নতুনকৈ উদ্বোধন হোৱা বগীবিল দলংখন চাবলৈ ৰাইজৰ মাজত সৃষ্টি হোৱা প্ৰচুৰ উৎসাহৰ মাজতে দুটাকৈ দুর্ঘটনা হৈ যোৱাৰ পিছত প্ৰতিকাৰমূলক পদক্ষেপৰ অংশ হিচাপে কিছু নীতি-নিৰ্দেশনা জাৰি কৰিছে প্ৰশাসনে। দক্ষিণ পাৰ আৰু উত্তৰ পাৰে থকা দুখন জিলা, ক্ৰমে ডিব্ৰুগড় আৰু ধেমাজিৰ প্ৰশাসনে এই নিৰ্দেশনা জাৰি কৰিছে।
এই নিৰ্দেশনা মতে, দলংখনৰ ওপৰত ২ মিনিটতকৈ অধিক সময় গাড়ী ৰখাব নোৱাৰিব কোনো লোকে।
আনহাতে দলংখনৰ ওপৰত নিৰাপত্তাজনিত দিশ চোৱা-চিতাৰ বাবে অচিৰেই নিৰাপত্তাৰক্ষী নিয়োগ কৰা হ’ব বুলিও প্ৰশাসনে জানিবলৈ দিছে।
উল্লেখযোগ্য যে যোৱা ২৫ ডিচেম্বৰত বগীবিল দলং উদ্বোধন হৈ যোৱাৰ পিছতে দলংখন চাবলৈ ভিৰ কৰা উৎসুক জনতাই কিছুমান অপ্ৰীতিকৰ পৰিৱেশৰ সৃষ্টি কৰা দেখা গৈছে। দলংখনৰ ওপৰত গাড়ী ৰখাই ছেলফি উঠাৰ প্ৰতিযোগিতাত লিপ্ত হৈছে একাংশ। ইতিমধ্যে দলংখনৰ ওপৰত দুটাকৈ দুৰ্ঘটনা সংঘটিত হৈছে, য’ত এটি ৮ বছৰীয়া শিশু গুৰুতৰভাৱে আহত হৈ এতিয়াও চিকিৎসাধীন হৈ আছে।
ইয়াৰোপৰি দলংখন উদ্বোধনৰ তিনিদিন পিছতে এজন যুৱকে বাইকেৰে ষ্টেণ্ট প্ৰদৰ্শন কৰাও দেখা গৈছিল।
অৱশেষত ২৯ ডিচেম্বৰৰ দিনা ডিব্ৰুগড় আৰু ধেমাজি জিলা প্ৰশাসনে দলখনক লৈ নীতি-নিৰ্দেশনা জাৰি কৰাত সন্তোষ প্ৰকাশ কৰিছে সচেতন ৰাইজে।
