প্ৰতিখন গাঁৱতে এটা পুথিভঁৰাল থকাটো প্ৰয়োজনীয় : উত্তৰ-পূব গ্ৰন্থমেলা উদ্বোধন কৰি উপৰাষ্ট্ৰপতি ভেংকায়া নাইডুৰ বক্তব্য

অসম অভিযান্ত্ৰিক প্ৰতিষ্ঠান খেলপথাৰত আজিৰে পৰা অনুষ্ঠিত হোৱা ২১ সংখ্যক উত্তৰ-পূব গ্ৰন্থমেলা আনুষ্ঠানিকভাৱে উদ্বোধন কৰে দেশৰ উপৰাষ্ট্ৰপতি এম ভেংকায়া নাইডুৱে।

গ্ৰন্থমেলাখন আনুষ্ঠানিকভাৱে মুকলি কৰি দিয়া ভাষণত নাইডুৱে পুথিভঁৰাল আন্দোলনৰ কথা উল্লেখ কৰি ৰাজ্যৰ প্ৰতিখন গাঁৱতে এটা পুথিভঁৰালৰ স্থাপনৰ পোষকতা কৰে।

কিতাপ পঢ়াৰ বিষয়ে উল্লেখ কৰি উপৰাষ্ট্ৰপতিগৰাকীয়ে কিতাপ পঢ়া অভ্যাসে মানুহৰ মন আৰু মগজুৰ দুৱাৰ মুকলি কৰি দিয়ে বুলি মন্তব্য কৰে।

ভাৰতৰ বিভিন্ন প্ৰান্তত হোৱা পুথিভঁৰাল স্থাপনৰ আন্দোলনে দেশৰ আৰ্থ-সামাজিক বিকাশৰ ক্ষেত্ৰত আগবঢ়োৱা বৰঙণিৰ বিষয়েও উল্লেখ কৰে উপৰাষ্ট্ৰপতি গৰাকীয়ে।

”অন্ধ্ৰপ্ৰদেশৰ পৰা পঞ্জাৱ, মহাৰাষ্ট্ৰৰ পৰা কেৰালালৈ পুথিভঁৰালে সমাজ গঠনত বৃহৎ বৰঙণি যোগাবলৈ সক্ষম হৈছে,”নাইডুৱে কয়।

আনহাতে, গুৱাহাটীত গ্ৰন্থমেলা অনুষ্ঠিত হোৱাক লৈ আনন্দিত হৈ পৰা নাইডুৱে অসমৰ বিভিন্ন প্ৰান্তৰ পৰা গ্ৰন্থপ্ৰেমী সকল আহি ইয়াক আৰু অধিক সফল কৰি তুলিব বুলি আশা ব্যক্ত কৰে।

তদুপৰি, ভাৰতবৰ্ষৰ কিতাপৰ সৈতে থকা সম্পৰ্ক প্ৰায় ৫০০০ বছৰ পুৰণি এক সভ্যতা বুলিও উপৰাষ্ট্ৰপতি নাইডুৱে কয়।

বৰ্তমান সময়ত ভাল গ্ৰন্থৰ প্ৰয়োজনীয়তা ব্যক্ত কৰি নাইডুৱে কয় যে বৰ্তমান সময়ত যুৱ প্ৰজন্মৰ মাজত কিতাপ পঢ়াৰ পৰিৱৰ্তে অনলাইন ভিডিঅ’ উপভোগ কৰাৰ প্ৰৱণতা বৃদ্ধি পাইছে যি এটা চিন্তনীয় বিষয়।

তেওঁ কয় যে যুৱ প্ৰজন্মৰ এই অভ্যাসৰ সৈতে মোকাবিলা কৰিবলৈ হ’লে সৰুৰে পঢ়া শিশুসকলক কিতাপ পঢ়াৰ অভ্যাস গঢ়ি তুলিব লাগিব।

অনুষ্ঠানত অসমৰ ৰাজ্যপাল জগদীশ মুখীৰ লগতে মুখ্য মন্ত্ৰী সৰ্বানন্দ সোণোৱালকে ধৰি ভালেসংখ্যক বিশিষ্ট ব্যক্তিয়ে অংশগ্ৰহণ কৰে।