সমাগত বিধানসভা নিৰ্বাচনকলৈ কালি বিপিএফৰ সভাপতি হাগ্ৰামা মহিলাৰীয়ে প্ৰদান কৰা মন্তব্যৰ পিচত আজি বিটিআৰৰ মুখ্য কাৰ্যবাহী প্ৰমোদ বড়োই প্ৰতিক্ৰিয়া প্ৰকাশ কৰিছে৷
আজি কোকৰাঝাৰত বড়োই কয় যে আহি থকা বিধানসভা নিৰ্বাচনত ইউপিপিএল দলে বিটিআৰৰ বাৰটা সমষ্টিত প্ৰাৰ্থিত্ব প্ৰদান কৰিব৷
তদুপৰি বিটিআৰৰ বৰ্হিভূত বিলাসীপাৰা পূৱ,বিলাসীপাৰা পশ্চিম আদি সমষ্টিতো প্ৰাৰ্থী দিব লাগে বুলি দলৰ পৰা আবেদন আহিছে৷
কালি বিপিএফৰ সভাপতি হাগ্ৰামা মহিলাৰীয়ে সম্প্ৰতি বিটিআৰত গণতন্ত্ৰ নাই, তাত মিলিটাৰীৰাজ চলিছে বুলি কৰা মন্তব্যৰ প্ৰতিক্ৰিয়া প্ৰকাশেৰে মুখ্য কাৰ্যবাহী বড়োই বিগত সোতৰ বছৰে হাগ্ৰামাই গান্ধীৰ শাসন চলাইছিল নেকি বুলি কটাক্ষ কৰে৷
আনহাতে শান্তি ঘূৰি অহা বিটিআৰত কিছু অশুভ শক্তিয়ে ৰাজনৈতিক উদ্দেশ্যৰে নতুন সশস্ত্ৰ সংগঠন গঠনৰ বাবে চলোৱা প্ৰচেষ্টা তথা হিংসাত্মক কাৰ্যক সহ্য কৰা নহব বুলি সকিয়াই দি উগ্ৰবাদক কঠোৰ হাতেৰে দমন কৰিবলৈ চৰকাৰক আহ্বান জনাইছে মুখ্য কাৰ্যৱাহী বড়োৱে৷
উল্লেখ্য যে বিধানসভা নিৰ্বাচনকলৈ ইউপিপিএল দলে বিজেপিৰে মিত্ৰতাৰ সিদ্ধান্ত এতিয়াও চূড়ান্ত কৰা নাই বুলি তেওঁ কৌশলী মন্তব্য প্ৰদান কৰে৷
