কোভিড-১৯ত কম বয়সৰ অবিবাহিতৰ মৃত্যুৰ আশংকা অধিক; গৱেষণাই বঢ়াইছে চিন্তা!
সুস্বাস্থ্যৰ বাবে বিবাহিত জীৱন এতিয়া জৰুৰী হৈ পৰিছে। মহামাৰীৰ বৰ্তমান সংকটৰ সময়ত এইটোৱে সত্য প্ৰমানিত হ’বলৈ গৈছে।
নতুন এক গৱেষণা মতে, কোভিড-১৯ত অবিবাহিত কম বয়সীয়া যুৱক-যুৱতীৰ মৃত্যুৰ আশংকা বিবাহিত লোকৰ তুলনাত অধিক থাকে।
ছুইডেনৰ য়ুনিভাৰ্ছিটি অফ ষ্টকহ’মৰ গৱেষকে ইয়াক লৈ সতৰ্ক কৰি দিছে।
য়ুনিভাৰ্ছিটি অফ ষ্টকহ’মৰ গৱেষকে দাবী কৰিছে যে অবিবাহিত ডেকা-ডেকেৰীৰ উপৰি নিম্ন আয়, কম পঢ়াশুনা আৰু কম বা মধ্যমীয়া আয়ৰ দেশত কৰ’না ভাইৰাছত মৃত্যুৰ সম্ভাৱনা অধিক।
‘ছুইডিছ নেশ্যনেল বোৰ্ড অফ হেল্থ এণ্ড ৱেলফেয়াৰ’ৰ দ্বাৰা ছুইডেনত কোভিড-১৯ত পঞ্জীকৃত মৃত্যুৰ তথ্যৰ আধাৰত এই অধ্যয়ন চলোৱা হৈছিল।
এই অধ্যয়নত ২০ বছৰ বা তাতকৈ অধিক বয়সৰ লোকক সামৰি লোৱা হৈছিল।
প্ৰতিবেদন অনুসৰি, অবিবাহিত অৰ্থাৎ যুৱক বা যুৱতীৰ মাজত কোভিড-১৯ত মৃত্যুৰ আশংকা বিবাহিত লোকৰ তুলনাত ডেৰৰ পৰা দুই গুণলৈ অধিক। এই তালিকাত অবিবাহিত, বিধৱা, পত্নী নোহোৱা আৰু বিবাহ বিচ্ছেদিত লোকো আছে।
প্ৰতিবেদনত লগতে দাবী কৰা হৈছে যে মহিলাৰ তুলনাত পুৰুষৰ কোভিড-১৯ত মৃত্যুৰ আশংকা দুগুণতকৈয়ো অধিক।
ইয়াৰ পূৰ্বেও কিছুমান অধ্যয়নত কোৱা হৈছিল যে ছিংগল বা অবিবাহিত লোকৰ বিভিন্ন বেমাৰত অধিক মৃত্যু ঘটে।
প্ৰতিবেদনত কোৱা হৈছে যে সাধাৰণতে যিসকল লোক প্ৰথমৰে পৰা কোনো নহয় কোনো ৰোগত ভূগে, তেওঁলোকৰ সংগীৰ প্ৰতি আকৰ্ষণ কিছু কম দেখা যায়। সেই বাবেই এনেকুৱা লোকক আগলৈ বিয়াৰ ক্ষেত্ৰত বহুত কম আগ্ৰহী হোৱা দেখা যায়।
কোৱা হৈছে যে বিবাহিত সকলৰ তুলনাত ছিংগল লোকে কম সুৰক্ষিত পৰিৱেশ লাভ কৰে। সেয়েহে, বিবাহিত লোকসকল অবিবাহিতসকলতকৈ কম ৰোগত ভোগাৰ লগতে এক স্বাস্থ্যৱান জীৱনৰ আনন্দ ল’ব পাৰে।