ক্ৰীড়া ক্ষেত্ৰখনক ৰাজনীতিৰ উৰ্ধ্বত ৰাখি আগুৱাই নিয়াৰ দ্বায়িত্ব আমাৰ সকলোৰে। এই মন্তব্য ভাৰতীয় এথলেটিকছ ফেডাৰেশ্যনৰ নৱনিৰ্বাচিত উপ-সভাপতি লক্ষ্য কোৱঁৰৰ।
মাৰ্ঘেৰিটা খণ্ড উন্নয়ন সভাকক্ষত সোমবাৰে অনুষ্ঠিত এক ৰাজহুৱা সম্বৰ্ধনা অনুষ্ঠানত অংশগ্ৰহণ কৰি কোঁৱৰে নিজ বক্তব্যত ক্ৰীড়াক লৈ ৰাজনীতি নকৰিবলৈ সকীয়াই দিয়াৰ লগতে ক্ৰীড়াক্ষেত্ৰখন আগুৱাই নিবলৈ সকলোকে সহযোগিতা আগবঢ়াবলৈ অনুৰোধ জনায়।
বিশিষ্ট সমাজসেৱক কৃষ্ণ কুমাৰ শইকীয়াৰ সভাপতিত্যত অনুষ্ঠিত সভাখনত মাৰ্ঘেৰিটা বক্সিং এছ’চিয়েছন, তিনিচুকীয়া জিলা বক্সিং সন্থা, মাৰ্ঘেৰিটা সাংবাদিক সংস্থা, জ্ঞানোদয় বিদ্যালয় বাঙালী যুৱ ছাত্ৰ ফেডাৰেচন আদিকে ধৰি প্ৰায় চাৰিকুৰি সামাজিক দল-সংগঠনে ভাৰতীয় এথলেটিকছ ফেডাৰেচনৰ নৱনিৰ্বাচিত উপ-সভাপতি লক্ষ্য কোৱঁৰক গামোছা, সম্বৰ্ধনা পত্ৰ, শৰাই আদিৰে সম্বৰ্ধনা জনায়।
সভাখনত অসম ফুটবল সন্থাৰ সহকাৰী সম্পাদক অতুল বৰা, তিনিচুকীয়া জিলা সাংবাদিক সন্থাৰ সাধাৰণ সম্পাদক ৰাণাজ্যোতি নেওগ, সাংবাদিক ৰবীন মৰাণ, সমাজসেৱক ৰবীন্দ্ৰনাথ দত্ত আদিয়ে বিশিষ্ট অতিথি ৰূপে অংশগ্ৰহণ কৰি বক্তব্য ডাঙি ধৰে।
বক্তাসকলে লক্ষ্য কোঁৱৰে ক্ৰীড়া ক্ষেত্ৰখনত দায়িত্ব লোৱাৰ পাছত ৰাজ্যৰ ক্ৰীড়ালৈ চকুতলগা পৰিবৰ্তন আহিছে বুলি প্ৰকাশ কৰে।
উল্লেখ্য যে, ভাৰতীয় এথলেটিকছ ফেডাৰেশ্যনৰ ৫গৰাকী উপ-সভাপতিৰ ভিতৰত লক্ষ্য কোঁৱৰে বিনা প্ৰতিদ্বন্দ্বিতাৰে নিৰ্বাচিত হৈছে।
যোৱা ২০ অক্টোবৰত দিল্লীৰ ভাৰতীয় এথলেটিকছ ফেডাৰেশ্যনৰ কাৰ্যালয়ত নিজৰ দক্ষতা অনুযায়ী ব্যক্তিগত শ্ৰেষ্ঠতাৰে ফেডাৰেশ্যনৰ হ’ব লগীয়া কাৰ্যনিৰ্বাহকখনৰ উপ-সভাপতি পদৰ বাবে মনোনয়ন দাখিল কৰিছিল অসম এথলেটিকছ সন্থাৰ সভাপতি লক্ষ্য কোঁৱৰে।
ইতিমধ্যে ঘোষণা কৰা নিৰ্বাচনৰ ফলাফল মতে ৫গৰাকী উপ-সভাপতিৰ ভিতৰত লক্ষ্য কোঁৱৰে বিনা প্ৰতিদ্বন্দ্বিতাৰে নিৰ্বাচিত হোৱা খবৰে অসমৰ এথলেটিকছ ক্ষেত্ৰখনলৈ এক আশাৰ বতৰা কঢ়িয়াই আনিছে।
উত্তৰ-পূবৰ ভিতৰত ফেডাৰেচনত এনেকুৱা পদ লাভ কৰা একমাত্ৰ ব্যক্তি হিচাপে পৰিগণিত হয় লক্ষ্য কোঁৱৰ।
লক্ষ্য কোঁৱৰলৈ অসম এথলেটিকছ সন্থাৰ লগতে অসমৰ ক্ৰীড়াবিদ তথা অসমৰ ক্ৰীড়া প্ৰেমীসকলে অভিনন্দন জনাইছে।
উল্লেখ্য যে লক্ষ্য কোঁৱৰ অসম অলিম্পিক সন্থাৰ সম্পাদকৰ পদটোত বৰ্তমানো অধিষ্ঠিত হৈ আছে।
আজিৰ সভাত আছা নেতা ৰামানুজ লাক্ৰা, গোৰ্খো ছাত্ৰ সন্থাৰ নেতা সন্তোষ ছেত্ৰী, ৰাষ্ট্ৰীয় শৰীৰ্চৰ্চাবিদ প্ৰিয়া দেৱনাথ, সাংবাদিক ফাইজুৰ ৰহমান, মানস প্ৰতিম গগৈ, তপন দে, শ্যামল নেওগ, সমীৰণ বৰঠাকুৰ, শৰৎ গগৈ, সোনাৰাম কলিতা, অদিত গগৈ আদি বহু বিশিষ্ট ব্যক্তি তথা সাংবাদিকক উদ্যোক্তাসকলে ফুলাম গামোছাৰে সম্বৰ্ধনা জনায়।