সমগ্ৰ দেশতে আজি ৭২ সংখ্যক স্বাধীনতা দিৱস পালন কৰাৰ সমান্তৰালভাৱে শোণিতপুৰ জিলা প্ৰশাসনে তেজপুৰতো চহৰখনৰ চাৰ্চ ফিল্ডত বৰ্ণাঢ্য কাৰ্যসূচীৰে স্বাধীনতা দিৱস উদযাপন কৰা হয়।
স্বাধীনতা দিৱসৰ লগত সংগতি ৰাখি পুৱা চহিদক স্মৰণ কৰি পুষ্পাঞ্জলি অৰ্পণ কৰাৰ পিছত গাৰ্ড অব্ অ’নাৰ গ্ৰহণ কৰি পতাকা উত্তোলন কৰা হয়।
তেজপুৰত স্বাধীনতা দিৱসৰ পতাকা উত্তোলন কৰে অসম চৰকাৰৰ পৰ্যটন আৰু ভৈয়াম জনজাতি উন্নয়ন মন্ত্ৰী চন্দন ব্ৰহ্মই।
পতাকা উত্তোলন কৰি মন্ত্ৰী গৰাকীয়ে পৰ্যটনৰ আৰ্কষণৰ মূল কেন্দ্ৰ বিন্দু তেজপুৰ চহৰৰ বাবে ১০ কোটি টকীয়া আঁচনি ঘোষণা কৰাৰ লগতে অসম চৰকাৰৰ বিভিন্ন আঁচনিৰ ওপৰত ভাষণ প্ৰদান কৰে।
ইয়াৰ পিছতেই এন চি চি, বিভিন্ন বিদ্যালয়ৰ ছাত্ৰ-ছাত্ৰী আৰু অসম আৰক্ষীৰ জোৱানসকলৰ দ্বাৰা পেৰেড প্ৰদৰ্শিত কৰাৰ উপৰিও তেজপুৰ চহৰৰ অন্তৰ্গত বিভিন্ন বিদ্যালয়ৰ ছাত্ৰ -ছাত্ৰীৰ মাজত নৃত্য-গীত তথা বিভিন্ন সাংস্কৃতিক অনুষ্ঠান পৰিৱেশন কৰা হয়।
আনহাতে প্ৰতি বছৰৰ দৰে এইবাৰো স্বাধীনতা দিৱস উপলক্ষে শোণিতপুৰ জিলা প্ৰশাসনে জিলাখনলৈ গৌৰৱ কঢ়িয়াই অনা কেইবাগৰাকী বিশিষ্ট ব্যক্তিক সম্বধৰ্না জনায়।
সভাত সম্বৰ্ধনা জনোৱা ব্যক্তি সকল হ’ল ক্ৰমে বিশিষ্ট সত্ৰীয়া শিল্পী জীৱন চন্দ্ৰ নাথ, মহাত্মা গান্ধীয়ে প্ৰশংসা কৰি থৈ যোৱা তেজপুৰ মহিলা সমিতি, ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত টাইকোৱানডোত সুনাম কঢ়িয়াই অনা ৰ’দালি বৰুৱা।
