নগাঁৱৰ ষ্ট্ৰং ৰুমত নিশা উত্তপ্ত পৰিস্থিতি : সুৰামত্ত চি আৰ পি এফৰ বিষয়াৰ তাণ্ডৱ
পঞ্চায়ত নিৰ্বাচনৰ বেলট বাকচ ৰখা নগাঁও চৰকাৰী বালক উচ্চতৰ মাধ্যমিক বিদ্যালয়ৰ ষ্ট্ৰং ৰুম চৌহদত বৃহস্পতিবাৰে নিশা এক উত্তপ্ত পৰিস্থিতিৰ সৃষ্টি হয়। নিশা প্ৰায় ৮.৩০ বজাত ষ্ট্ৰং ৰুম স্থাপন কৰা বিদ্যালয়খনত অতৰ্কিতে এগৰাকী অৰ্ধ সামৰিক বাহিনীৰ উচ্চ পদস্থ বিষয়া প্ৰৱেশ কৰি সেই স্থানত বাহৰ পাতি থকা একাংশ দলীয় এজেণ্টক গুৰুলা-গুৰুলকৈ মাৰপিট কৰে।
জিলা নিৰ্বাচনী বিভাগৰ পৰা প্ৰদান কৰা আই কাৰ্ড দেখুওৱা সত্ত্বেও বিষয়াজনৰ নেতৃত্বত অৰ্ধ বাহিনীৰ এটা দলে এজেণ্টসকলক ষ্ট্ৰং ৰুমৰ গেটৰ বাহিৰলৈ বলপূৰ্বকভাৱে উলিয়াই দিয়াৰ লগতে এজেণ্টসকলৰ বাবে স্থাপন কৰা অস্থায়ী কেম্পটোৰ সকলো সামগ্ৰী ভাঙি লণ্ড-ভণ্ড কৰে।
আনকি, সুৰাৰ ৰাগীত মাতাল বিষয়াজনে উপায়ুক্তক উদ্দেশ্যি কটূ মন্তব্যও কৰে। অৰ্ধ সামৰিক বাহিনীৰ উচ্চ পদস্থ বিষয়াজনৰ এই কাৰ্যত হতভম্ব হৈ পৰা কৰ্তব্যত নিয়োজিত চাৰিগৰাকী আৰক্ষী কনিষ্টবলে বিষয়াজনক বুজাবলৈ চেষ্টা কৰে যদিও তেওঁলোককো গতা মাৰি পেলাই দিয়ে।
ইয়াকে লৈ ষ্ট্ৰং ৰুম চৌহদত এক উত্তপ্ত পৰিস্থিতিৰ সৃষ্টি হয়। অৱশ্যে,পাছত উচ্চ পদস্থ আৰক্ষী বিষয়া আহি পৰিস্থিতি নিয়ন্ত্ৰণ কৰে। কংগ্ৰেছ দলৰ একাংশ প্ৰাৰ্থী তথা এজেণ্টে অভিযোগ কৰা মতে, ষ্ট্ৰং ৰুমৰ চোৱা চিতাৰ দায়িত্বত নিয়োজিত এজেণ্টসকলক বাহিৰলৈ উলিয়াই দি নিশাৰ ভাগত ৰেগিং কৰাৰ পৰিকল্পনা কৰিছিল।
ইপিনে, অপ্ৰীতিকৰ পৰিস্থিতি সৃষ্টি কৰাৰ অভিযোগত জিলাখনৰ গড়াজান জিলা পৰিষদৰ প্ৰাৰ্থী ছেলিম জাবেদক আৰক্ষীয়ে আটক কৰিছে।