সংযুক্ত মুক্তি বাহিনী অসম (স্বাধীন)ৰ শীৰ্ষ নেতা ৰূপান্তৰ কাকতি ওৰফে ৰূপান্তৰ অসমৰ কালি অৰ্থাৎ মঙলবাৰে হৃদৰোগত আক্ৰান্ত মৃত্যু হয়। জানিব পৰা মতে বহুকেইটা অপাৰেশ্যনৰ নেতৃত্ব বহন কৰা আলফাৰ নেতাগৰাকীয়ে ম্যানমাৰত থকা সংগঠনটোৰ কেম্পত হৃদৰোগত আক্ৰান্ত হৈ শেষ নিশ্বাস ত্যাগ কৰে বুলি পৰিয়ালৰ লোকক আলফাৰ পৰা জনোৱা হৈছে।
শিৱসাগৰ চহৰৰ কাথপাৰ গাঁৱৰ নিবাসী হেমচন্দ্ৰ বৰুৱা আৰু শাওনি বৰুৱাৰ কনিষ্ঠ পুত্ৰ দিগন্ত বৰুৱা ওৰফে ৰূপান্তৰ কাকতিৰ জন্ম হৈছিল ১৯৭০ চনত। মৃত্যুৰ সময়ত তেওঁ পত্নী তথা আলফাৰ নেত্ৰী মাজনী দাস আৰু এগৰাকী পাঁচ বছৰীয়া কন্যাক এৰি থৈ যায়।
১৯৮৭ চনত বানমুখ উচ্চতৰ মাধ্যমিক বিদ্যালয়ৰ পৰা দিগন্ত বৰুৱাই মেট্ৰিক পৰীক্ষাত উত্তীৰ্ণ হৈছিল। ইয়াৰ পিছতেই ৰূপান্তৰ কাকতিয়ে বৰহাটৰ পশু চিকিৎসালয়ত অলপদিন অস্থায়ী ভাৱে কাম কৰি ১৯৮৯ চনত আলফাত যোগদান কৰে।
১৯৯০ চনত ঘৰ এৰি আলফালৈ গুচি যোৱাৰ পিছৰ পৰা দিগন্ত ওৰফে ৰূপান্তৰ কাকতিৰ ২৯ বছৰ ধৰি পৰিয়ালৰ লগত কোনো সম্পৰ্ক নাছিল বুলি জ্যেষ্ঠ ভাতৃ গুণজানন বৰুৱাই জানিবলৈ দিয়ে।
