰহণ কৰিছে বুলি অনুভৱ কৰি সোনকালে দলঙখন সম্পূৰ্ণ কৰিবলৈ ৰাইজে চৰকাৰক আহ্বান জনাইছে সকলোৱে।