Monkeypox a public health emergency মাঙ্কিপক্সৰ সংক্ৰমণ ক্ৰমে অধিক বিয়পি পৰিছে। আমেৰিকা যুক্তৰাষ্ট্ৰ আৰু ব্ৰিটেইনকে ধৰি বিশ্বৰ বহুতো দেশ এই সংক্ৰমণকলৈ গভীৰভাৱে উদ্বিগ্ন। ৰোগটোৰ সংক্ৰমণ আৰু বিপদৰ কথা বিবেচনা কৰি আমেৰিকা যুক্তৰাষ্ট্ৰই বৃহস্পতিবাৰে মাঙ্কিপক্সক এক স্বাস্থ্য জৰুৰী অৱস্থা বুলি ঘোষণা কৰে।
এনে পৰিস্থিতিত দেশখনৰ চৰকাৰে ৰোগটোৰ বিৰুদ্ধে যুঁজিবলৈ পৃথক পুঁজি আৱণ্টন কৰাৰ লগতে অতিৰিক্ত কৰ্মচাৰী নিয়োজিত কৰাৰ সম্ভাৱনা আছে।
আন্তৰ্জাতিক পৰ্যায়ৰ বিভিন্ন গৱেষণামূলক সমীক্ষাত কোৱা হৈছে যে দেশ-অনুসৰি ৰোগটোৰ নতুন লক্ষণ ধৰা পৰিছে।
তাৰমাজতে আমেৰিকাৰ স্বাস্থ্য আৰু মানৱ সেৱাৰ সচিব জেভিয়াৰ বেচেৰাই এক বিবৃতিত কয়, “আমি এই ভাইৰাছৰ বিৰুদ্ধে যুঁজিবলৈ পৰৱৰ্তী পদক্ষেপ ল’বলৈ সাজু, আৰু আমি আমেৰিকানসকলক মাঙ্কিপক্সক গুৰুত্বসহকাৰে ল’বলৈ অনুৰোধ জনাইছো। লগতে এই ভাইৰাছৰ বিৰুদ্ধে যুঁজাৰ ক্ষেত্ৰত আমাক সহায় কৰিবলৈ আহ্বান জনাইছো”।
প্ৰাথমিকভাৱে ৯০ দিনৰ বাবে কাৰ্যকৰী হোৱা এই নিৰ্দেশ পিছত নৱীকৰণ কৰা হ’ব পাৰে। বৃহস্পতিবাৰে দেশখনত মাঙ্কিপক্সত আক্ৰান্তৰ সংখ্যা ৬,৫০০টা অতিক্ৰম কৰিছে।ইয়াৰ ভিতৰত এক চতুৰ্থাংশ আক্ৰান্তই নিউয়ৰ্ক চহৰৰ।
বিশেষজ্ঞসকলে অনুমান কৰে যে আক্ৰান্তৰ প্ৰকৃত সংখ্যা বহুত বেছি হ’ব পাৰে কিয়নো কিছুমানৰ বাবে লক্ষণবোৰ অতি সাধাৰণ হিচাপে ধৰা দিবপাৰে।
লগতে পঢ়ক: 5G আহিলে অচল হৈ পৰিব নেকি আপোনাৰ 4G স্মাৰ্টফোন?
আমেৰিকা যুক্তৰাষ্ট্ৰই এতিয়ালৈকে প্ৰায় ৬০০,০০০ JYNNEOS ভেকচিন সৰবৰাহ কৰিছে যিবোৰ মূলতঃ মাঙ্কিপক্স সম্পৰ্কীয় ভাইৰাছ সৰু বসন্তৰ বিৰুদ্ধে প্ৰস্তুত কৰা হৈছিল। কিন্তু সেয়া যথেষ্ট নহয় কিয়নো আনুমানিক ১.৬ নিযুত লোক এই ৰোগৰ আশংকাত ভূগি আছে আৰু তেওঁলোকক ভেকচিনৰ আটাইতকৈ বেছি প্ৰয়োজন।
