উচ্চতম ন্যায়ালয়ত তিনিজন নতুন ন্যায়াধীশ নিযুক্তি দিয়া হৈছে। অৱশেষত কলেজিয়ামৰ পৰামৰ্শৰ প্ৰতি ৰাষ্ট্ৰপতিয়ে অনুমোদন দিয়াৰ পিছত কেন্দ্ৰীয় চৰকাৰে দেশৰ শীৰ্ষ আদালতত তিনিজন নতুন ন্যায়াধীশ নিযুক্তিৰ বাবে এক অধিসূচনা জাৰি কৰিছে। বৃহস্পতিবাৰৰ ভিতৰত নিযুক্তি প্ৰক্ৰিয়া সম্পূৰ্ণ হোৱাৰ সম্ভাৱনা আছে।
মুখ্য ন্যায়াধীশ বি আৰ গাভাইৰ নেতৃত্বত গঠিত কলেজিয়ামে শেহতীয়াকৈ তিনিখন উচ্চ ন্যায়ালয়ৰ দুজন মুখ্য ন্যায়াধীশ আৰু এজন ন্যায়াধীশক উচ্চতম ন্যায়ালয়ৰ ন্যায়াধীশৰ পদবীলৈ উন্নীত কৰাৰ পৰামৰ্শ আগবঢ়ায়। নামৰ তালিকাখন কেন্দ্ৰলৈ প্ৰেৰণ কৰা হয়। বুধবাৰে কলেজিয়ামৰ এই পৰামৰ্শৰ প্ৰতি সঁহাৰি দিয়ে ৰাষ্ট্ৰপতি দ্ৰৌপদী মুৰ্মুৱে।
ইয়াৰ এদিন পিছত বৃহস্পতিবাৰে কেন্দ্ৰীয় আইন মন্ত্ৰী (স্বতন্ত্ৰ) অৰ্জুন ৰাম মেঘৱালে এক্স হেণ্ডেলৰ জৰিয়তে উচ্চতম ন্যায়ালয়ত তিনিজন ন্যায়াধীশ নিযুক্তি দিয়াৰ কথা ঘোষণা কৰে। তেওঁ লিখিছে, “সংবিধানে প্ৰদান কৰা ক্ষমতা প্ৰয়োগ কৰি ৰাষ্ট্ৰপতিয়ে ভাৰতৰ মুখ্য ন্যায়াধীশৰ সৈতে আলোচনাৰ অন্তত কৰ্ণাটক উচ্চ ন্যায়ালয়ৰ মুখ্য ন্যায়াধীশ এন.ভি. অঞ্জাৰিয়া, গুৱাহাটী উচ্চ ন্যায়ালয়ৰ মুখ্য ন্যায়াধীশ বিজয় বিষ্ণোই আৰু বোম্বে উচ্চ ন্যায়ালয়ৰ ন্যায়াধীশএ এছ ছান্দুৰকৰক উচ্চতম ন্যায়ালয়ৰ ন্যায়াধীশ হিচাপে নিযুক্তি দিবলৈ পাই আনন্দিত।‘’
সূত্ৰ অনুসৰি শুকুৰবাৰে পুৱা ভাৰতৰ মুখ্য ন্যায়াধীশ বি আৰ গাভাইয়ে তিনিজন নতুন ন্যায়াধীশক শপত গ্ৰহণ কৰাব। ইয়াৰ ফলত ভাৰতীয় ন্যায়পালিকাৰ বৃহৎ সালসলনি হ’ব৷ যদিও উচ্চতম ন্যায়ালয়ত ৩৪জন ন্যায়াধীশ থকাৰ অনুমোদন দিয়া হৈছে, বৰ্তমান ৩১জন ন্যায়াধীশ আছে। প্ৰাক্তন মুখ্য ন্যায়াধীশ সঞ্জীৱ খান্না আৰু ন্যায়াধীশ অভয় এছ ওকা আৰু ন্যায়াধীশ হৃষিকেশ ৰায়ৰ অৱসৰৰ বাবে শীৰ্ষ আদালতত তিনিটা পদ খালী হয়। ন্যায়াধীশ বেলা এম ত্ৰিবেদীয়েও অহা ৯ জুনত অৱসৰ গ্ৰহণ কৰিব।তিনিজন নতুন ন্যায়াধীশৰ আগমনৰ লগে লগে নতুন ন্যায়াধীশৰ সংখ্যা পূৰণ হ’ব।
শীৰ্ষ ন্যায়ালয়ত খালী পদ পূৰণৰ বাবে সোমবাৰে মুখ্য ন্যায়াধীশ বি আৰ গাভাইৰ নেতৃত্বত গঠিত পাঁচজনীয়া কলেজিয়ামে বৈঠকত মিলিত হয়। মুখ্য ন্যায়াধীশ গাভাইৰ নেতৃত্বত গঠিত সমিতিখনত বৰ্তমান ন্যায়াধীশ সূৰ্য্য কান্ত, ন্যায়াধীশ বিক্ৰম নাথ, ন্যায়াধীশ জে কে মহেশ্বৰী আৰু ন্যায়াধীশ বি ভি নাগৰত্ন আছে। তাৰ পিছত এই তিনিজন ন্যায়াধীশৰ নামৰ পৰামৰ্শ দিয়া হৈছিল। ইয়াৰ উপৰিও পাঁচজন লোকক বিভিন্ন উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াৰ প্ৰস্তাৱ দিয়া হৈছিল। ইয়াৰ লগতে দেশৰ বিভিন্ন উচ্চ ন্যায়ালয়ৰ ২১ গৰাকী ন্যায়াধীশক বদলিৰ বাবেও পৰামৰ্শ দিয়া হৈছে।
উল্লেখ্য যে ১৯৮৮ চনত গুজৰাট উচ্চ ন্যায়ালয়ত কৰ্মজীৱন আৰম্ভ কৰা ন্যায়াধীশ অঞ্জৰিয়াই ২০২৪ চনত কৰ্ণাটক উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি লাভ কৰে। আনহাতে, ১৯৮৯ চনত ৰাজস্থান উচ্চ ন্যায়ালয়ত কৰ্মজীৱন আৰম্ভ কৰা ন্যায়াধীশ বিষ্ণোই যোৱা বছৰ গুৱাহাটী উচ্চ ন্যায়ালয়ৰ মুখ্য ন্যায়াধীশ পদলৈ উন্নীত হৈছিল।
