আমেৰিকাৰ এখন আদালতে ৰায় দিছে যে আমেৰিকাৰ ৰাষ্ট্ৰপতি ড’নাল্ড ট্ৰাম্পে আৰোপ কৰা শুল্কসমূহৰ অধিকাংশই অবৈধ। এই ৰায়দানৰ পিছতো ট্ৰাম্পে আৰোপ কৰা সকলো শুল্ক ১৪ অক্টোবৰলৈকে কাৰ্যকৰী হৈ থাকিব।
এই সময়ছোৱাত ট্ৰাম্প প্ৰশাসনক উচ্চতম ন্যায়ালয়ত এই ৰায়ক প্ৰত্যাহ্বান জনোৱাৰ সুযোগ দিয়া হ’ব। উল্লেখ্য যে ট্ৰাম্পে ভাৰতকে ধৰি বহু দেশৰ বিৰুদ্ধে এই শুল্কক অৰ্থনৈতিক আহিলা হিচাপে ব্যৱহাৰ কৰিছিল।
ৱাশ্বিংটন ডি চিৰ ফেডাৰেল চাৰ্কিট কোৰ্ট অৱ আপীলে শুল্ক গোচৰৰ ৰায়দানত কয় যে ট্ৰাম্পে এই শুল্ক আৰোপ কৰি নিজৰ ক্ষমতাৰ সীমা অতিক্ৰম কৰিছে। যোৱা এপ্ৰিল মাহত ঘোষণা কৰা ‘পাৰস্পৰিক শুল্ক’ আৰু চীন, মেক্সিকো আৰু কানাডাৰ বিৰুদ্ধে পৃথক শুল্কৰ বিৰুদ্ধে এই ৰায়দান কৰা হৈছে।
ইপিনে, ষ্টীল আৰু এলুমিনিয়ামৰ দৰে সামগ্ৰীৰ ওপৰত ট্ৰাম্পে আৰোপ কৰা শুল্ক এই ৰায়দানৰ দ্বাৰা প্ৰভাৱিত নহ’ব। উল্লেখ্য যে ট্ৰাম্পে জৰুৰীকালীন ক্ষমতা আইনৰ অধীনত ভাৰতকে ধৰি বিভিন্ন দেশৰ বিৰুদ্ধে এই শুল্ক আৰোপ কৰিছিল।
আনহাতে, আমেৰিকাৰ আপীল আদালতৰ ৰায়ৰ প্ৰতিক্ৰিয়া স্বৰূপে আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে এই ৰায়ক উচ্চতম ন্যায়ালয়ত প্ৰত্যাহ্বান জনোৱা হ’ব। এই ৰায়দান ‘সম্পূৰ্ণ দুৰ্যোগ’ বুলিও তেওঁ কয়।
তেওঁ কয়, ‘আজি অতি পক্ষপাতদুষ্ট আপীল আদালতে ভুলকৈ ক’লে যে আমি শুল্ক উঠাব লাগে। কিন্তু তেওঁলোকে জানে যে শেষত আমেৰিকাই জয়ী হ’ব। যদি কেতিয়াবা এই শুল্ক উঠাই লোৱা হয় তেন্তে সেয়া দেশৰ বাবে সম্পূৰ্ণ দুৰ্যোগৰ সৃষ্টি হ’ব। ই আমাক আৰ্থিকভাৱে দুৰ্বল কৰি তুলিব।’
ট্ৰাম্পে কয়, ‘শুল্কৰ বাবেই আমেৰিকাই বৃহৎ বাণিজ্যিক ঘাটিৰ সন্মুখীন হৈছে। আমেৰিকাই আৰু আন দেশৰ দ্বাৰা আৰোপ কৰা অন্যায় শুল্ক সহ্য নকৰে। বন্ধু হওক বা শত্ৰু, আমাৰ উদ্যোগ, আমাৰ কৃষকক শোষণ কৰাসকলক আমি সহ্য নকৰো। সকলোৱে মনত ৰখা উচিত যে শুল্ক হৈছে আমাৰ শ্ৰমিকসকলক সহায় কৰাৰ আটাইতকৈ ডাঙৰ আহিলা। উচ্চতম ন্যায়ালয়ৰ সহায়ত আমি আমেৰিকাক পুনৰ ধনী, ক্ষমতাশালী আৰু শক্তিশালী কৰি তুলিম!’
