অৰুণাচল প্ৰদেশত ১১ জুলাইত সংঘটিত হোৱা ভয়ংকৰ ভূমিস্খলনত এখন আৱাসিক বিদ্যালয়ৰ বেৰ খহি পৰাৰ ফলত দুগৰাকী ছাত্ৰীৰ মৃত্যু হোৱাৰ উপৰিও আন তিনিগৰাকী শিক্ষাৰ্থী আহত হোৱা ঘটনাই সমগ্ৰ অঞ্চলটো শোকস্তব্ধ কৰি তুলিছে।
উল্লেখযোগ্য যে, নেৰানেপেৰা বৰষুণে অৰুণাচল প্ৰদেশৰ স্বাভাৱিক জীৱন যাত্ৰা ব্যাহত কৰি তুলিছে। শোকাৱহ ঘটনাটোত প্ৰাণ হেৰুৱা ছাত্ৰী দুগৰাকী পঞ্চম শ্ৰেণীত অধ্যয়নৰত ৰিনছিন লামু (১০) আৰু ষষ্ঠ শ্ৰেণীৰ ঝেনদেন ৱাংমু (১০) বুলি চিনাক্ত কৰা হয়।
আবেলি ৩.১৫ বজাত সংঘটিত হোৱা ভূমিস্খলনৰ সময়ত আৱাসিক বিদ্যালয়খনত প্ৰায় ১৯ গৰাকী ছাত্ৰী উপস্থিত আছিল।
অৰুণাচল প্ৰদেশত বিগত ৭২ ঘণ্টাত হোৱা প্ৰৱল বৃষ্টিপাতৰ ফলত সংঘটিত ভূমিস্খলনে ঠায়ে ঠায়ে ঘৰ-দুৱাৰ, দলং, ৰাস্তা আদি ধ্বংস কৰি বিস্তৰ ক্ষতিসাধন কৰিছে।
ভয়াবহ ভূমিস্খলনৰ বাবে ৰাজ্যখনৰ পশ্চিম কামেং জিলাৰ ভালুকপুং-চৰদুৱাৰ-টাৱাং সংযোগী পথটো ১১ জুলাই পৰ্যন্ত পঞ্চমদিনৰ বাবে বন্ধ হৈ আছে।