ভাৰত আৰু আমেৰিকা যুক্তৰাষ্ট্ৰৰ মাজৰ সম্পৰ্ক অধিক দৃঢ় হৈ পৰিছে। আমেৰিকাৰ বৈদেশিক পৰিক্ৰমা দপ্তৰে ভাৰতৰ বাবে ৪২৮ মিলিয়ন আমেৰিকান ডলাৰতকৈও অধিক মূল্যৰ দুটা গুৰুত্বপূৰ্ণ সামৰিক সাহায্য চুক্তিৰ অনুমোদন জনাইছে। এই চুক্তিৰ অধীনত নতুন দিল্লীয়ে এপাচে এটাক হেলিকপ্টাৰ আৰু এম৭৭৭ আল্ট্ৰা-লাইট হাউইটজাৰ বৰটোপৰ বাবে দীৰ্ঘম্যাদী প্ৰতিৰক্ষা সাহায্য লাভ কৰিব।
এই অনুমোদন অনুসৰি, এএইচ-৬৪ই এপাচে হেলিকপ্টাৰৰ ৰক্ষণাবেক্ষণ সহায়কাৰী সেৱাৰ মূল্য প্ৰায় ১৯৮.২ মিলিয়ন আমেৰিকান ডলাৰ হ’ব। আনহাতে, এম৭৭৭এ২ আল্ট্ৰা-লাইট হাউইটজাৰৰ দীৰ্ঘম্যাদী সহায়ৰ বাবে আনুমানিক প্ৰায় ২৩০ মিলিয়ন আমেৰিকান ডলাৰ ধাৰ্য কৰা হৈছে।
আমেৰিকাৰ বৈদেশিক দপ্তৰে জনোৱা মতে, এপাচে পেকেজৰ বাবে মূল ঠিকাদাৰ হিচাপে বোয়িং আৰু লকহিড মাৰ্টিনে কাম কৰিব। আনহাতে এম৭৭৭ হাউইটজাৰ বৰটোপসমূহৰ সহায়কাৰী দায়িত্বত থাকিব বিএই চিষ্টেমছ। ভাৰতৰ অনুৰোধ মৰ্মে এপাচে পেকেজৰ বাবে আমেৰিকা চৰকাৰ আৰু ঠিকাদাৰ সংস্থাসমূহে ৰক্ষণাবেক্ষণ সাহায্য, ইঞ্জিনীয়াৰিং, কাৰিকৰী সহায়, তথ্য সৰবৰাহ, কৰ্মচাৰীৰ প্ৰশিক্ষণ আৰু অন্যান্য লজিষ্টিক সাহায্য আগবঢ়াব।
এম৭৭৭ হাউইটজাৰৰ বাবে প্ৰস্তাৱিত এই পেকেজত আনুষংগিক সঁজুলি, খুচুৰা যন্ত্ৰাংশ, মেৰামতি, প্ৰশিক্ষণ, কাৰিকৰী সাহায্য, ফিল্ড চাৰ্ভিচ প্ৰতিনিধি, ডিপো সক্ষমতা আৰু অতিৰিক্ত লজিষ্টিক সহায়ৰ দৰে অতি প্ৰয়োজনীয় প্ৰতিৰক্ষা সামগ্ৰী অন্তৰ্ভুক্ত কৰা হৈছে।
এই অনুমোদনৰ যুক্তি দৰ্শাই আমেৰিকাৰ বৈদেশিক দপ্তৰে কৈছে যে এই প্ৰস্তাৱিত বিক্ৰীয়ে ভাৰত আৰু আমেৰিকাৰ সম্পৰ্কক অধিক শক্তিশালী কৰিব। ইয়াৰ ফলত এক প্ৰধান প্ৰতিৰক্ষা অংশীদাৰ হিচাপে ভাৰতৰ নিৰাপত্তা উন্নত হ’ব আৰু আমেৰিকাৰ বৈদেশিক নীতি তথা ৰাষ্ট্ৰীয় নিৰাপত্তাৰ উদ্দেশ্য সফল হ’ব। দুয়োখন দেশে মিলি ভাৰত-প্ৰশান্ত মহাসাগৰীয় আৰু দক্ষিণ এছিয়া অঞ্চলত ৰাজনৈতিক স্থিৰতা, শান্তি আৰু অৰ্থনৈতিক প্ৰগতিৰ বাবে এক গুৰুত্বপূৰ্ণ শক্তি হিচাপে কাম কৰি আছে।
আমেৰিকাই লগতে উল্লেখ কৰিছে যে এই পদক্ষেপে বৰ্তমান আৰু ভৱিষ্যতৰ ভাবুকি মোকাবিলা কৰাত ভাৰতৰ ক্ষমতা বৃদ্ধি কৰিব, দেশৰ প্ৰতিৰক্ষা ব্যৱস্থা উন্নত কৰিব আৰু আঞ্চলিক ভাবুকিৰ বিৰুদ্ধে প্ৰতিৰোধ ব্যৱস্থা শক্তিশালী কৰিব। ভাৰতৰ প্ৰতিৰক্ষা প্ৰস্তুতিৰ ওপৰত আলোকপাত কৰি আমেৰিকাই কৈছে যে ভাৰতীয় সশস্ত্ৰ বাহিনীয়ে এই সামগ্ৰী আৰু সেৱাসমূহ নিজৰ বাহিনীত অন্তৰ্ভুক্ত কৰাত কোনো অসুবিধাৰ সৃষ্টি নহ’ব।
উল্লেখ কৰিব পাৰি যে বোয়িং এএইচ-৬৪ এপাচে হেলিকপ্টাৰক বিশ্বৰ অন্যতম আধুনিক বহুমুখী যুদ্ধ হেলিকপ্টাৰ বুলি গণ্য কৰা হয়। ৩০ মিলিমিটাৰ চেইন গান, হেলফায়াৰ এণ্টি-টেংক মিছাইল আৰু হাইড্ৰা ৰকেটেৰে সুসজ্জিত এই হেলিকপ্টাৰখনত লংবো ৰাডাৰ আৰু নাইট-ভিছন চেন্সৰ আদিকে ধৰি অত্যাধুনিক টার্গেটিং প্ৰযুক্তি সংলগ্ন হৈ আছে।
