সমগ্ৰ দেশৰ লগতে অসমতেো আৰম্ভ হৈছে ঘৰে ঘৰে কোভিড ভেকচিন প্ৰদানৰ কাৰ্যসূচী।
এই কাৰ্যসূচীলৈ ৰাজ্যৰ বহু লোকে সঁহাৰি জনাইছে যদিও বহুতে আকৌ স্বাস্থ্য কৰ্মী, প্ৰশাসনৰ লোকক দেখিলেই দূৰতে বিদূৰ হোৱাৰো চেষ্টা চলাইছে।
বিগত কেইটামান দিনত সেয়ে ভেকচিন গ্ৰহণকলৈ ৰাজ্যৰ বিভিন্ন স্থানত সৃষ্টি হোৱা কেতবোৰ বিশেষ ঘটনাই ছ’চিয়েল মিডিয়াৰ লগতে টেলিভিছন আৰু আন সংবাদ মাধ্যমত বহুতোকে হাঁহিৰ খোৰাক যোগাইছে।
যিকিনঙঁক ভেকচিনৰ প্ৰতি ভয় যে কেৱল সমাজৰ একাংশ অশিক্ষিত লোকৰ মাজতেই আছে তেনে নহয়, বহু শিক্ষিত লোকেও আনকি ভেকচিন বুলি ক’লেই সাত জাঁপ মৰা দেখিবলৈ পোৱা গৈছে।
অন্ধ বিশ্বাসেই নহওঁক বা আন কোনো কাৰণতেই হওঁক কোভিডৰ ভেকচিন ল’বলৈ বহুতেই থেৰো-গেৰো কৰি থকা কথাই সম্পূৰ্ণ ভেকচিন প্ৰদান প্ৰক্ৰিয়াত যে বিৰূপ প্ৰভাৱ পেলাব সেয়া ধুৰূপ।
কিন্তু যি ভেকচিনক ল’বলৈ বহুতে ভয় কৰি আছে আছে তেওঁলোকৰ বহুতেই হয়তো নাজানে যে বিশ্বৰ গৰিষ্ঠ সংখ্যক লোকে ভাৰতত প্ৰস্তুত কৰা ভেকচিনেই গ্ৰহণ কৰি আছে।
তেওঁলোকৰ মাজৰে কোনো লোকৰেই ভেকচিন লোৱাৰ পিছত ক্ষতি হোৱাৰ তথ্য আজিলৈকে পোৱা হোৱা নাই। বিশ্বৰ কোভিড ভেকচিনৰ ৭০ শতাংশই যোগান ধৰি আহিছে ভাৰতে।
সংসদৰ মজিয়াত এই তথ্য সদৰী কৰিছে কেন্দ্ৰীয় স্বাস্থ্যমন্ত্ৰী মনসুখ মাণ্ডৱ্যই।
ক’ৰ’না অতিমাৰী বিষয়ক প্ৰশ্নৰ উত্তৰ দি লোকসভাত কেন্দ্ৰীয় স্বাস্থ্যমন্ত্ৰীগৰাকীয়ে কয় যে ভাৰতীয় বিজ্ঞানীসকলে কোভিডৰ দুবিধ ভেকচিন ক্ৰমে কোভাক্সিন আৰু জাইকোভি-ডি সম্পূৰ্ণ থলুৱা প্ৰযুক্তি ব্যৱহাৰ কৰি উদ্ভাৱন কৰি উলিয়াবলৈ সক্ষম হৈছে।
তেওঁ কয় যে কোভিডৰ পূৰ্বে ভাৰতে বিদেশৰ পৰা এন-৯৫ মাস্ককে ধৰি পিপিএ কিট,ভেণ্টিলেটৰ আদি আমদানি কৰিবলগীয়া হৈছিল।কিন্তু এতিয়া ভাৰতে এনেবোৰ সামগ্ৰী বিদেশলৈ ৰপ্তানি কৰিব পৰা হৈছে।
কেন্দ্ৰীয় স্বাস্থ্যমন্ত্ৰীগৰাকীয়ে লগতে জানিবলৈ দিয়ে যে ২০২১ চনৰ ১১ এপ্ৰিললৈকে ভাৰতৰ ২০ টা প্ৰকল্পত এমাহতে ৩০,০০০ ৰেমডিছিভিৰ ইঞ্জেকছন প্ৰস্তুত কৰা হৈছিল। এনে প্ৰকল্পৰ সংখ্যা পূৰ্বৰ ২০ টাৰ ঠাইত ৬০ টা কৰাৰ পিছতে এমাহত ৰেমডিছিভিৰ ইঞ্জেকছনৰ উৎপাদন ১০ নিযুতলৈ বৃদ্ধি পাইছে।
দেশৰ বিভিন্ন প্ৰান্ত ১,২২৫ টা অক্সিজেন প্লেণ্ট স্থাপন কৰা হৈছে। সম্প্ৰতি নতুনকৈ ৮২৯ টা অক্সিজেন প্লেণ্ট স্থাপনৰ কাম চলি আছে বুলি তেওঁ মন্তব্য কৰে।