দুৰ্নীতিৰ ক্ষেত্ৰত শূণ্য সহনশীলতাৰ প্ৰতিশ্ৰুতিৰে দিছপুৰৰ মছনদ দখল কৰা সৰ্বানন্দ সোণোৱাল নেতৃত্বাধীন মিত্ৰজোঁট চৰকাৰখনে সম্প্ৰতি দুৰ্নীতিৰ ক্ষেত্ৰত উদাৰ মনোভাৱ পোষণ কৰা পৰিলক্ষিত হৈছে।
শেহতীয়াকৈ মৰিগাঁও জিলা কৃষি বিভাগত কৃষকৰ বাবে আৱন্টিত বীজ বিতৰণত ব্যাপক দুৰ্নীতি, কেলেংকাৰী সংঘটিত হোৱাৰ অভিযোগ উঠিছে।
এপষেক আগেয়ে নহৰু বীজ কৃষকক বঞ্চিত কৰি মধ্যভোগীৰ হাতত তুলি দিয়াৰ বাতৰি সংবাদ মাধ্যমত সবিস্তাৰে বাতৰি প্ৰকাশ পাইছিল যদিও বিভাগীয় মন্ত্ৰী তথা বিভাগৰ উৰ্দ্ধতন কতৃপক্ষই জিলা কৃষি বিভাগৰ বিষয়া-কৰ্মচাৰীৰ বিৰুদ্ধে আজিকোপতি কোনো ব্যৱস্থা গ্ৰহণ কৰা পৰিলক্ষিত নহ’ল।
বৰং পুনৰ মাকৈৰ বীজ, সৰিয়হৰ বীজ আৰু পিয়াঁজৰ বীজ বিতৰণত বিয়াগোম দুৰ্নীতি সংঘটিত কৰাৰ আন এক গুৰুতৰ অভিযোগ উঠিছে। মাকৈ, পিয়াঁজ আৰু সৰিয়হৰ বীজ প্ৰকৃত কৃষকৰ মাজত বিতৰণ নকৰি মৰিগাঁও জিলা কৃষি বিভাগৰ বিষয়া কৰ্মচাৰীসকলে কমিচনৰ আশাত মধ্যভোগী বণিয়াৰ হাতত তুলি দিছে।
মধ্যভোগী দালালৰ হাঁতোৰাৰ কব্জাত আজি জিলা কৃষি বিভাগ। জিলা কৃষি বিভাগৰ বিষয়া-কৰ্মচাৰীসকলে কৃষকক এৰি মধ্যভোগী দালালৰ লগত সম্পৰ্ক ৰক্ষা কৰি চৰকাৰে ৰূপায়ণ কৰা বিভিন্ন আঁচনিত দুৰ্নীতি সংঘটিত কৰি আহিছে।
বান খহনীয়াত বিধ্বস্ত মৰিগাঁও জিলাৰ কৃষকৰ বাবে ৰবি শস্যৰ ৰোপণৰ বাবে পিয়াঁজৰ বীজ, মাকৈৰ বীজ আৰু সৰিয়হৰ বীজ চৰকাৰে বিনামূলীয়াকৈ যোগান দিছে।
জিলা কৃষি বিভাগৰ বিষয়া কৰ্মচাৰীসকলে বহু মূল্যৱান তথা উন্নত মানৰ বীজ কৃষকৰ মাজত বিতৰণ নকৰি মধ্যভোগীৰ লগত গোপন বুজাবুজি কৰি বীজসমূহ গোপনে বিক্ৰী কৰাৰ অভিযোগ উঠিছে।
ৰবি শস্যৰ এই বীজসমূহ বিতৰণত অধিক দুৰ্নীতি সংঘটিত হৈছে বান খহনীয়াগ্ৰস্ত লাহৰীঘাট আৰু ভূৰাগাঁৱত।
যি সময়ত লাহৰীঘাট-ভূৰাগাঁৱৰ হাজাৰ হাজাৰ কৃষকে বীজৰ অভাৱত হাহাকাৰ কৰিব লগা হৈছে, সেই সময়তেই বিভাগে চৰকাৰী বীজৰে ৰমৰমীয়া ব্যৱসায় চলাই গৈছে বিষয়া কৰ্মচাৰী সকলে।
তেঁওলোকে কৃষকৰ ওচৰলৈ নাহি জিলা কাৰ্যালয়ৰ পৰাই বীজ মধ্যভোগী দালালৰ হাতত তুলি দিছে।
উদাহৰণ স্বৰূপে জিলাখনৰ ভূৰাগাঁও কৃষি চক্ৰৰ অন্তৰ্গত কৃষকৰ বাবে ২২ কুইন্টল মাকৈৰ বীজ,৩ কুইন্টল পিয়াঁজৰ বীজ আৰু ৩ কুইন্টল সৰিয়হৰ বীজ আৱন্টন দিছে। এই বৃহত পৰিমাণৰ বীজ কৃষকৰ মাজত বিতৰণ নকৰি মধ্যভোগীৰ বনিয়াৰ হাতত তুলি দিছে।
ভূৰাগাঁও কৃষি চক্ৰৰ বীজ বিতৰণৰ দায়িত্বত আছে কৃষি সম্প্ৰসাৰণ সহায়ক ইউছুৱ আলী। আলীয়ে বীজসমূহ জিলা কাৰ্যালয়ৰ পৰাই কমিচনৰ বিনিময়ত মধ্যভোগীৰ মাজত বিতৰণ কৰি আহিছে।এই বৃহত পৰিমাণৰ বীজৰ পৰা সকলো প্ৰকৃত কৃষক বঞ্চিত হৈছে।
অধিক দামত বীজ ক্ৰয় কৰিব নোৱাৰি বহু কৃষকে ৰবি শস্যৰ আশা বাদ হাত সাৱটি ঘৰতে বহি থাকিব লগা হৈছে। এয়া মাত্ৰ এটা উদাহৰণহে।
এইদৰে সমগ্ৰ জিলাখনত বীজ বিতৰণত দুৰ্নীতি সংঘটিত হৈ আহিছে। ইমান দুৰ্নীতি সংঘটিত কৰাৰ পিছতো জিলা কৃষি বিভাগৰ বিষয়া-কৰ্মচাৰীৰ প্ৰতি চৰকাৰৰ ইমান দৰদ কিয়? বীজৰ পৰা বঞ্চিত দুখীয়া কৃষকসকলে কৃষি মন্ত্ৰী অতুল বৰাই জিলা কৃষি বিভাগৰ বিষয়া-কৰ্মচাৰীক দুৰ্নীতি লাইচেন্স দিছে নেকি বুলিও প্ৰশ্ন কৰিছে।
