নৰেন্দ্ৰ মোদীৰ প্ৰধান মন্ত্ৰিত্বৰ দ্বিতীয়খন চৰকাৰৰ প্ৰথমখন বাজেট কেন্দ্ৰীয় বিত্ত মন্ত্ৰী নিৰ্মলা সীতাৰমনে শুকুৰবাৰে দাখিল কৰাৰ পিছতে বিভিন্ন মহলে প্ৰতিক্ৰিয়া ব্যক্ত কৰিছে।
বাজেটক লৈ চৌদিশে চলিছে চৰ্চা। কোনো যদি এই বাজেটক লৈ সুখী, আন কোনোৱে আকৌ বাজেটখন ‘আঁসোৱাহপূৰ্ণ’ আখ্যা দিছে।
সৰ্বানন্দ সোণোৱাল, মুখ্য মন্ত্ৰী, অসম
বাজেটত খেতিয়কৰ বাবে অধিক গুৰুত্ব দিয়া হৈছে তথা আন্তঃগাঁথনি নিৰ্মাণৰ বাবে বিশেষ গুৰুত্ব দিয়া হৈছে। মুঠৰ ওপৰত এই বাজেটৰ দ্বাৰা আগন্তুক দিনত ভাৰতবৰ্ষক আগুৱাই নিবলৈ লক্ষ্য স্থিৰ কৰা হৈছে। ২০২৪-২৫ চনলৈকে ভাৰতৰ অৰ্থনীতি পাঁচ ত্ৰিলিয়নলৈকে নিয়াৰ লক্ষ্য স্থিৰ কৰা হৈছে। এই বাজেটৰ পৰা ভাৰতৰ সকলো শ্ৰেণীৰ ৰাইজ লাভান্বিত হ’ব।
ৰিপুণ বৰা, সভাপতি, অসম প্ৰদেশ কংগ্ৰেছ সমিতি
বাজেটখন ৰাইজৰ বাবে একো উপকাৰ সাধন কৰিব নোৱাৰা বাজেট। প্ৰথমৰ পৰা শেষলৈকে বাজেটখন শুনিলো। ইয়াত কেৱল আলংকাৰিক শব্দ আৰু সুন্দৰ ভাষা প্ৰয়োগৰ বাহিৰে এই বাজেটত একোৱেই নাইকিয়া। ২০২৪-২৫ চনৰ ভিতৰত ভাৰতবৰ্ষৰ অৰ্থনীতি ৫ ত্ৰিলিয়ন ডলাৰলৈকে লৈ যাব বুলি উল্লেখ কৰিছে যদিও ইয়াৰ কোনো ৰ’ড মেপ দিয়া নাই। এই লক্ষ্যত কেনেদৰে উপনীত হ’ব তাৰ কোনো লক্ষ্য দিয়া নাই।
ক্লীন ৰিভাৰত কেৱল গংগাৰ নাম উল্লেখ কৰিছে, অসমৰ ব্ৰহ্মপুত্ৰ আৰু বৰাক নদীয়ে কি অপৰাধ কৰিলে?
