কৰ’না ভাইৰাছৰ সংক্ৰমণ প্ৰতিৰোধ কৰাৰ বাবে সামাজিক দূৰত্ব বজাই ৰখাটোৱে হৈছে আটাইতকৈ গুৰুত্বপূৰ্ণ বিষয়। ইয়াৰ বাবেই চৰকাৰে লকডাউনো ঘোষণা কৰিছে।
কিন্তু লকডাউনক উপেক্ষা কৰি এতিয়াও বহু লোক বাহিৰলৈ ওলাই আহিছে আৰু কৰ’নাৰ সংক্ৰমণৰ সম্ভাৱনা বৃদ্ধি কৰিছে।
ইপিনে, আৰক্ষী প্ৰশাসনে লকডাউন সফল কৰি তোলাৰ বাবে এনেদৰে বিনা কাৰণে ওলাই অহা লোকৰ ওপৰত ব্যৱস্থা গ্ৰহণ কৰিবলৈ বাধ্য হৈছে।
এনে এক সময়তে নিজৰ সুৰক্ষাৰ প্ৰতি লক্ষ্য ৰাখি উত্তৰ প্ৰদেশৰ এজন লোকে গছৰ ওপৰতেই অস্থায়ী ঘৰ সাজি লৈছে। কৰ’নাৰ সংক্ৰমণৰ শংকা দূৰ নোহোৱালৈকে গছৰ ডালতেই বাস কৰাৰ সিদ্ধান্ত লৈছে লোকজনে।
উত্তৰ প্ৰদেশৰ হাপুৰৰ অছোধাৰ বাসিন্দা মুকুল ত্যাগীয়ে লকডাউনৰ সময়ত বাহিৰলৈ ওলাই যোৱাটো পছন্দ নকৰে।
কিন্তু নিজকে সুৰক্ষিত ৰখাৰ তাগিদা অনুভৱ কৰি ত্যাগীয়ে নিশাৰ ভিতৰতে গছৰ ডালত ঘৰ এটা বনোৱাৰ সিদ্ধান্ত লয়।
ত্যাগীয়ে অলপ কাঠ, গছৰ ডাল যোগাৰ কৰি গছৰ ওপৰতে ভালকৈ পাৰি লৈ তেওঁৰ ঘৰটো সজাই তোলে। গছৰ পৰা ওলমি থকা এখন দোলনাও সাজি লৈছে তেওঁ আৰু কেতিয়াবা সেই দোলনাত আৰাম কৰিছে।
মুকুল ত্যাগীয়ে তেওঁৰ এই অস্থায়ী ঘৰলৈ কিছু কিতাপ পত্ৰও লৈ গৈছে। লকডাউনৰ এই দীঘলীয়া জিৰণিৰ সময়ত মানসিক খোৰাক দিব পৰা এক আহিলা কিতাপ।
পৰিয়ালৰ লোকে সময়ত গছৰ তললৈ আহি তেওঁক খোৱাবস্তু যোগান ধৰিছে। এনেদৰেই দিন কটাইছে ত্যাগীয়ে।
মুকুল ত্যাগীয়ে তেওঁৰ এই অভিনৱ পন্থাৰ বিষয়ে কয়,’’আমাৰ সকলোৰে ভালৰ বাবেই সামাজিক দূৰত্ব বজাই ৰাখিবলৈ কোৱা হৈছে। কিন্তু বহুতেই সেই কথা শুনা নাই। মই এই সময়ত সামাজিক দূৰত্ব বজাই ৰখাৰ পক্ষত। সেয়েহে গছৰ ওপৰতেই ঘৰ কৰিছো। এয়া এক সুকীয়া অভিজ্ঞতা আৰু মোৰ ভালেই লাগিছে।‘’
গছৰ ওপৰত ত্যাগীৰ এই ঘৰ সজা কামত তেওঁক সহায় কৰিছে পুত্ৰই। গছৰ শুকান ডাল-পাত আদি যোগাৰ কৰি দিছে পুত্ৰই।
ইতিমধ্যেই এই বৃক্ষগৃহৰ গৰাকীৰ ছবি ইন্টাৰনেটৰ জৰিয়তে ভাইৰেল হৈ পৰিছে। সামাজিক দূৰত্ব বজাই ৰখাৰ গুৰুত্ব দাঙি ধৰি মুকুল ত্যাগীয়ে সমাজলৈ যেন এক বাৰ্তাহে প্ৰেৰণ কৰিছে।
