লখিমপুৰৰ কদম ৰাজহ চক্ৰৰ অন্তৰ্গত সোৱণশিৰিৰ পাৰৰ ভীমপৰাৰ এগৰাকী কৃষক আছিল কুমাৰ পামে। বয়স ৬০ বছৰ। আজিৰ পৰা ৩ বছৰ আগলৈকে কুমাৰে কৃষক হিচাপে জীৱন নিৰ্বাহ কৰি আছিল যদিও সোৱণশিৰিৰ খহনীয়াই তেওঁক ভেটিৰ পৰা খেদিলে, খেতিৰ মাটি খহাই এজন ভূমিহীন, কৰ্মহীন লোকলৈ ৰূপান্তৰিত কৰি তুলিলে। তেওঁ এতিয়া সোৱণশিৰিয়ে উটুৱাই অনা কাঠ সংগ্ৰহ কৰি সেয়া বজাৰত বিক্ৰি কৰি কথমপি জীৱন নিৰ্বাহ কৰি আছে।
কুমাৰৰ হৈছে সোৱণশিৰিৰ খহনীয়াই ভূমিহীন শ্ৰমিকলৈ ৰূপান্তৰিত কৰা ৩০ টা কৃষক পৰিয়াল এজন।
অসমত ব্ৰহ্মপুত্ৰ আৰু ইয়াৰ উপনৈসমূহে বিশাল পৰিমাণৰ কৃষিভূমি খহাই পেলাইছে আৰু কৃষিৰ ওপৰত নিৰ্ভৰশীল বহু পৰিয়ালক স্থানচ্যুত কৰিছে। খহনীয়াত সৰ্বস্ব হেৰুৱাই তেওঁলোক ভূমিহীন আৰু কৰ্মহীন হৈ পৰিছে।
ভীমপৰাৰ খহনীয়াত সৰ্বস্ব হেৰুওৱা কৃষকসকলে তেওঁলোকৰ পিতৃ-পিতামহৰ দিনৰ কৃষিভূমি হেৰুৱাই এতিয়া হয়তো চহৰলৈ প্ৰৱ্ৰজন কৰিবলগীয়া হৈছে নহয় বিকল্প উপাৰ্জনৰ পথ বিচাৰি ল’বলগীয়া হৈছে।
কুমাৰ পামে, দীঘলা দলে, ৰাজেন দলে আৰু বহুতো কৃষকে বাৰিষা সোৱণশিৰিয়ে কঢ়িয়াই অনা কাঠ সংগ্ৰহ কৰি স্থানীয় বজাৰত বিক্ৰি কৰি জীৱন নিৰ্বাহ কৰিবলৈ লৈছে। তেওঁলোকে এবোজা খৰিত ৫০ টকা দৰত বিক্ৰি কৰে আৰু এনেকৈয়েই তেওঁলোকৰ পৰিয়াল চলাই আছে।
নদীৰ খহনীয়াৰ কবলত পৰি বিগত দুটা বছৰৰো অধিক কাল ধৰি নিজৰ আপোন বাসস্থানৰ পৰা বিতাড়িত হৈ থকা নৈ-পৰীয়া গাঁৱবাসীসকলে সংশ্লিষ্ট চৰকাৰ আৰু চৰকাৰী বিভাগসমূহে তেওঁলোকৰ সমস্যাৰ কোনো মনোযোগ নিদিয়াত দুখ প্ৰকাশ কৰিছে।
