সন্তানসকলৰ কোনোৱে ভাল ব্যৱহাৰ নকৰে বা তেওঁক ভালদৰে চোৱাচিতা নকৰে। সেয়েহে, তেওঁলোকক কাকোকে সম্পত্তি নিদি নিজৰ পোহনীয়া কুকুৰ আৰু দ্বিতীয় পত্নীৰ নামত গোটেই সম্পত্তি লিখি দিলে মধ্য প্ৰদেশৰ এগৰাকী ব্যক্তিয়ে।
লিখি দিয়া সম্পত্তিৰ ভিতৰত আছে ২১ একৰ মাটিও। বৃত্তিত এগৰাকী কৃষক এই ব্যক্তিগৰাকীৰ এনে কাণ্ড পোহৰলৈ অহাৰ পাছতে স্বাভাৱিকতে আচৰিত হৈ পৰিছে স্থানীয় ৰাইজ।
মধ্য প্রদেশৰ ছিন্দাওবাড়া জিলাৰ অন্তৰ্গত বাদীওৱাড়া গাঁৱৰ ঘটনা এয়া। এই কাণ্ড সংঘটিত কৰা ব্যক্তিগৰাকীৰ নাম হৈছে ওমনাৰায়ন বাৰ্মা।
বাৰ্মাৰ প্ৰথমা পত্নীৰ ফালৰ পৰা তিনি গৰাকী কন্যা আৰু এটি পুত্ৰ আছে। আনহাতে, দ্বিতীয়া পত্নীৰ ফালৰ পৰা আছে দুগৰাকী কন্যা। সেইদৰে আছে ১১মহীয়া জেকি নামৰ এটা পোহনীয়া কুকুৰ।
শেহতীয়াকৈ ওমনাৰায়ন বাৰ্মাই তেওঁৰ শেষ উইলখনত নিজৰ সমস্ত সম্পত্তি দ্বিতীয়া পত্নী চম্পা বাই আৰু পোহনীয়া কুকুৰ জেকিৰ নামত লিখি দিছে। উইলত লিখি দিয়ে যে তেওঁৰ মৃত্যুৰ পাছত আধা সম্পত্তি পত্নী চম্পা বাইয়ে পাব আৰু বাকী আধা সম্পত্তি পাব জেকিয়ে।
যিয়ে জেকিক চোৱাচিতা কৰিব তেওঁৱেই সেই বাকী সম্পত্তিখিনি পাব। জেকিৰ মৃত্যুৰ পাছত তেওঁ সেই সম্পত্তি লাভ কৰিব।
বাৰ্মাই দৰাচলতে কিয় এই সিদ্ধান্ত গ্ৰহণ কৰিলে তাৰ কাৰণ হিচাপে তেওঁ কয় যে সন্তানসকলৰ কোনোৱে তেওঁক চোৱাচিতা নকৰে। তেওঁৰ দ্বিতীয়া পত্নী আৰু জেকিয়ে সকলো সময়তে তেওঁৰ লগত আছে। তদুপৰি, তেওঁৰ মৃত্যুৰ পাছত কোনোৱে জেকিক চোৱাচিতা নকৰিব।
সেয়েহে, তেওঁ সকলো ভাৱি-চিন্তি এই সিদ্ধান্ত গ্ৰহণ কৰিছে। গাওঁ পঞ্চায়ত প্ৰধানে জানিবলৈ দিয়া মতে ল’ৰা-ছোৱালীসকলৰ সৈতে তেওঁৰ কাজিয়া হৈছিল। সেয়ে, খঙৰ ভমকতে এই সিদ্ধান্ত গ্ৰহণ কৰিছে।
তথাপি, ঘটনাটো পোহৰলৈ অহাৰ পাছতে স্থানীয় লোকসকলৰ মাজত বিষয়টোৱে ব্যাপক চৰ্চা লাভ কৰিছে।
