লুকাই-আবদাৰ কৰি নহয়, এইবাৰ পোনপটীয়াকৈ শান্তিৰ নোবেল বঁটা বিচাৰিলে আমেৰিকাৰ ৰাষ্ট্ৰপতিয়ে! তেওঁ নৰৱেৰ এগৰাকী মন্ত্ৰীৰ ওচৰত এই বঁটাৰ বাবে আহ্বান জনালে।
ইয়াৰ পূৰ্বেও ট্ৰাম্পে শান্তিৰ নোবেল বঁটা লাভৰ যোগ্যতাৰ বিষয়ে বহুবাৰ ৰাজহুৱাভাৱে দাবী কৰিছিল। অৱশ্যে এইবাৰ প্ৰথমবাৰৰ বাবে তেওঁ নিজকে নোবেল দিয়াৰ প্ৰস্তাৱেই আগবঢ়াইছে।
সংবাদ সংস্থা ৰয়টাৰৰ এক প্ৰতিবেদন অনুসৰি নৰৱেৰ বাণিজ্যিক দৈনিক ‘ডেগেন্স নাইৰিংছলিভ’ই লিখিছে যে যোৱা জুলাই মাহত নৰৱেৰ বাণিজ্য মন্ত্ৰী জেন্স ষ্টলটেনবাৰ্গৰ সৈতে হোৱা ফোন বাৰ্তালাপত শুল্ক আৰু অৰ্থনৈতিক সহযোগিতাৰ ওপৰত আলোচনাৰ সময়ত ট্ৰাম্পে নিজেই কৈছিল – এইবাৰ মোক শান্তিৰ নোবেল বঁটা লাগে।
ইতিমধ্যে ইজৰাইল, পাকিস্তান আৰু কম্বোডিয়াই শান্তি বঁটাৰ বাবে ট্ৰাম্পক মনোনীত কৰিছিল। কিন্তু এইবাৰ তেওঁ নৰৱেৰ পৰা পোনপটীয়াকৈ দাবী কৰিছে যে তেওঁ ‘নোবেলৰ যোগ্য’।
অৱশ্যে এই সন্দৰ্ভত এতিয়ালৈকে নোবেল কমিটী বা হোৱাইট হাউছৰ কোনো প্ৰতিক্ৰিয়া পোৱা হোৱা নাই। ষ্টল্টনবাৰ্গে অৱশ্যে কয় যে এই ফোন কলটো মূলতঃ নৰৱেৰ প্ৰধানমন্ত্ৰী জ’নাছ ষ্টাৰৰিজৰ সৈতে শুল্ক আৰু অৰ্থনৈতিক সহযোগিতাৰ ওপৰত আলোচনাৰ প্ৰস্তুতিৰ বাবে আছিল। ইয়াৰ বাহিৰেও তেওঁ কোনো সবিশেষ জনোৱা নাই। অৱশ্যে সূত্ৰ অনুসৰি ট্ৰাম্পৰ এই দাবীৰ বিনিময়ত নৰৱেই শুল্ক নিষ্পত্তিৰ প্ৰস্তাৱ আগবঢ়াইছে।
বিশেষজ্ঞসকলৰ মতে ড’নাল্ড ট্ৰাম্পে নিজৰ ঢোলটো খুব ভালকৈ বজাব জানে। সেইবাবেই ভাৰত-পাকিস্তানৰ পৰা ইজৰাইল-হামাছ, ৰাছিয়া-ইউক্ৰেইনলৈকে যুদ্ধ বন্ধ কৰিবলৈ চেষ্টা কৰি তেওঁ নিজেই বাৰে বাৰে ‘কৃতিত্বৰ দাবী’ কৰিছে।
ইপিনে, ৰাছিয়া-ইউক্ৰেইনৰ সংঘাত বন্ধ কৰাৰ ক্ষেত্ৰত ট্ৰাম্পৰ ভূমিকাক প্ৰশংসা কৰিছে ভ্লাদিমিৰ পুটিনে। ৰাছিয়াৰ ৰাষ্ট্ৰপতিগৰাকীয়ে দাবী কৰিছে যে আমেৰিকাৰ ৰাষ্ট্ৰপতিয়ে তিনি বছৰতকৈও অধিক সময় ধৰি যুদ্ধবিৰতি আৰু পাৰমাণৱিক অস্ত্ৰ নিয়ন্ত্ৰণৰ বাবে আন্তৰিক প্ৰচেষ্টা চলাই আহিছে। পুটিনৰ মতে এই প্ৰচেষ্টাই বিশ্বলৈ স্থায়ী শান্তি কঢ়িয়াই আনিব পাৰে।
