ইমান দিনে ভাঙক মাৰাত্মক ড্ৰাগছৰ শাৰীত ধৰা হৈছিল যদিও এতিয়াৰে পৰা আৰু ভাঙক ড্ৰাগছ হিচাবে গণ্য কৰা নহ’ব।
ৰাষ্ট্ৰসংঘই ভোটদানৰ জৰিয়তে গ্ৰহণ কৰা এক ঐতিহাসিক সিদ্ধান্তৰ পিছতে ভাঙক ড্ৰাগছৰ তালিকাৰ পৰা বাদ দিয়া হয়।
শেহতীয়াকৈ ভাঙক ড্ৰাগছৰ শাৰীৰ পৰা বাদ দিয়াৰ বাবে অনুষ্ঠিত ভোটত ২৭ খন দেশৰ ভিতৰৰে ২৫ খনে ভাং ড্ৰাগছ নহয় বুলি ভোটদান কৰে।
উল্লেখ্য ১৯৬১ চনতে ভাঙক মাৰাত্মক ড্ৰাগছ হিচাবে ঘোষণা কৰা হৈছিল।
ফলত তেতিয়াৰে পৰা ভাং সেৱন কৰাটো ড্ৰাগছ সেৱনৰ সমতুল্য হিচাবে গ্ৰাহ্য কৰা হৈছিল।
ভাঙৰ ওপৰত থকা ড্ৰাগছৰ চিলমোহৰ আংতৰ কৰাৰ বাবে বিশ্বৰ বিভিন্ন প্ৰান্তৰ বহু দল-সংগঠন তথা ব্যক্তিয়ে দাবী জনাই আহিছিল।
শেহতীয়াকৈ ৰাষ্ট্ৰসংঘই ঘোষণা কৰা সিদ্ধান্তই সেয়ে এতিয়া উৎফুল্লিত কৰি তুলিছে ভাংপ্ৰেমীসকলক।
নাৰ্ক’টিক ড্ৰাগছ সম্পৰ্কীয় গৱেষক কেনজি ৰিবুলেট জেমৌলিয়ে ৰাষ্ট্ৰসংঘৰ সিদ্ধান্তক আদৰণি জনাই কয় যে ভাং পুৰণি কালৰে পৰা ঔষধি উদ্ভিদ হিচাবে ব্যৱহাৰ হৈ আহিছে।
ইয়াৰ ঔষধি গুণ অনেক। ড্ৰাগছৰ তালিকাৰ পৰা মুক্ত হোৱাৰ পিছত এতিয়া নানান ঔষধত এই পদাৰ্থ ব্যৱহাৰ কৰিব পৰা যাব বুলি তেওঁ মন্তব্য কৰে।
উল্লেখ্য কেৱল আমেৰিকাতে বছৰি বহু বিলিয়ন মাৰ্কিন ডলাৰ মূল্যৰ ভাং ঔষধ প্ৰস্তুতৰ কামত ব্যৱহাৰ হয়।
