উত্তৰ প্ৰদেশত বিজেপি নেতাৰ পুত্ৰৰ গাড়ীয়ে খুন্দা মৰাৰ ফলত এজন লোকৰ মৃত্যু ঘটিছে। মৃত যুৱকজনক জানি-বুজি গাড়ীৰে খুন্দা মৰাৰ অভিযোগ উত্থাপন কৰিছে মৃত লোকজনৰ পৰিয়ালে। প্ৰতিবাদত তেওঁৰ পত্নী চাৰিটা সন্তানৰ সৈতে পথত নামিছে। শুকুৰবাৰে তেওঁ অভিযুক্তক গ্ৰেপ্তাৰ কৰাৰ দাবীত গোটেই দিনটো বিক্ষোভ প্ৰদৰ্শন কৰে। অৱশ্যে অভিযুক্ত বিজেপি নেতা আৰু তেওঁৰ পুত্ৰ পলাতক। তেওঁলোকৰ সন্ধান চলোৱা হৈছে। মৃতকৰ পত্নীয়ে আৰক্ষীৰ বিৰুদ্ধে নিষ্ক্ৰিয়তাৰ অভিযোগ উত্থাপন কৰিছে।
উত্তৰ প্ৰদেশৰ বস্তি জিলাৰ ঘটনা। মৃত লোকজনৰ নাম ৰামলাল গুপ্তা। পেছাত তেওঁ আছিল এজন ৰান্ধনী। অভিযোগ অনুসৰি যিখন BMW গাড়ীৰ খুন্দাত তেওঁৰ মৃত্যু হৈছে সেইখনৰ মালিক আজমতুল্লাহ। স্থানীয় বিজেপি নেতা হামিদুল্লাৰ পুত্ৰ। অভিযোগ অনুসৰি ঘটনাৰ সময়ত সেই গাড়ীখনত হামিদুল্লাও আছিল।
মৃতকৰ পত্নীয়ে জনোৱা মতে, বৃহস্পতিবাৰে বিয়লি যুৱকজন কামৰ অন্তত ঘৰলৈ উভতি আহিছিল। ইয়াৰ পিছত তেওঁ ওচৰতে ফুৰিবলৈ ওলাই গ’ল। ৰাস্তাৰ কাষত থিয় হৈ থাকোঁতে হঠাতে এখন BMW তেওঁৰ ফালে আগবাঢ়ি আহিল। যুৱকজনে নিজকে ৰক্ষা কৰাৰ সুযোগ নাপালে। মৃতকৰ পত্নীয়ে ইচ্ছাকৃতভাৱে গাড়ীখনে খুন্দা মৰাৰ অভিযোগ উত্থাপন কৰে। লগতে তেওঁ দাবী কৰে যে গাড়ীখন বিজেপি নেতাই চলাইছিল।
ঘটনাৰ পিছতে গুৰুতৰভাৱে আঘাতপ্ৰাপ্ত যুৱকজনক উদ্ধাৰ কৰি চিকিৎসালয়লৈ লৈ যোৱা হয়। তাত থকা চিকিৎসকে তেওঁক মৃত ঘোষণা কৰে। মৃতকৰ পত্নীয়ে জনোৱা মতে, তেওঁৰ স্বামীয়েই পৰিয়ালটোৰ একমাত্ৰ উপাৰ্জনকাৰী সদস্য। তেওঁলোকৰ চাৰিটা সন্তান আছে। সিঁহতক কেনেকৈ ডাঙৰ-দীঘল কৰিব তাকলৈয়ে প্ৰশ্ন তুলিছে মহিলাগৰাকীয়ে।
মৃতকৰ পত্নীৰ অভিযোগৰ ভিত্তিত আৰক্ষীয়ে ঘটনাৰ তদন্ত আৰম্ভ কৰিছে। তেওঁলোকে আশ্বাস দিছে যে অভিযুক্তক গ্ৰেপ্তাৰ কৰা হ’ব।
