পুনৰ বিপদত পৰিছে ৱিকিপিডিয়া। পক্ষপাতদুষ্ট আৰু ভুল তথ্য দিয়াৰ অভিযোগত কেন্দ্ৰ চৰকাৰ ৰোষত পৰিছে ৱিকিপিডিয়া।
মঙলবাৰে কেন্দ্ৰীয় চৰকাৰে ৱিকিপিডিয়াক পক্ষপাতদুষ্ট আৰু ভুল তথ্য প্ৰদান কৰাৰ অভিযোগ উত্থাপন কৰি এখন জাননী প্ৰেৰণ কৰে। ইয়াৰ উপৰিও এটা সৰু গোটে ৱিকিপিডিয়াৰ সম্পাদকীয় মণ্ডলী নিয়ন্ত্ৰণ কৰে বুলি কেন্দ্ৰই প্ৰকাশ কৰিছে।
কেন্দ্ৰই এই জাননীত ৱিকিপিডিয়াক মধ্যস্থতাকাৰীৰ পৰিৱৰ্তে প্ৰকাশক হিচাপে কিয় গণ্য কৰিব নোৱাৰি সেই বিষয়েও জানিবলৈ বিচাৰিছে।
ৱিকিপিডিয়াই নিজকে বিনামূলীয়া অনলাইন বিশ্বকোষ হিচাপে পৰিচয় দিয়ে আৰু স্বেচ্ছাসেৱকসকলে প্ৰতিষ্ঠিত ব্যক্তি আৰু বহুতো বিষয়ৰ ওপৰত পৃষ্ঠা সৃষ্টি আৰু সম্পাদনা কৰাৰ অনুমতি দিয়ে। কিন্তু বহুলভাৱে ব্যৱহৃত এই তথ্যকোষ বৰ্তমান ভাৰতত আইনী যুদ্ধৰ সন্মুখীন হৈছে।
চলিত বৰ্ষৰ ছেপ্টেম্বৰ মাহত দিল্লী উচ্চ ন্যায়ালয়ৰ এক নিৰ্দেশত ৱিকিপিডিয়াৰ বিনামূলীয়া সম্পাদনাক ‘বিপজ্জনক’ বুলি অভিহিত কৰা হৈছিল। ৱিকিপিডিয়াৰ বিৰুদ্ধে এটা সংবাদ সংস্থাই দাখিল কৰা মানহানিৰ গোচৰত আদালতে এই মন্তব্য কৰে। এই গোচৰৰ ন্যায়াধীশসকলে ৱিকিপিডিয়াৰ সম্পাদনা নীতিক লৈ আশ্চৰ্য্য প্ৰকাশ কৰে। এই গোচৰত অনিয়ন্ত্ৰিত সম্পাদনাৰ আশংকাক আলোকপাত কৰি আদালতে কয় যে কোনো ব্যক্তি বা সংস্থাৰ বিষয়ে স্পৰ্শকাতৰ তথ্যৰ ক্ষেত্ৰতো বিসংগতি থাকিব পাৰে।
১৭ অক্টোবৰত দিল্লী উচ্চ ন্যায়ালয়ৰ মুখ্য ন্যায়াধীশ মনমোহন আৰু ন্যায়াধীশ তুষাৰ ৰাও গেডেলাই এই গোচৰত ৩৬ ঘন্টাৰ ভিতৰত সংশ্লিষ্ট পৃষ্ঠাটো ডিলিট কৰিবলৈ ৱিকিপিডিয়াক নিৰ্দেশ দিছিল।
এই গোচৰত ৱিকিপিডিয়াৰ হৈ হাজিৰ হৈছিল অধিবক্তা অখিল ছিবাল। তেওঁ আদালতত কয় যে ৱিকিপিডিয়াই নিজেই পৃষ্ঠা সৃষ্টি নকৰে বা মতামত প্ৰকাশৰ বাবে পৃষ্ঠা সৃষ্টি নকৰে।
অৱশ্যে অধিবক্তাগৰাকীৰ কথাত সন্তুষ্ট নহৈ ন্যায়াধীশগৰাকীয়ে কয়, “ইয়াত আপোনালোকৰ ব্যৱসায়িক কাম-কাজ বন্ধ কৰি দিম।” ভাৰত চৰকাৰক ৱিকিপিডিয়া ব্লক কৰিবলৈ কওক। লগতে, যদি আপুনি ভাৰত ভাল নাপায়, তেন্তে অনুগ্ৰহ কৰি ভাৰতত কাম নকৰিব”।
ন্যায়াধীশে ৱিকিপিডিয়াৰ অধিবক্তাক সংবাদ সংস্থাটোৰ পেজত সম্পাদনা কৰা তিনিটা গ্ৰাহক একাউণ্টৰ সবিশেষ বিচাৰিছিল। এই মন্তব্য প্ৰকাশ কৰিবলৈ অস্বীকাৰ কৰাৰ পিছত এই মন্তব্য কৰে ন্যায়াধীশগৰাকীয়ে।
