ক্ৰিকেট অনুৰাগীসকলে এতিয়া অহা বছৰৰ ৭ ফেব্ৰুৱাৰীৰ পৰা আৰম্ভ হ’বলগীয়া টি-২০ বিশ্বকাপৰ বাবে উন্মুখ। কিন্তু তাৰ পূৰ্বে ক্ৰিকেট প্ৰেমীসকলৰ বাবে অপেক্ষা কৰি আছে আন এখন ৰোমাঞ্চকৰ প্ৰতিযোগিতা – আইচিচি ১৯ বছৰ অনুৰ্ধ বিশ্বকাপ। এই প্ৰতিযোগিতাখনক লৈ ইতিমধ্যে উত্তেজনা তুংগত কিয়নো ভাৰতীয় দল ঘোষণা কৰা হৈছে।
শনিবাৰে (২৭ ছেপ্টেম্বৰ) ১৫ জনীয়া দলটো আনুষ্ঠানিকভাৱে ঘোষণা কৰে বিচিচিআইয়ে। এই তালিকাত আছে প্ৰতিভাৱান ১৪ বছৰীয়া বেটছমেন বৈভৱ সূৰ্য্যবংশী, যাক লৈ ভাৰতীয় ক্ৰিকেটে ভৱিষ্যতৰ সপোন দেখিছে। পূৰ্বৰ সংস্কৰণত নেতৃত্ব দি দৃষ্টি আকৰ্ষণ কৰা অভিজ্ঞ আয়ুষ মাত্ৰেকে পুনৰ দলটোৰ নেতৃত্ব দিছে।
অহা ১৫ জানুৱাৰীত আমেৰিকাৰ বিৰুদ্ধে গ্ৰুপ পৰ্যায়ৰ খেলৰ জৰিয়তে টিম ইণ্ডিয়াই বিশ্বকাপৰ অভিযান আৰম্ভ কৰিব। বুলাৱায়োৰ কুইনছ স্প’ৰ্টছ ক্লাবত অনুষ্ঠিত হ’ব এই খেলখন। ইয়াৰ পিছত ১৭ জানুৱাৰীত একেটা স্থানতে বাংলাদেশৰ বিৰুদ্ধে খেলিব, আৰু ২৪ জানুৱাৰীত শক্তিশালী নিউজিলেণ্ডৰ বিৰুদ্ধে খেলিব।
এইবাৰৰ বিশ্বকাপ জিম্বাবুৱে আৰু নামিবিয়াত অনুষ্ঠিত হ’ব। ১৫ জানুৱাৰীৰ পৰা আৰম্ভ হ’বলগীয়া এই প্ৰতিযোগিতাখন ৬ ফেব্ৰুৱাৰীলৈকে চলিব। মুঠ ১৬টা দলে অংশগ্ৰহণ কৰিব, যিটো চাৰিটা গ্ৰুপত বিভক্ত হ’ব। গ্ৰুপ পৰ্যায়ৰ পাছত ছুপাৰ ছয় ৰাউণ্ড, তাৰ পিছত ছেমি ফাইনেল আৰু ফাইনেল অনুষ্ঠিত হ’ব। হাৰাৰেত অনুষ্ঠিত হ’ব চূড়ান্ত মেচ, য’ত নতুন চেম্পিয়নৰ সিদ্ধান্ত লোৱা হ’ব।
ভাৰতীয় দলটোৱে ১৯ বছৰ অনুৰ্ধৰ বিশ্বকাপ পাঁচবাৰ – ২০০০, ২০০৮, ২০১২, ২০১৮ আৰু শেষবাৰৰ বাবে ২০২২ চনত জয়ী হৈছে। সেয়ে তেওঁলোকে পুনৰবাৰ এই প্ৰতিযোগিতাত প্ৰৱেশ কৰিছে অন্যতম ফেভাৰিট হিচাপে। গ্ৰুপ ‘বি’ত ভাৰতৰ প্ৰতিদ্বন্দ্বী হ’ল নিউজিলেণ্ড, আমেৰিকা আৰু বাংলাদেশ। প্ৰতিখন মেচ গুৰুত্বপূৰ্ণ হ’ব, কাৰণ ইয়াৰ দ্বাৰা ছুপাৰ ছিক্সৰ পথ নিৰ্ধাৰণ কৰা হ’ব।
