উচ্চতম ন্যায়ালয়ৰ এটা সিদ্ধান্তক লৈ প্ৰত্যক্ষভাৱে ন্যায়পালিকাক সমালোচনা উপ-ৰাষ্ট্ৰপতি জগদীপ ধনখৰৰ। তেওঁৰ মতে, উচ্চতম ন্যায়ালয়ে ভাৰতৰ ৰাষ্ট্ৰপতিৰ বাবে বিধায়িনী দলৰ গৃহীত বিধেয়কৰ সন্দৰ্ভত সিদ্ধান্ত ল’বলৈ সময়সীমা নিৰ্ধাৰণ কৰাৰ কোনো অধিকাৰ নাই। ধনখৰে কয় যে এনে পদক্ষেপ গণতান্ত্ৰিক মূল্যবোধৰ বিৰোধী আৰু ন্যায়াধীশসকলে ছুপাৰ পাৰ্লিয়ামেণ্টৰ দৰে কাম কৰিছে।
১১ এপ্ৰিলত উচ্চতম ন্যায়ালয়ে এক ঐতিহাসিক ৰায়দানত কৈছিল যে ৰাষ্ট্ৰপতিয়ে বিধায়িনী দলে গৃহীত বিধেয়কৰ ওপৰত অনিৰ্দিষ্টকাললৈ সিদ্ধান্ত স্থগিত ৰাখিব নোৱাৰে। ন্যায়াধীশ জে বি পাৰ্দিৱালা আৰু আৰ মহাদেৱানৰ বিচাৰপীঠে নিৰ্দেশ দিছিল যে ৰাজ্যপালৰ দ্বাৰা প্ৰেৰিত বিধেয়কৰ ক্ষেত্ৰত ৰাষ্ট্ৰপতিয়ে তিনি মাহৰ ভিতৰত নিজৰ মতামত প্ৰকাশ কৰিব লাগিব। যদি তিনি মাহৰ ভিতৰত সিদ্ধান্ত লোৱা সম্ভৱ নহয়, তেন্তে পলমৰ কাৰণ সংশ্লিষ্ট ৰাজ্যক জনাব লাগিব। একে নিৰ্দেশ ৰাজ্যপালসকলৰ বাবেও জাৰি কৰা হৈছিল।
উপ-ৰাষ্ট্ৰপতি ধনখৰে এই নিৰ্দেশক অগ্ৰহণযোগ্য বুলি অভিহিত কৰিছে। তেওঁ এই নিৰ্দেশনাৰ ওপৰত প্ৰশ্ন উত্থাপন কৰি কয়, দেশ কোন দিশলৈ আগবাঢ়িছে? আমি গণতন্ত্ৰৰ সৈতে কেতিয়াও আপোচ কৰা নাই। এতিয়া ভাৰতৰ ৰাষ্ট্ৰপতিকো বিধেয়কৰ ওপৰত সিদ্ধান্ত ল’বলৈ সময়সীমা দিয়া হৈছে। যদি সময়মতে সিদ্ধান্ত লোৱা নহয়, তেন্তে বিধেয়কখন আইনত পৰিণত হ’ব বুলি কোৱা হৈছে। এয়া কেনেকৈ গ্ৰহণযোগ্য বুলি মত প্ৰকাশ কৰিছে।
ধনখৰে ন্যায়পালিকাৰ ভূমিকাৰ ওপৰতো তীব্ৰ সমালোচনা কৰি কয়, ন্যায়াধীশসকলে আইন প্ৰণয়ন আৰু কাৰ্যকৰী নিৰ্দেশনা জাৰি কৰি ছুপাৰ পাৰ্লিয়ামেণ্টৰ দৰে কাম কৰি আছে। কিন্তু তেওঁলোকক কোনো ধৰণে জবাবদিহি কৰিব নোৱাৰে, কাৰণ আইনত তেনে কোনো ব্যৱস্থা নাই। তেওঁ লগতে কয়, ন্যায়পালিকাই সংবিধানৰ ১৪২ নং ধাৰাক ক্ষেপণাস্ত্ৰৰ দৰে ব্যৱহাৰ কৰিছে। এই ধাৰা আনুসৰি উচ্চতম ন্যায়ালয়ে সম্পূৰ্ণ ন্যায় প্ৰতিষ্ঠাৰ বাবে আইনৰ পৰিসৰৰ বাহিৰত নিৰ্দেশ জাৰি কৰিব পাৰে।
ধনখৰে উল্লেখ কৰিছে যে কিছুদিন পূৰ্বে দিল্লী উচ্চ ন্যায়ালয়ৰ এগৰাকী ন্যায়াধীশৰ ঘৰৰ পৰা বৃহৎ পৰিমাণৰ নগদ ধন উদ্ধাৰ হৈছিল, কিন্তু তেওঁৰ বিৰুদ্ধে এতিয়ালৈকে কোনো ব্যৱস্থা গ্ৰহণ কৰা হোৱা নাই। তেওঁৰ মতে, এনে পৰিস্থিতিত ন্যায়পালিকাৰ জবাবদিহিতাৰ অভাৱ চিন্তনীয়। তেওঁ প্ৰশ্ন কৰে, ভাৰতৰ ৰাষ্ট্ৰপতিক কি ভিত্তিত নিৰ্দেশনা দিয়া হৈছে? ন্যায়পালিকাৰ এনে পদক্ষেপ গণতন্ত্ৰৰ মূল স্তম্ভসমূহৰ মাজত ভাৰসাম্য নষ্ট কৰিব পাৰে বুলি মত প্ৰকাশ কৰিছে উপৰাষ্ট্ৰপতিগৰাকীয়ে।
অৱশ্যে ন্যায়পালিকাই এই সমালোচনাৰ প্ৰতি কেনে প্ৰতিক্ৰিয়া প্ৰকাশ কৰে, সেয়া লক্ষণীয় হ’ব।
