কেন্দ্ৰীয় গৃহ মন্ত্ৰী অমিত শ্বাহে ২১ জুলাইত নতুন দিল্লীত নিৰ্মাণ হ’বলগীয়া কাৰ্বি ভৱন আৰু ডিমাচা ভৱনৰ শিলন্যাস কৰিব।
নতুন দিল্লীত নিৰ্মাণ হ’বলগীয়া কাৰ্বি ভৱনটো য়ু পি ডি এচৰ সৈতে হোৱা বুজাবুজিৰ চুক্তিৰ আধাৰত ১০০ কোটি টকা ব্যয় সাপেক্ষে নিৰ্মাণ কৰা হ’ব।
শুকুৰবাৰে গুৱাহাটীত এই কথা সদৰী কৰে কাৰ্বি আংলং স্বায়ত্ত শাসিত পৰিষদৰ মুখ্য কাৰ্য্যবাহী সদস্য তুলিৰাম ৰহাঙে।
এখন সংবাদ মেল সম্বোধন কৰি ৰহাঙে কয় ‘‘নতুন দিলীৰ দ্বাৰকাস্থিত চেক্টৰ থ্ৰীৰ প্লট নং ১১ আৰু ১২ ত ১০০ কোটি টকা ব্যয় সাপেক্ষে এটা নতুন কাৰ্বি ভৱন নিৰ্মাণৰ কাম আৰম্ভ কৰা হ’ব’’।
ৰহাঙে সংবাদমেলত উল্লেখ কৰা অনুসৰি ১০০ কোটিৰ ভিতৰত আন্তঃগাঠনিৰ কামত ৮৫ কোটি আৰু আভ্যন্তৰীণ সজ্জ্যাৰ বাবে ১৫ কোটি টকা খৰছ কৰা হ’ব। ইতিমধ্যে প্ৰয়োজনীয় ভূমি আৱন্তন দিয়া হৈছে আৰু দুবছৰৰ ভিতৰত এই নিৰ্মাণ কাৰ্য্য সম্পূৰ্ণ কৰা হ’ব বুলি ৰহাঙে কয়।
এইখিনিতে উল্লেখ কৰা ভাল যে কেন্দ্ৰ চৰকাৰ আৰু ৰাজ্য চৰকাৰৰ সৈতে হোৱা কাৰ্বি শসন্ত্ৰ সংগঠন য় পি ডি এচৰ বুজাবুজি চুক্তিৰ আধাৰতে কাৰ্বি ভৱনটো নিৰ্মাণ কৰা হ’ব।
আনহাতে, কাৰ্বি ভৱনৰ উপৰিও দ্বাৰকাত এটি ডিমাচা ভৱনো নিৰ্মাণ কৰা হ’ব। দুয়োটা গৃহৰে শিলন্যাস একেদিনাই গৃহ মন্ত্ৰী অমিত শ্বাহে কৰিব।
কাৰ্বি শ্বায়ত্ব শাসিত পৰিষদৰ মুখ্য কাৰ্য্যবাহীগৰাকীয়ে কাৰ্বি ভৱনটো নিৰ্মাণ কৰাৰ ফলত দিল্লীলৈ পঢ়িবলৈ যোৱা কাৰ্বি ছাত্ৰ-ছাত্ৰীসকলৰ লগতে স্বাস্থ্য পৰীক্ষাৰ বাবে যোৱা কাৰ্বি লোকসকল উপকৃত হ’ব।
ক’লকাতাতো কাৰ্বি ভাৱনৰ বাবে ইতিমধ্যে এটা চাৰি মহলীয়া বিল্ডিং মাটিৰে সৈতে ক্ৰয় কৰা হৈছে বুলি ৰহাঙে কয়।
তেওঁ নতুন দিল্লীত হ’বলগীয়া কাৰ্বি ভৱনটোত গা ধোৱা ঘৰৰে সৈতে সংলগ্ন তিনিটা অতিৰিক্ত শোৱনি কোঠা আৰু ৰান্ধনী ঘৰ আৰু এটা জিৰণি ঘৰ থাকিব বুলি মত প্ৰকাশ কৰে।
ৰহাঙে সীমা বিষয়ত মন্তব্য প্ৰকাশ কৰি কয় যে কাৰ্বি ভূমিৰ এক ইঞ্চিও মাটি মেঘালয় অথবা নাগালেণ্ডক দিয়া নহ’ব।
‘আমি আজি মুখ্য মন্ত্ৰী সৰ্বানন্দ সোণোৱালক সীমা বিবাদ সম্পৰ্কত সাক্ষাৎ কৰিছো আৰু শীঘ্ৰেই মেঘালয়ৰ সৈতে পশ্চিম কাৰ্বি আংলঙৰ ব্লক ১ আৰু ব্লক ২ অঞ্চলৰ সমস্যা সমাধানৰ বাবে আহ্বান জনাইছো’ ৰহাঙে এনেদৰে কয়।
আনহাতে, শ্বিলঙত ২০১৫ চনতে আধাৰশিলা স্থাপন কৰা কাৰ্বি হোষ্টেলৰ প্ৰসংগত সাংবাদিকে সোধা এক প্ৰশ্নৰ উত্তৰত ৰহাঙে এতিয়ালৈ হোষ্টেলটো নিৰ্মাণৰ কাম আৰম্ভ নোহোৱাৰ বাবে ঠিকাদাৰক জগৰীয়া কৰে।