সহজতে ধন লাভৰ উপাই বিচাৰি হাবাথুৰি খাইছে নেকি? আপোনাৰ সমুখত আছে এক সহজ পন্থা। এই পন্থা অৱলম্বন কৰি আপুনি মুহূৰ্তৰ ভিতৰতে লাভ কৰিব ৪ লক্ষাধিক টকা। এই ধনৰাশি লাভৰ বাবে আপুনি বিশেষ কষ্টও কৰিব নালাগে, মাত্ৰ বিচাৰি দিব লাগে এগৰাকী বিবাহযোগ্য ব্যক্তি।
এই কাম কৰিলেই আপুনি মুহূৰ্ততে হ’ব লাখপতি। এই বিশেষ ‘বিগ অফাৰ’ আগবঢ়াইছে এগৰাকী যুৱতী। অবিবাহিত যুৱতীগৰাকীয়ে নিজৰ সংগীবিহীন অকলশৰীয়া জীৱনত বিৰক্ত হৈ তেওঁৰ বাবে স্বামী বিচাৰি দিলে ৫০০০ ডলাৰ, ভাৰতীয় টকাৰ হিচাপত ৪,১০,৪৬২ টকা পুৰস্কাৰৰ প্ৰস্তাৱ আগবঢ়াইছে।
সংসাৰ তৰাৰ মন কৰা এই যুৱতীগৰাকী হৈছে আমেৰিকাৰ লছ এঞ্জেলছৰ বাসিন্দা। ৩৫ বছৰীয়া যুৱতীগৰাকীৰ নাম ইভ টিলি-ক’লছন, পেছাত আইনজীৱি। নিজৰ সামাজিক মাধ্যম একাউণ্টত ক’লছনে এটা ভিডিঅ’ পোষ্ট কৰিছে।
এই ভিডিঅ’টোত তেওঁ অনলাইন বন্ধুগণক তেওঁৰ সম্ভাৱ্য জীৱন সংগীৰ সৈতে সংযোগ কৰাত সহায় কৰিবলৈ আহ্বান জনায়। ক’লছনৰ ভাষ্য মতে, তেওঁ পূৰ্বেও বন্ধু-বান্ধৱীৰ সৈতে এই চুক্তি কৰিছিল যদিও এতিয়া সমজুৱাকৈ এই চুক্তি মুকলি কৰিবলৈ সাজু হৈছে।
ভিডিঅ’টোত তেওঁ কয়, ‘’যদি আপুনি মোক মোৰ স্বামীৰ লগত চিনাকি কৰাই দিয়ে আৰু মই তেওঁক বিয়া কৰাওঁ, তেন্তে মই আপোনাক ৫ হাজাৰ ডলাৰ দিম।” অৱশ্যে এই সংগীৰ সৈতে দীৰ্ঘদিন সম্পৰ্কত থাকিব লাগিব বুলিও ধৰা-বন্ধা চুক্তি কৰা নাই ক’লছনে।
প্ৰায় পাঁচ বছৰ ধৰি অবিবাহিত হৈ থাকি তথা ডেটিঙত ভাগৰি পৰা বুলি উল্লেখ কৰি ক’লছনে লগতে ব্যক্তিগতভাৱে আৰু ডেটিং এপত সংগী বাচনিৰ চেষ্টা কৰি বিফল হোৱা বুলিও জানিবলৈ দিয়ে।
তেওঁৰ প্ৰয়োজনীয়তা পূৰণ কৰা আৰু প্ৰকৃত সম্পৰ্কৰ বাবে সাজু হোৱা সংগীগৰাকীৰ বাবে ৫০০০ ডলাৰ সঠিক বুলি মন্তব্য কৰে ক’লছনে। সম্ভাৱ্য স্বামীৰ কিছু নিৰ্দিষ্ট গুণৰ কথাও তেওঁ উল্লেখ কৰিছে। ক’লছনে কয় যে তেওঁ এনে এগৰাকী পুৰুষ বিচাৰিছে, যিজন ২৭-৪০ বছৰ বয়সৰ, ৫ ফুট ১১ ইঞ্চি বা তাতকৈ ওখ।
৫ ফুট ১০ ইঞ্চি উচ্চতাৰ ক’লছনে এই উচ্চতাৰ বাবে পূৰ্বে ডেটিং কৰা আন পুৰুষৰ পৰা লাভ কৰা কিছু বিৰক্তিকৰ অভিজ্ঞতাৰ কথাও উল্লেখ কৰে। তেনে কোনো সংগীয়ে ক’লছনক হিল পৰিধান কৰাত বাধা দিয়াৰ বাবে তেওঁৰ মন ভাগি পৰা বুলি জানিবলৈ দিয়ে।
সম্ভাৱ্য জীৱনসংগীৰ আন গুণৰ ভিতৰত আছে হাস্যৰস থাকিব লাগিব, ক্ৰীড়া, জীৱ-জন্তু আৰু সৰু ল’ৰা-ছোৱালী ভাল পাব লাগিব। দীৰ্ঘ দূৰত্বৰ সম্পৰ্কত থাকিবলৈও তেওঁ সন্মতি প্ৰকাশ কৰিছে। কিন্তু পুৰুষগৰাকীয়ে ড্ৰাগছ সেৱন কৰিব নোৱাৰিব বুলি তেওঁ চৰ্ত দিয়ে।
আনহাতে ৰাজনৈতিক মতামত, ধৰ্মীয় বিশ্বাস আৰু জাতিগততা সম্পৰ্ক গঢ়াত বাধা দিব পৰা কোনো উপলক্ষ নহয় বুলি ক’লছনে উল্লেখ কৰে। বিবাহৰ প্ৰমাণ পত্ৰত চহী হোৱাৰ লগে লগেই নিৰ্দিষ্ট ধনৰাশি প্ৰদান কৰাৰ প্ৰতিশ্ৰুতি দিছে ক’লছনে।
