ভিয়েটনামৰ নতুন ৰাষ্ট্ৰপতি নিৰ্বাচিত হৈছে ভো ভেন থুং। আইন প্ৰণেতাসকলে বৃহস্পতিবাৰে নেচনেল এছেম্বলীৰ এক বিশেষ অধিৱেশনত তেওঁক ৰাষ্ট্ৰপতি নিৰ্বাচিত কৰে।
ৰাষ্ট্ৰপতি পদটো ভিয়েটনামৰ শীৰ্ষ চাৰিটা ৰাজনৈতিক পদৰ ভিতৰত এটা। অৱশ্যে, পদটোৱে মূলতঃ এক আনুষ্ঠানিক ভূমিকাহে পালন কৰে।
স্থানীয় সংবাদ মাধ্যমত ভিয়েটনাম নিউজত প্ৰকাশ পোৱা মতে নেচনেল এছেম্বলীত উপস্থিত ৪৮৮ জনৰ ভিতৰত ৪৮৭ জনে থুঙক ভোট দিছিল।
থুং এনে এটা সময়ত ভিয়েটনামৰ ৰাষ্ট্ৰপতি নিৰ্বাচিত হৈছে যেতিয়া দেশখনে ৰাজনৈতিক অস্থিৰতাৰ সন্মুখীন হৈছে। দুৰ্নীতি নিৰ্মূলৰ কাম চলি আছে আৰু শাসকীয় কমিউনিষ্ট পাৰ্টিৰ আভ্যন্তৰীণ সংঘাতত কেইবাজনো মন্ত্ৰীক বৰ্খাস্ত কৰা হৈছে।
বিগত জানুৱাৰী মাহত তদানীত্বন ৰাষ্ট্ৰপতি নগুয়েন জুয়ান ফুকক হঠাতে অপসাৰণ কৰা হয়। তেওঁৰ ওপৰত তেওঁৰ নিয়ন্ত্ৰণাধীন বিষয়াসকলৰ জৰিয়তে “সীমা অতিক্ৰম কৰা আৰু অন্যায়” কৰাৰ অভিযোগ উঠিছিল। ফুকৰ অপসাৰণক তেতিয়া দেশৰ দুৰ্নীতি বিৰোধী স্থিতিত এক গুৰুত্বপূৰ্ণ পদক্ষেপ বুলি ধৰা হৈছিল।
