ৰাজ্য চৰকাৰে ধুবুৰী জিলাৰ চাপৰকে ধৰি ১১খন জিলাত নতুনকৈ বিলাতী সুৰাৰ বিপণী অৰ্থাৎ ৱাইন শ্বপ খোলাৰ অনুমতি দিবলৈ ওলোৱাত তীব্ৰ প্ৰতিক্ৰিয়াৰ সৃষ্টি হৈছে৷
উল্লেখযোগ্য যে অসমৰ প্ৰাক্তন মুখ্যমন্ত্ৰী তথা মূল্যবোধৰ ৰাজনীতিৰ মহীৰূহ স্বৰূপ জননেতা শৰৎ চন্দ্ৰ সিংহই তেওঁৰ জন্মনগৰী চাপৰত যাতে কোনোদিনে বিলাতী সুৰাৰ বিপনী স্থাপন কৰা নহয় তাৰবাবে নগৰ সমিতি গঠনৰ সময়তে ১৯৮৯ চনতে ৰাজহুৱাভাৱে চাপৰ নগৰ সমিতিক আহ্বান জনাইছিল।
সেইসময়তে চাপৰৰ সিংহপুৰুষ সদৃশ প্ৰয়াত ডালিম কুমাৰ মেধিকে ধৰি একাংশ সমাজসেৱকেও চাপৰ নগৰ সমিতিত এই সন্দৰ্ভত এখন আবেদনো দাখিল কৰিছিল।
পৰৱৰ্তী সময়ত ২০০৩ চনতো চাপৰ উন্নয়ন সমিতিৰ তৎকালীন সাধাৰণ সম্পাদক জাহান উদ্দিন আহমেদেও চাপৰ নগৰ সমিতিত এই সন্দৰ্ভত আন এখন আবেদন দাখিল কৰিছিল।
জননেতাগৰাকীৰ আহ্বানৰ প্ৰতি সন্মান জনাই চাপৰ নগৰ সমিতিয়ে আজিলৈকে চাপৰ নগৰত বিলাতী সুৰাৰ বিপনী স্থাপনৰ অনুমতি দিয়া নাছিল।
কিন্তু মন্ত্ৰী পৰিমল শুক্লবৈদ্যৰ নেতৃত্বাধীন আবকাৰী বিভাগে বিগত ২৫ অক্টোবৰতে ই এক্স-১৪৫/২০১৭/৮৭ নম্বৰ নিৰ্দেশনাযোগে অসমৰ ১১খন জিলাৰ ২০টা স্থানৰ লগতে চাপৰতো ৱাইন শ্বপ খোলাৰ অনুমতি প্ৰদান কৰাত চাপৰত তীব্ৰ প্ৰতিক্ৰিয়াৰ সৃষ্টি হৈছে।
জননেতা শৰৎ চন্দ্ৰ সিংহৰ আদৰ্শক পদানত কৰি চাপৰত যাতে বিলাতী সুৰাৰ বিপনী স্থাপনৰ অনুমতি প্ৰদান কৰা নহয় তাৰবাবে আজি দুপৰীয়া বিলাসীপাৰা মহকুমা ছাত্ৰ সন্থা, চাপৰ আঞ্চলিক ছাত্ৰ সন্থা, আক্ৰাছুৰ চাপৰ আঞ্চলিক,ফলিমাৰী আঞ্চলিক, বহলপুৰ আঞ্চলিক,কলিতা জনগোষ্ঠীয় সন্মিলন, অসমৰ অবিভক্ত গোৱালপাৰা জিলা সমিতি,সদৌ অসম গৰিয়া-মৰিয়া-দেশী জাতীয় পৰিষদৰ চাপৰ আঞ্চলিক, আমছুৰ চাপৰ আঞ্চলিক আৰু চাপৰ উন্নয়ন সমিতিয়ে চাপৰৰ চক্ৰ বিষয়া শান্তনু গগৈৰ জৰিয়তে পৃথকে পৃথকে অসমৰ মুখ্যমন্ত্ৰী, ধুবুৰী জিলাৰ উপায়ুক্ত, বিলাসীপাৰাৰ মহকুমাধিপতিলৈ স্মাৰক পত্ৰ প্ৰেৰণ কৰে।
সংগঠন কেইটাই চাপৰ পৌৰ সভাৰ কাৰ্যবাহী বিষয়া শান্তনু গগৈৰ হাততো একে দাবী সম্বলিত স্মাৰক পত্ৰ প্ৰদান কৰে। সংগঠন কেইটাই চাপৰত সুৰাৰ বিপনী স্থাপনৰ অনুমতি বাতিল কৰিবলৈ ৰাজ্য চৰকাৰক দাবী জনোৱাৰ লগতে এই সন্দৰ্ভত মুখ্যমন্ত্ৰী ডঃ হিমন্ত বিশ্ব শৰ্মাৰ হস্তক্ষেপ কামনা কৰিছে।
লগতে ভাৰতীয় দৰ্শন-সংস্কৃতিৰ ধ্বজাবাহক বুলি সততে দাবী কৰি থকা বিজেপি নেতৃত্বাধীন চৰকাৰ খনে জননেতা শৰৎ চন্দ্ৰ সিংহৰ নীতি আৰু আদৰ্শক ভূলুণ্ঠিত কৰি তেওঁৰে জন্মভূমিতে বিলাতী সুৰাৰ বিপনীৰ অনুমতি প্ৰদান কৰিবলৈ ওলোৱা কাৰ্যক সংগঠন কেইটাই তীব্ৰ ভাষাৰে গৰিহণা দি চৰকাৰৰ এই নিৰ্দেশনা বাতিল কৰিবলৈও দাবী জনাইছে।
