আমেৰিকাৰ ৰাষ্ট্ৰপতি ডনাল্ড ট্ৰাম্পৰ কন্যা টিফানি ট্ৰাম্প আৰু তেওঁৰ স্বামী মাইকেল ব‘লছে শেহতীয়াকৈ ভাৰত ভ্ৰমণলৈ আহিছে। এই ব্যক্তিগত ভ্ৰমণৰ সময়ত তেওঁলোকে নতুন দিল্লীৰ বিখ্যাত অক্ষৰধাম মন্দিৰ দৰ্শন কৰে। ছচিয়েল মিডিয়া প্লেটফৰ্ম এক্সত এটা পোষ্ট কৰি টিফানিয়ে এই মন্দিৰ দৰ্শনৰ অভিজ্ঞতাক অসাধাৰণ বুলি বৰ্ণনা কৰিছে। তেওঁৰ সৈতে স্বামী আৰু কেইজনমান বন্ধুৱেও এই সাংস্কৃতিক ভ্ৰমণৰ অংশ হিচাপে মন্দিৰটোত উপস্থিত থাকে।
নতুন দিল্লীৰ স্বামীনাৰায়ণ অক্ষৰধাম মন্দিৰ কৰ্তৃপক্ষয়ো এক্সত এই ভ্ৰমণৰ কথা নিশ্চিত কৰিছে। তেওঁলোকে পোষ্টটোত লিখিছে যে টিফানি ট্ৰাম্প, মাইকেল ব‘লছ আৰু তেওঁলোকৰ বন্ধুবৰ্গক মন্দিৰত আদৰণি জনাবলৈ পাই তেওঁলোক গৌৰৱান্বিত। এই দিনটো সংস্কৃতি আৰু ঐতিহ্যৰ বিষয়ে জানিবলৈ এক সুন্দৰ দিন আছিল বুলিও মন্দিৰ কৰ্তৃপক্ষই উল্লেখ কৰিছে। আনহাতে, ভাৰতত থকা আমেৰিকাৰ ৰাষ্ট্ৰদূত চাৰ্জিঅ’ গোৰেও এক্সযোগে দম্পতীহালক ভাৰতলৈ স্বাগতম জনাইছে।
টিফানি ট্ৰাম্প হৈছে আমেৰিকাৰ ৰাষ্ট্ৰপতি ডনাল্ড ট্ৰাম্প আৰু তেওঁৰ প্ৰাক্তন পত্নী মাৰ্লা মেপলছৰ চতুৰ্থ সন্তান। তেওঁৰ আন চাৰিজন ভাতৃ-ভগ্নী আছে। ২০২০ চনত তেওঁ জৰ্জটাউন ইউনিভাৰ্ছিটি ল চেণ্টাৰৰ পৰা আইনৰ ডিগ্ৰী লাভ কৰিছিল। আনহাতে, তেওঁৰ স্বামী মাইকেল ব‘লছ এজন আমেৰিকান-লেবানীজ ব্যৱসায়ী। ২০২২ চনৰ ১২ নৱেম্বৰত তেওঁলোকৰ বিবাহ সম্পন্ন হৈছিল।
ইফালে, আমেৰিকাৰ ৰাষ্ট্ৰপতি ডনাল্ড ট্ৰাম্পৰ স্বাস্থ্য সন্দৰ্ভতো এক নতুন খবৰ প্ৰকাশ পাইছে। ৰাষ্ট্ৰপতিগৰাকীৰ চিকিৎসক কেপ্তেইন শ্বন পি বাৰ্বাবেলাই শুকুৰবাৰে প্ৰকাশ কৰা এক প্ৰতিবেদন অনুসৰি ট্ৰাম্প সম্পূৰ্ণৰূপে সুস্থ আৰু সবল হৈ আছে। যোৱা ২৬ মে’ত ৱালটাৰ ৰিড নেচনেল মিলিটাৰী মেডিকেল চেণ্টাৰত তেওঁৰ বাৰ্ষিক স্বাস্থ্য পৰীক্ষা কৰোৱা হৈছিল, য‘ত ২২ জন বিশেষজ্ঞ চিকিৎসকো জড়িত আছিল। প্ৰতিবেদনত উল্লেখ কৰা হৈছে যে ৰাষ্ট্ৰপতিগৰাকীৰ শাৰীৰিক আৰু মানসিক অৱস্থা অতি উত্তম আৰু তেওঁ দেশৰ মুৰব্বী হিচাপে নিজৰ সকলো দায়িত্ব পালন কৰিবলৈ সম্পূৰ্ণৰূপে সক্ষম।
