কেন্দ্ৰীয় তদন্তকাৰী সংস্থা চিবিআইৰ পাখি কাটিলে মহাৰাষ্ট্ৰ চৰকাৰে।
এতিয়াৰে পৰা মহাৰাষ্ট্ৰত যিকোনেো গোচৰৰে তদন্ত কৰিবলৈ কেন্দ্ৰীয় তদন্তকাৰী সংস্থাটোৱে ৰাজ্য চৰকাৰ খনৰ আগতীয়া অনুমতি ল’ব লাগিব।
মহাৰাষ্ট্ৰৰ মুখ্যমন্ত্ৰী উদ্ধৱ থাকৰেই তেওঁৰ ৰাজ্যত যাতে চিবিআই-এ নিজৰ ইচ্ছানুসৰি প্ৰৱেশ কৰি যিকোনো গোচৰৰে তদন্ত আৰম্ভ কৰিব নোৱাৰে তাৰ বাবেই কেন্দ্ৰৰ সৈতে থকা জেনেৰেল কনচেণ্ট প্ৰত্যাহাৰ কৰিছে।
ফলত এতিয়াৰে পৰা চিবিআই-এ মহাৰাষ্ট্ৰত গোচৰৰ তদন্ত কৰাৰ পূৰ্বে ৰাজ্য চৰকাৰৰ পৰা অনুমতি ল’ব লাগিব।
উল্লেখ্য চিবিআইৰ প্ৰৱেশৰ ক্ষেত্ৰত প্ৰতিবন্ধকতা সৃষ্টি কৰি ইতিমধ্যে পশ্চিমবংগ,অন্ধ্ৰপ্ৰদেশ আৰু ছত্তিশগড়েও জেনেৰেল কনচেণ্ট প্ৰত্যাহাৰ কৰিছে।
শেহতীয়াকৈ অভিনেতা সুশান্ত সিং ৰাজপুতৰ আত্মহত্যাৰ ঘটনাৰ তদন্তৰ ভাৰ চিবিআইক অৰ্পণ কৰাৰ ক্ষেত্ৰত মহাৰাষ্ট্ৰ চৰকাৰে তীব্ৰ আপত্তি দৰ্শাইছিল।
কিন্তু সেই আপত্তিক একাষৰীয়া কৰি থৈ কেন্দ্ৰই এই ঘটনাৰ তদন্ত চিবিআইক কৰিবলৈ দিছিল।
একেদৰে টিআৰপি কেলেংকাৰিত অৰ্ণৱ গোস্বামীৰ ৰিপাব্লিক টিভি সাঙোৰ খাই পৰাৰ পিছত এই ঘটনাৰ তদন্ত মুম্বাই আৰক্ষীয়ে চলাই গৈছিল যদিও কেন্দ্ৰই টিআৰপি কেলেংকাৰিৰ তদন্ত চিবিআইক কৰিবলৈ দিয়ে।
এনেবোৰ কথাৰ বাবেই কেন্দ্ৰ সৈতে মহাৰাষ্ট্ৰ চৰকাৰৰ সংঘাতৰ সৃষ্টি হোৱা পৰিলক্ষিত হৈছে।
