খানাপাৰাত অনুষ্ঠিত হোৱা ধন পুৰস্কাৰ মেলাত দূৰ দূৰণিৰ চাহ বাগিচাৰ পৰা অহা শ্ৰমিকসকলক বিনম্ৰভাৱে নমস্কাৰ জনায় কেন্দ্ৰীয় বিত্তমন্ত্ৰী নিৰ্মলা সীতাৰমনে।
বিত্তমন্ত্ৰী সীতাৰমনে কয় যে চাহকাপ ৰাতিপুৱা সকলোৱে খায়। সকলো বিশ্ববাসীয়ে ৰাতিপুৱাই অসমক চাহ কাপ খাওঁতে স্মৰণ কৰে।
চাহ জনগোষ্ঠীৰ ঝুমুৰ গীত শুনি বহু ভাল লাগিল বুলিও ভাষণৰ মাজতে উল্লেখ কৰে সীতাৰমনে।
তেওঁ কয় যে যি চাহ ৰাতিপুৱা খাই বিশ্ববাসী কৰ্মক্ষেত্ৰলৈ যায়, সেইসকল চাহ বাগিচাৰ শ্ৰমিকৰ ঘৰৰ ল’ৰা-ছোৱালীয়ে ৰাতিৰ ৰেহাই হোৱা খাদ্য খাব, এনেকুৱা কেতিয়াও হ’ব নোৱাৰে। এই ধাৰাৰ এতিয়া সলনি হ’বলৈ আৰম্ভ কৰিছে।
‘’২০১৪ৰ পৰা কামাখ্যা প্ৰসাদ তাছাই চাহ বাগানৰ লোকসকলৰ উন্নয়ন কৰিবলৈ মোক বাৰেপতি অনুৰোধ জনাই আহিছিল। ঠিক সেইদৰে পল্লৱ লোচন দাসেও তেওঁৰ কায়দাৰে সংসদত চাহ বাগিচাৰ লোকৰ উন্নয়নৰ বাবে অনুৰোধ জনাই আহিছিল’’-সীতাৰমনে কয়।
তেওঁ কয় যে এতিয়া চৰকাৰৰ গৃহ, আয়ুষ্মান ভাৰতকে ধৰি অন্য সকলো চৰকাৰী সুবিধা লাভ কৰিছে চাহ বাগিচাত।
আনহাতে, চৰকাৰী সুবিধা লাভ নকৰাসকলে জনাব লাগে, নিশ্চয়কৈ অতি সোনকালে তেওঁলোকে সেয়া লাভ কৰিব বুলি কয় বিত্তমন্ত্ৰীগৰাকীয়ে।
বিত্তমন্ত্ৰীগৰাকীয়ে লগতে কয় যে কৰ’না কালত বেংকৰ বিষয়া কৰ্মচাৰীয়ে বহু তৎপৰতা অৱলম্বন কৰি চাহ বাগিচাৰ শ্ৰমিকৰ একাউণ্ট খোলাত সহায় কৰিছিল। ইয়াৰ কৃতিত্ব তেওঁলোকে লাভ কৰিব লাগে। তেওঁলোক সকলোকে ধন্যবাদ জনাইছো।
চাহ বাগিচাক মুম্বাইৰে তুলনা কৰি কেন্দ্ৰীয় বিত্তমন্ত্ৰী গৰাকীয়ে কয়,‘’চাহ বাগিচা মুম্বাইতকৈ কম নহয়। কিয়নো বেংক, ATM, মোবাইল ব্যৱস্থা চাহ বাগিচাৰ লোকসকলে লাভ কৰিছে। দালাল ব্যৱস্থা আঁতৰাই পোনপটীয়াকৈ বেংক একাউন্টৰ জৰিয়তে সকলোৱে লাভ কৰিব পাৰিছে। এইবোৰতে প্ৰধান মন্ত্ৰীৰ ডিজিটেল ইণ্ডিয়াৰ প্ৰয়োজনীয়তা বা সু-প্ৰয়োগ প্ৰতিফলিত হৈছে।‘’
তেওঁ কয়, ‘’সকলো ৰাজ্যৰে সমবিকাশ হোৱাটোৱে ভাৰত চৰকাৰৰ মূল লক্ষ্য আৰু উদ্দেশ্য। চাহ বাগিচাৰ উন্নয়নৰ বাবে পৰৱৰ্তী সময়তো অধিক দৃঢ়তাৰে কাম কৰি যাম।‘’
