হিন্দু ধৰ্মাৱলম্বীসকলৰ পবিত্ৰ তীৰ্থস্থান কেদাৰনাথ দৰ্শনৰ বাবে যোৱাৰ পথতে এক ভয়ংকৰ পৰিস্থিতিৰ সন্মুখীন হৈছে বহু তীৰ্থযাত্ৰী। আজি কেদাৰনাথ সংযোগী যাত্ৰাপথত যোৱা ভয়াৱহ ভূমিস্খলনে তীৰ্থভ্ৰমণকাৰী সকলৰ মাজত সৃষ্টি কৰিছে তীব্ৰ আতংকৰ।
এই ভূমিস্খলননৰ ফলত প্ৰায় ১২ গৰাকী যাত্ৰী আবদ্ধ হৈ থকা বুলি সন্দেহ কৰা হৈছে। প্ৰকাশিত খবৰ অনুসৰি, উত্তৰাখণ্ডৰ ৰুদ্ৰপ্ৰয়াগ জিলাৰ কেদাৰনাথ যাত্ৰাৰ পথত গৌৰীকুণ্ডা অঞ্চলত এই ভূমিস্খলন সংঘটিত হয়। ইতিমধ্যে ভূমিস্খলন স্থলীত উদ্ধাৰ অভিযান আৰম্ভ হৈছে।
ৰাষ্ট্ৰীয় দুৰ্যোগ সঁহাৰি বাহিনীয়ে অব্যাহত ৰাখিছে উদ্ধাৰ অভিযান। ৰুদ্ৰপ্ৰয়াগ দুৰ্যোগ ব্যৱস্থাপনা বিভাগৰ এক আনুষ্ঠানিক সূত্ৰৰ মতে, ভূমিস্খলনৰ ফলত ১০ৰ পৰা ১২ গৰাকী কেদাৰনাথ যাত্ৰী খহি পৰা মাটিৰ তলত সোমাই পৰা বুলি আশংকা কৰা হৈছে।
এই ঘটনাত অঞ্চলটোৰ কেইখনমান দোকানৰো ক্ষতিসাধন হয়। যোৱা ২৪ ঘন্টাত গৌৰীকুণ্ডা অঞ্চলত হোৱা প্ৰবল বৰষুণৰ বাবেই এই ভয়ংকৰ ভূমিস্খলনৰ সূত্ৰপাত হয় বুলি সন্দেহ কৰা হৈছে।
ঘটনা সন্দৰ্ভত ৰুদ্ৰপায়াগৰ আৰক্ষী অধীক্ষকগৰাকীয়ে প্ৰতিক্ৰিয়া প্ৰকাশ কৰি কয় যে নিৰুদ্দিষ্ট যাত্ৰীসকলৰ সন্ধান উলিয়াবলৈ তীব্ৰতৰ অভিযান চলোৱা হৈছে। দুৰ্যোগ ব্যৱস্থাপনা বিভাগৰ এগৰাকী উচ্চপদস্থ বিষয়াৰ নেতৃত্বত উদ্ধাৰ অভিযান চলোৱা হৈছে বুলি তেওঁ লগতে সদৰী কৰে।
লগতে পঢ়কঃ কৃষিমন্ত্ৰী অতুল বৰাই অসমত কৰিব খুজিছে কেইবাখনো দেশে নিষিদ্ধ কৰা পাম খেতি
লগতে পঢ়কঃ ‘মই নিৰ্দোষী’, ভাৰতীয় মূলৰ ন্যায়াধীশৰ সন্মুখত দাবী অসহায় ট্ৰাম্পৰ!