বিশ্বকাপৰ পূৰ্বে ভাৰতীয় ১৯ বছৰ অনুৰ্ধ দলে দক্ষিণ আফ্ৰিকা ভ্ৰমণ কৰিব। তাত বেন’নিত তিনিখন এদিনীয়া শৃংখলা খেলিব। এই ছিৰিজটোক প্ৰস্তুতি হিচাপে দেখা গৈছে, য’ত যুৱ ক্ৰিকেটাৰসকলে নিজৰ ছন্দ বিচাৰি উলিওৱাৰ সুযোগ পাব। কিন্তু এই ভ্ৰমণৰ আটাইতকৈ ডাঙৰ কথাটো হ’ল ভাৰতীয় দলটোৰ নেতৃত্ব দিব ১৪ বছৰীয়া বৈভৱে। এই যুৱ ক্ৰিকেটাৰগৰাকীক ডাঙৰ দায়িত্ব দিয়া হৈছে।
মুঠতে অহা বছৰৰ আৰম্ভণি ভাৰতীয় ক্ৰিকেট অনুৰাগীৰ বাবে এক উৎসৱৰ দৰে হ’ব। প্ৰথমে ১৯ বছৰ অনুৰ্ধ বিশ্বকাপ, তাৰ পিছত টি-২০ বিশ্বকাপ – দুয়োটা ইভেণ্টেই যুৱ আৰু জ্যেষ্ঠ ক্ৰিকেটাৰসকলৰ বাবে নতুন ইতিহাস ৰচনাৰ প্লেটফৰ্ম হ’ব পাৰে।
ভাৰতৰ ১৯ বছৰ অনুৰ্ধ বিশ্বকাপ দল (২০২৬):
আয়ুষ মাত্ৰে (অধিনায়ক), বিহান মালহোত্ৰা (উপ অধিনায়ক), বৈভৱ সূৰ্যবংশী, এৰন জৰ্জ, বেদান্ত ত্ৰিবেদী, অভিজ্ঞ কুণ্ডু (উইকেটকীপাৰ), হৰবংশ সিং (উইকেটকীপাৰ), আৰ এছ অম্বৰীশ, কনিষ্ক চৌহান, খিলান এ পেটেল, মহম্মদ এনান, হেনিল পেটেল, দীপেশ, কিষান কুমাৰ সিং, উদ্ভৱ মোহন।
দক্ষিণ আফ্ৰিকা ভ্ৰমণ দল:
বৈভৱ সূৰ্যবংশী (অধিনায়ক), এৰন জৰ্জ (উপ অধিনায়ক), বেদান্ত ত্ৰিবেদী, অভিজ্ঞ কুণ্ডু (উইকেটকীপাৰ), হৰবংশ সিং (উইকেটকীপাৰ), আৰ এছ অম্বৰীশ, কনিষ্ক চৌহান, খিলান এ পেটেল, মহম্মদ এনান, হেনিল পেটেল, ডি দীপেশ, কিষান কুমাৰ সিং, উদ্ভৱ মোহন, যুৱৰাজ গোহিল, ৰাহুল কুমাৰ।
আয়ুষ মাত্ৰে আৰু বিহান মালহোত্ৰাই হাতৰ গাঁঠিৰ আঘাতৰ বাবে দক্ষিণ আফ্ৰিকা ভ্ৰমণত অংশ ল’ব নোৱাৰিব। তেওঁলোকে বিচিচিআই চেণ্টাৰ অৱ এক্সেলেন্সত চিকিৎসাৰ বাবে ৰিপৰ্ট দিব আৰু পোনপটীয়াকৈ বিশ্বকাপ দলত যোগদান কৰিব।