বেংকৰ কোটি কোটি টকা আত্মসাৎ কৰি পলাই থকা অপৰাধীক ধৰাৰ কোনো কথা বাজেটত উল্লেখ নাই। যুৱকসকলৰ উন্নতিৰ কথা কোৱা হৈছে, কিন্তু নিবনুৱা যুৱকক সংস্থাপনৰ কোনো কথা বাজেটত উল্লেখ নাই। কেৱল গৱেষণাৰ কথাহে উল্লেখ কৰিছে আৰু উচ্চ শিক্ষাৰ কথা কৈছে। উজ্বলা যোজনাৰ যোগেদি ৭ কোটি লোকক ৰন্ধন গেছৰ সংযোগ দিয়াৰ কথা বাৰেপতি উল্লেখ কৰিছে যদিও এই সংযোগ দিয়াৰ পাছত ব্যৱহৃত হৈ আছে নে নাই সেই কথা উল্লেখ কৰা নাই।
মহিলাৰ শক্তিৰ কথা উল্লেখ কৰিলে যদিও চাকৰি সুৰক্ষা, ধৰ্ষণ, অত্যাচাৰ ইত্যাদি বিষয়ৰ ওপৰত বাজেটত একো উল্লেখ নকৰিলে।
বাজেটখনত দুখীয়া লোকৰ বাবে একো নতুনত্ব নাই তথা আশাৰ কোনো সঞ্চাৰ নাই।
তপন গগৈ, সাংসদ, যোৰহাট
এই বাজেটৰ পৰা অসম তথা উত্তৰ-পূৰ্বাঞ্চলৰ লোক উপকৃত হ’ব। যোৱা বছৰতকৈ প্ৰায় ১২ হাজাৰ কোটি টকা বেছিকৈ অনুমোদন দিছে। এই বাজেটৰ জৰিয়তে অসমৰ ৰাইজে সু-ফল পাবলৈ সক্ষম হ’ব।
প্ৰদ্যুৎ বৰদলৈ, সাংসদ, নগাওঁ
কেৱল প্ৰধান মন্ত্ৰীক ভাল লগাবলৈ এই বাজেট দাখিল কৰা হৈছে। অধ্যক্ষৰ পিনে চকু দিয়াৰ সলনি বিত্ত মন্ত্ৰীয়ে বেছিভাগ সময় প্ৰধান মন্ত্ৰীৰ ফালে লক্ষ্য কৰি থাকিল।
কৃষিক্ষেত্ৰৰ সমস্যা, খেতিয়কৰ দুৰৱস্থা আৰু কৰ্মহীনতাকে ধৰি একো গুৰুতৰ বিষয়কে বাজেটখনে নুচুলে। এই বাজেট কৰ্পৰে’টক ভাল লগোৱা বাজেট।
ভাৰতক ২০২৫ চনৰ ভিতৰত ৫ ত্ৰিলিয়ন ডলাৰ অৰ্থনীতি কৰিবলৈ হ’লে আমাৰ অৰ্থনৈতিক প্ৰগতিৰ হাৰ ৮ শতাংশ নহয়, ১২ শতাংশ হ’ব লাগিব।
সাধাৰণ লোকক কিবা এটা দিয়াৰ সলনি চৰকাৰে পে’ত্ৰল আৰু ডিজেলৰ ওপৰত অতিৰিক্ত এটকা মাচুল আৰোপ কৰিছে।
পল্লৱ লোচন দাস, সাংসদ, তেজপুৰ
যোগাযোগ আৰু পৰ্য্যটন বিভাগত অত্যধিক গুৰুত্ব দিয়া হৈছে। পৰ্য্যটন ক্ষেত্ৰত অধিক গুৰুত্ব দিলে উত্তৰ-পূবত এই ক্ষেত্ৰত উন্নতি কৰাৰ যথেষ্ট সুযোগ আছে।
অতুল বৰা, সভাপতি, অগপ
বাজেট জনমুখী আৰু গ্ৰামাঞ্চলৰ অৰ্থনৈতিক বুনিয়াদ শক্তিশালীকৰণৰ লক্ষ্যৰে প্ৰস্তুত কৰা।
সংগীতা দাস, যুটীয়া সম্পাদক, এছ এফ আই, অসম
বাজেটত সমতা দেখিবলৈ পোৱা নগ’ল। বিজেপি চৰকাৰে সমতাৰ কথা কৈছিল যদিও বাজেটত সেই সমতাৰ কথা দেখিবলৈ পোৱা নগ’ল। কৃষিপ্ৰধান দেশ ভাৰতত কৃষকৰ আৰ্থিক সংকট, ঋণৰ সমস্যা, ইত্যাদিৰ সমাধানৰ বাবে কোনো বিশেষ পদক্ষেপ বাজেটত দেখিবলৈ পোৱা নগ’ল। কেৱল বাজেটত লিখিছে কৃষকসকল দেশৰ সম্পদ, কিন্তু এই দেশৰ সম্পদক ৰক্ষণাৱেক্ষণ দিব লাগে তাৰ কোনো কথা বাজেটত উল্লেখ নকৰিলে। নিৱনুৱা যুৱকক সংস্থাপন, ছাত্ৰসকলৰ নতুন আৰ্থিক নীতি কেনেকৈ কাৰ্য্যকৰী কৰিব সেই বিষয়েও উল্লেখ নাই বাজেটত।
