পেলেষ্টাইনৰ কয়দীৰ ওপৰত চলা যৌন নিৰ্যাতনৰ বাতৰি প্ৰকাশ কৰা বাবে নিউয়ৰ্ক টাইমছৰ বিৰুদ্ধে গোচৰ তৰাৰ হুংকাৰ দিছে ইজৰাইল চৰকাৰে। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে এই আইনী পদক্ষেপ ল’ব বুলি জানিবলৈ দিছে। আমেৰিকাৰ প্ৰখ্যাত দৈনিক বাতৰিকাকতখনত অলপতে ইজৰাইলী বাহিনীৰ জিম্মাত থকা ফিলিস্তিনৰ নাগৰিকসকলৰ ওপৰত হোৱা ধৰ্ষণ আৰু নিৰ্যাতনৰ এক সবিশেষ প্ৰতিবেদন প্ৰকাশ পাইছিল। এই প্ৰতিবেদন ওলোৱাৰ পিছতে ক্ষুব্ধ হৈ পৰিছে ইজৰাইল চৰকাৰ।
নিউয়ৰ্ক টাইমছৰ বহুদিনীয়া স্তম্ভলেখক নিকোলাছ ক্ৰিষ্টফে এই প্ৰতিবেদনখন প্ৰস্তুত কৰিছিল। ইয়াৰ বাবে তেওঁ ১৪ গৰাকী ফিলিস্তিনী মহিলা আৰু পুৰুষ ভুক্তভোগীৰ পোনপটীয়া ভাষ্য সংগ্ৰহ কৰিছিল। প্ৰতিবেদনখন প্ৰকাশ হোৱাৰ তিনি দিনৰ পিছতে ইজৰাইলৰ প্ৰধানমন্ত্ৰীৰ কাৰ্যালয়ৰ পৰা মানহানিৰ গোচৰ তৰাৰ এই কথা ঘোষণা কৰা হয়। উল্লেখযোগ্য যে ২০২৩ চনৰ ৭ অক্টোবৰৰ পিছৰ পৰা ইজৰাইলী সেনাৰ হাতত বন্দী হোৱা ফিলিস্তিনীৰ সংখ্যা বহুত বাঢ়ি গৈছে আৰু তেওঁলোকৰ ওপৰত হোৱা নিৰ্যাতনৰ বহু প্ৰমাণো পোহৰলৈ আহিছে।
ইজৰাইলে প্ৰথমতে এই প্ৰতিবেদনখনক ইহুদীসকলৰ বিৰুদ্ধে এক চক্ৰান্ত আৰু মিছা প্ৰচাৰ বুলি নিন্দা কৰিছিল। কিন্তু পিছত প্ৰধানমন্ত্ৰী নেতানিয়াহু আৰু বৈদেশিক মন্ত্ৰী গিডিয়ন ছাৰে নিউয়ৰ্ক টাইমছৰ বিৰুদ্ধে মানহানিৰ গোচৰ ৰুজু কৰিবলৈ চৰকাৰীভাৱে নিৰ্দেশ দিয়ে। ইজৰাইলৰ দাবী যে এই প্ৰতিবেদনখন তেওঁলোকৰ দেশৰ বিৰুদ্ধে আধুনিক সংবাদ মাধ্যমত প্ৰকাশ পোৱা আটাইতকৈ ডাঙৰ আৰু বিকৃত মিছা কথা।
ইজৰাইলৰ এনে ভাবুকিৰ পিছতো নিউয়ৰ্ক টাইমছ আৰু সাংবাদিক নিকোলাছ ক্ৰিষ্টফ নিজৰ স্থিতিত অটল আছে। কাকতখনৰ মুখপাত্ৰ চাৰ্লি ষ্টেডটলেণ্ডাৰে জনাইছে যে তেওঁলোকে প্ৰকাশ কৰা প্ৰতিটো তথ্য পুংখানুপুংখভাৱে পৰীক্ষা কৰা হৈছে। ভুক্তভোগীসকলৰ উপৰি অন্যান্য প্ৰত্যক্ষদৰ্শী, মানবাধিকাৰ সংগঠনৰ গৱেষণা আৰু ৰাষ্ট্ৰসংঘৰ প্ৰতিবেদনৰ সৈতে মিলাই চাইহে এই বাতৰি ছপা কৰা হৈছিল। গতিকে ইজৰাইলৰ এই আইনী ভাবুকিৰ কোনো ভিত্তি নাই আৰু ই কেৱল স্বাধীন সাংবাদিকতাক বাধা দিয়াৰ এক ৰাজনৈতিক কৌশলহে।
অৱশ্যে নিউয়ৰ্ক টাইমছৰ বিৰুদ্ধেও কিছুমান মহলে পক্ষপাতিত্বৰ অভিযোগ তুলিছে। সমালোচকসকলৰ মতে, ইজৰাইলৰ ওপৰত হোৱা আক্ৰমণৰ খবৰবোৰ কাকতখনে গুৰুত্বপূৰ্ণ সংবাদ শাখাত প্ৰকাশ কৰে, কিন্তু পেলেষ্টাইনী সকলৰ ওপৰত হোৱা নিৰ্যাতনৰ এই গুৰুতৰ খবৰটো কিয় মতামত বা অপিনিয়ন শাখাত প্ৰকাশ কৰিলে। ইয়াৰ পূৰ্বে ইজৰাইলীসকলৰ ওপৰত হামাছে কৰা যৌন নিৰ্যাতনৰ বাতৰি লৈও কাকতখনৰ ভিতৰতে প্ৰশ্ন উঠিছিল, যদিও নিউয়ৰ্ক টাইমছে সদায় নিজৰ সংবাদৰ পক্ষতে থিয় দি আহিছে।
ইফালে ৰাষ্ট্ৰসংঘৰ মানবাধিকাৰ কাউঞ্চিলে পূৰ্বে দাখিল কৰা এক প্ৰতিবেদনত কোৱা হৈছিল যে ইজৰাইলৰ নিৰাপত্তা ব্যৱস্থাত পেলেষ্টাইনী সকলৰওপৰত যৌন হিংসা কৰাটো এক সাধাৰণ নিয়মৰ দৰে হৈ পৰিছে। আনকি বন্দী হৈ থকা ফিলিস্তিনী সাংবাদিকসকলৰ এক বৃহৎ অংশই এনে নিৰ্যাতনৰ সন্মুখীন হৈছে বুলিও তথ্য প্ৰকাশ পাইছে। চকুৰ পানী টুকি বহু ভুক্তভোগীয়ে কাৰাগাৰত তেওঁলোকৰ ওপৰত হোৱা অমানুষিক অত্যাচাৰৰ কথা সংবাদ মাধ্যমৰ আগত বৰ্ণনা কৰিছে।
