মঙলবাৰে গুৱাহাটী উচ্চ ন্যায়ালয়ে অসম চৰকাৰক জাননী জাৰি কৰি গুৱাহাটীৰ ঐতিহাসিক দীঘলীপুখুৰীৰ পাৰৰ কেইবাটাও শতিকা পুৰণি গছ কাটি প্ৰস্তাৱিত উৰণ সেতু নিৰ্মাণৰ বাবে লোৱা সিদ্ধান্তক লৈ শপতনামা দাখিল কৰিবলৈ নিৰ্দেশ দিয়ে।
নৰ্থইষ্ট নাওৰ কাৰ্যবাহী সম্পাদক মহেশ ডেকা, সাংবাদিক চন্দন বৰগোহাঁই, আৰু নিখিল ভাৰত কৃষক সংঘ, অসমৰ সম্পাদক জয়ন্ত গগৈয়ে দাখিল কৰা জনস্বাৰ্থ জড়িত গোচৰৰ শুনানি গ্ৰহণ কৰি মুখ্য ন্যায়াধীশ বিজয় বিষ্ণোই আৰু ন্যায়াধীশ এন উন্নী কৃষ্ণন নায়ৰক লৈ গঠিত বিভাগীয় বিচাৰপীঠে অসমৰ মুখ্য সচিবক ১১ নৱেম্বৰ, ২০২৪ৰ ভিতৰত শপতনামা দাখিল কৰিবলৈ নিৰ্দেশ দিয়ে।
জ্যেষ্ঠ অধিবক্তা বিক্ৰম ৰাজখোৱাই প্ৰতিনিধিত্ব কৰি দীঘলীপুখুৰীৰ গছবোৰ কাটিবলৈ লোৱা চৰকাৰী সিদ্ধান্তৰ ওপৰত স্থগিতাদেশ বিচাৰিছিল।
আবেদনকাৰীৰ হৈ যুক্তি আগবঢ়ায় জ্যেষ্ঠ অধিবক্তা কমল নয়ন চৌধুৰীয়ে।
অৱশ্যে অসম চৰকাৰৰ মহাধিবক্তা দেৱজিৎ শইকীয়াই জাননীৰ বিষয়টোৰ বিৰোধিতা কৰি কয়, ‘ইছ্যুটো ইতিমধ্যে সমাধান হৈছে আৰু যদি জাননী জাৰি কৰা হয় তেন্তে সংবাদ মাধ্যমত বেলেগ ধৰণৰ কথা ওলাব। গছবোৰত মাত্ৰ চিহ্নিত কৰা হৈছিল, আৰু তাৰ পাছত বহুতো কাম-কাজৰ কথা বিবেচনা কৰিব লাগিব। যেতিয়া গছবোৰ চিনাক্ত কৰা হৈছিল, তেতিয়া সেইটো কাটিবৰ বাবে দিয়া হোৱা নাছিল৷”
এই বিষয়ে মুখ্য ন্যায়াধীশ বিষ্ণোই ক’লে, “আপুনি এই সকলোবোৰ শপতনামাত স্পষ্ট কৰক, আৰু আমি সেইবোৰ বিবেচনা কৰিম।”
মুখ্য ন্যায়াধীশ বিষ্ণোইয়ে এডভোকেট জেনেৰেল শইকীয়াক কয়, ‘আপাততঃ আমি ১ৰ পৰা ৪ নং প্ৰতিবাদীক জাননী জাৰি কৰিম, আৰু আপুনি সামূহিক শপতনামা দাখিল কৰিব।
২০২৪ চনৰ ১৩ নৱেম্বৰত পুনৰ শুনানি গ্ৰহণ কৰিব আদালতে।
উল্লেখযোগ্য যে নুনমাটি-আৰ বি আই পইণ্ট উৰণীয়া সেতু প্ৰকল্পৰ বাবে চৰকাৰে দীঘলীপুখুৰীত কমেও ২৭জোপা গছ কটাৰ কৰাৰ পৰিকল্পনাৰ বিৰুদ্ধে গুৱাহাটীৰ ছাত্ৰ-ছাত্ৰী, শিল্পী, সংশ্লিষ্ট নাগৰিকে প্ৰতিবাদ সাব্যস্ত কৰি আহিছে।
