আমেৰিকাৰ ৰাষ্ট্ৰপতি ড’নাল্ড ট্ৰাম্পে বুধবাৰে টুইটাৰযোগে ভাৰতৰ প্ৰধান মন্ত্ৰী নৰেন্দ্ৰ মোদী আৰু ভাৰতীয় জনসাধাৰণৰ প্ৰতি কৃতজ্ঞতা জ্ঞাপন কৰি প্ৰশংসা কৰে।
ভাৰত চৰকাৰে আমেৰিকাৰ বৰ্তমান সংকটৰ সময়ত হাইড্ৰ’ক্সিক্লৰ’কুইন যোগান ধৰিবৰ বাবে লোৱা সিদ্ধান্তৰ পাছতে ট্ৰাম্পে মোদী চৰকাৰ আৰু ভাৰতীয় জনসাধাৰণক কৃতজ্ঞতা জ্ঞাপন কৰে।
ক’ৰ’না মহামাৰীৰ সৈতে যুদ্ধৰ ক্ষেত্ৰত আমেৰিকাৰ ৰাষ্ট্ৰপতি গৰাকীয়ে হাইড্ৰ’ক্সিক্লৰ’কুইন নামৰ মেলেৰিয়া প্ৰতিৰোধী ঔষধ বিধক খেল সলনি কৰিব পৰা ঔষধ হিচাপে অভিহিত কৰিছিল।
উল্লেখযোগ্য যে, ভাৰত চৰকাৰে জীৱন দায়িনী ঔষধৰ ৰপ্তানি বন্ধ কৰি থোৱাৰ পাছতে ট্ৰাম্পে ভাৰতক ভাবুকি প্ৰদান কৰিছিল আৰু ইয়াৰ পাছতে ভাৰতত ট্ৰাম্পক চোঁকা সমালোচনা কৰা হৈছিল।
আনহাতে, ট্ৰাম্পৰ ভাবুকিৰ পাছত ভাৰতেও আমেৰিকাৰ লগতে আন কিছু সংখ্যক দেশক হাইড্ৰ’ক্সিক্লৰ’কুইন যোগান ধৰাৰ সিদ্ধান্ত গ্ৰহণ কৰিছিল।
ভাৰত চৰকাৰৰ প্ৰত্যুত্তৰৰ ২৪ ঘণ্টাৰ ভিতৰত ট্ৰাম্পৰ সুৰ সলনি হৈছিল আৰু বুধবাৰে টুইটাৰত ট্ৰাম্পে ভাৰতক প্ৰশংসা কৰে।
‘‘বন্ধুত্বৰ বাবে বিশেষ সময়ৰ প্ৰয়োজন। হাইড্ৰ’ক্সিক্লৰ’কুইনৰ ক্ষেত্ৰত লোৱা সিদ্ধান্তৰ বাবে ধন্যবাদ ভাৰত আৰু ভাৰতীয় জনতা। আমি নাপাহৰো! কেবল মাত্ৰ ভাৰতৰ বাবে নহয় সমগ্ৰ মানৱ জাতিক সহায়ৰ বাবে প্ৰধান মন্ত্ৰী নৰেন্দ্ৰ মোদীৰ নেতৃত্বক ধন্যবাদ,’’ ড’নাল্ড ট্ৰাম্পে টুইটাৰত এনেদৰে লিখে।
ভাৰতে আমেৰিকাৰ লগতে ব্ৰাজিলৰ ৰাষ্ট্ৰপতিৰ আহ্বান মৰ্মে ব্ৰাজিললৈও হাইড্ৰ’ক্সিক্লৰ’কুইন যোগান ধৰাৰ সিদ্ধান্ত গ্ৰহণ কৰিছে।
ভাৰতৰ এই সিদ্ধান্তৰ পাছতে ভাৰতক আন্তৰিক কৃতজ্ঞতা জ্ঞাপন কৰিছে ব্ৰাজিলৰ ৰাষ্ট্ৰপতি জেইৰ ব’লচোনাৰোৱে।
বুধবাৰে ব্ৰাজিলৰ ৰাষ্ট্ৰপতি গৰাকীয়ে ৰামায়ণৰ হনুমানে হিমালয়ৰ পৰা সঞ্জীৱনি ঔষধ অনাৰ উদাহৰণ দি ভাৰতৰ পৰা হাইড্ৰক্সিক্লৰ’কুইন বিচাৰিছিল।