সাংবাদিক নহয়, এইবাৰ যোগী আদিত্যনাথ শাসিত উত্তৰ প্ৰদেশত হত্যাৰ বলি হৈছে এগৰাকী মহিলা চিকিৎসক। দিন দুপৰতে চিকিৎসক গৰাকীক নিজ গৃহতে হত্যা কৰে হত্যাকাৰীয়ে।
শুকুৰবাৰে সন্ধিয়া ৩৮ বছৰীয়া মহিলা চিকিৎসক গৰাকীক চোকা অস্ত্ৰেৰে ডিঙি কাটি নিজ গৃহতে হত্যা কৰা হৈছে।
আৰক্ষীৰ সূত্ৰই প্ৰকাশ কৰা ঘটনাৰ বিৱৰণী অনুসৰি উত্তৰ প্ৰদেশৰ আগ্ৰাৰ ডাঃ নিশা সিংঘাল নামৰ মহিলা দন্ত চিকিৎসক গৰাকীক দুপৰীয়া টিভিৰ টেচ টপ-বক্সটো ৰিচাৰ্জ সংক্ৰান্তত ঘৰলৈ অহা এজন লোকে হত্যা কৰে।
মহিলা চিকিৎসকগৰাকীক হত্যা কৰাৰ সময়ত তেওঁৰ আঠ আৰু চাৰি বছৰীয়া দুই সন্তানে অন্য এটা কোঠাত খেলি আছিল।
আৰক্ষীয়ে প্ৰকাশ কৰাৰ মতে হত্যাকাৰীয়ে চিকিৎসক গৰাকীৰ দুই সন্তানকো আক্ৰমণ কৰিছিল যদিও দুয়ো কেনেবাকৈ বাছি যায়।
হত্যাকাণ্ড সংঘটিত কৰাৰ সময়ত মহিলা চিকিৎসক গৰাকীৰ স্বামী শল্য চিকিৎসক ডাঃ অজয় সিংঘাল চিকিৎসালয়ত কৰ্মৰত আছিল।
ঘটনা সম্পৰ্কে খবৰ লাভ কৰিয়ে তেওঁ ঘৰলৈ আহি পত্নীক চিকিৎসালয়লৈ লৈ যায় যদিও ইতিমধ্যে তেওঁৰ পত্নীৰ মৃত্যু ঘটে।
ইফালে আৰক্ষীয়ে চিচিটিভিৰ ফুটেজৰ সহায়ত হত্যাকাৰী গৰাকীক চিনাক্ত কৰিবলৈ সক্ষম হয়।
শনিবাৰে (আজি) পুৱা অভিযুক্ত শোভন পাঠক নামৰ লোকজনক হত্যাকাণ্ডত জড়িত থকা অভিযোগত আৰক্ষীয়ে গ্ৰেপ্তাৰ কৰে।
আৰক্ষীয়ে লগতে প্ৰকাশ কৰিছে কেবল টিভিৰ মেকানিকৰ ভাৱেৰে লোকজনে ডকাইটিৰ কৰাৰ উদ্দেশ্যেৰে চিকিৎসক দম্পতীৰ ঘৰত প্ৰৱেশ কৰিছিল।
