বিশ্বনাথৰ উপায়ুক্ত ধ্ৰুৱজ্যোতি দাসে জিলাখনৰ সকলো চৰকাৰী কাৰ্য্যালয়তে অসমীয়া ভাষা ব্যৱহাৰ কৰিবলৈ শেহতীয়াকৈ হুকুম জাৰি কৰিছে।
হুকুমটোমতে, জিলাখনৰ সকলো চৰকাৰী কাৰ্য্যালয়ৰ সকলো কাম-কাজ যেনে আৱেদন, টোকা, আদেশ, অধিসূচনা আদিত যথাসম্ভৱ অসমীয়া ব্যৱহাৰ কৰিবলৈ কোৱা হৈছে।
“এই আদেশ সংশ্লিষ্ট সকলোকে জনোৱা হওক আৰু তৎকালে বলবৎ কৰা হওক,” হুকুমটোত কোৱা হৈছে।
অসম চৰকাৰী ভাষা আইন, ১৯৬০ৰ ৩০নং ধাৰা অনুসৰি যোৱা ৪ জানুৱাৰিত এই হুকুম (বি এন পি ৯২/২০১৯/৩৭) জাৰি কৰা হৈছে।
অসমত চলিত নাগৰিকত্ব (সংশোধন) আইন ২০১৯বিৰোধী প্ৰতিবাদত “অসমীয়া” ভাষাৰ প্ৰতি ভাবুকিধৰণৰ শ্ল’গানৰ মাজতে শেহতীয়াকৈ কেইবাখনো আন জিলাতো সদৃশ হুকুম জাৰি কৰা হৈছে।
