কিছুদিন পূৰ্বে আৰক্ষীৰ ওচৰত আত্মসমৰ্পন কৰা আলফা (স্বা)ৰ ডেপুটি কামাণ্ডাৰ-ইন-চীফ দৃষ্টি ৰাজখোৱাৰ নেতৃত্বত যোৱা এটা সাতজনীয়া দলে পাকিস্তানত প্ৰশিক্ষণ গ্ৰহণ কৰিছিল বুলি সুৰক্ষা বাহিনীৰ সূত্ৰত প্ৰকাশ পাইছে।
দৃষ্টি ৰাজখোৱাৰ নেতৃত্বত যোৱা সাতজনীয়া দলটোৱে পাকিস্তান আৰু আফগানিস্তান সীমান্তৰ পেছাৱাৰত ২০০৫ চনত বিস্ফোৰক নিৰ্মাণ সম্পৰ্কীয় প্ৰশিক্ষণ গ্ৰহণ কৰিছিল।
‘‘পাকিস্তানী সংস্থাই সাতজনীয়া দলটোৰ বাবে ভূৱা পাছপোৰ্টৰ ব্যৱস্থা কৰি দিছিল। পাছপোৰ্টত দৃষ্টি ৰাজখোৱাৰ নামটো শ্বিলঙৰ এজন খাচিয়া লোকৰ নামেৰে দিছিল। দুমহীয়া প্ৰশিক্ষণত দলটোৱে আৰ পি জি আৰু আই ই ডিৰ ওপৰত প্ৰশিক্ষণ গ্ৰহণ কৰিছিল,’’ সুৰক্ষা বাহিনীৰ এগৰাকী বিষয়াই এইদৰে উল্লেখ কৰে বুলি আছাম ট্ৰিবিউন বাতৰি কাকতে প্ৰকাশ কৰে।
আত্মসমৰ্পনকাৰী আলফা(স্বা)ৰ দুৰ্ধৰ্ষ নেতা গৰাকীয়ে আৰক্ষীৰ তদন্তৰ সময়তে এই কথা প্ৰকাশ কৰে।
পাকিস্তানলৈ প্ৰশিক্ষণ গ্ৰহণৰ বাবে যোৱা সাতজনীয়া দলটোৰ দুগৰাকী সদস্য ত্ৰিপুৰাৰ এটা বিদ্ৰোহী সংগঠনৰ।
সূত্ৰৰ পৰা লাভ কৰা খবৰ অনুসৰি আলফা(স্বা)ৰ অতিকমেও চাৰিটা গোটে পাকিস্তান-আফগানিস্তান সীমান্তত প্ৰশিক্ষণ গ্ৰহণ কৰি আহিছে।
গোৱালপাৰা জিলাৰ ৰংজুলিৰ বাসিন্দা ৫০ বছৰীয়া দৃষ্টি ৰাজখোৱাই চাৰিগৰাকী সতীৰ্থৰ সৈতে মেঘালয়ৰ দক্ষিণ-পশ্চিম গাৰো পাহাৰ আৰক্ষীৰ ওচৰত আত্মসমৰ্পন কৰিছিল।
১৯৮৮ চনত দৃষ্টি ৰাজখোৱাই সংযুক্ত মুক্তি বাহিনী অসমত যোগদান কৰিছিল।