নিৰাপত্তাৰক্ষীৰে সৈতে হোৱা সংঘৰ্ষত জম্মু-কাশ্মীৰৰ কুলগাম জিলাত সোমবাৰে দুজন সন্ত্ৰাসবাদী নিহত হয় বুলি সোমবাৰে জম্মু আৰু কাশ্মীৰ আৰক্ষীয়ে উল্লেখ কৰে।
৩৪ ৰাষ্ট্ৰীয় ৰাইফল, চি আৰ পি এফ আৰু কুলগাম আৰক্ষীৰ বিশেষ অভিযানত সন্ত্ৰাসবাদী দুজন নিহত হয় বুলি আৰক্ষীয়ে প্ৰকাশ কৰে।
জানিব পৰা মতে, বিশেষ সূত্ৰৰ সহায়ত নিৰাপত্তাৰক্ষী বাহিনীয়ে অঞ্চলটোত দুই-তিনিজন সন্ত্ৰাসবাদীয়ে আত্মগোপন কৰি থকা বুলি খবৰ লাভ কৰিছিল।
উক্ত খবৰৰ ভিত্তিত অভিযান চলাই নিৰাপত্তাৰক্ষী বাহিনীয়ে সন্ত্ৰাসবাদী দুজনক নিহত কৰিবলৈ সক্ষম হয়।
আনহাতে, সংঘৰ্ষৰ পূৰ্বে নিৰাপত্তাৰক্ষী বাহিনীয়ে সন্ত্ৰাসবাদী দুজনক আত্মসমৰ্পনৰ বাবে আহ্বান জনাইছিল যদিও তেওঁলোকে নিৰাপত্তাৰক্ষীক উদ্দেশ্যি গুলীবৰ্ষণ কৰাত অভিযানকাৰী দলটোৱে প্ৰত্যুত্তৰ দিবলগীয়া হয়।
কিছুদিন পূৰ্বে কাশ্মীৰত ভাৰতীয় সেনা বাহিনীৰ সৈতে হোৱা সংঘৰ্ষত হিজবুল মুজাহিদিনৰ দুই শীৰ্ষস্থানীয় সন্ত্ৰাসবাদী ৰিয়াজ নাইকো আৰু জুনাইদ চেহ্ৰাই নিহত হৈছিল।
ক’ৰ’নাৰ সংক্ৰমণৰ সময়তো ভাৰতীয় সেনা বাহিনীয়ে সন্ত্ৰাসবাদ বিৰোধী অভিযান পূৰ্ণ গতিত অব্যাহত ৰাখিছে।
