এপিনে বানপানীৰ মাজত ৰাজ্যবাসীয়ে নিশা ভয় শংকাৰ মাজেৰে কটাইছে আৰু আনপিনে খাদ্য সংকটৰ ফলত বনাঞ্চলৰ পৰা ওলাই আহিছে গজৰাজ। যোৱা কিছু দিনৰ পৰা বিশ্বনাথৰ মৰলগাওঁ আৰু কেইবাখনো গাঁৱৰ ৰাইজে বন্যহস্তীৰ উপদ্ৰৱৰ বাবে উজাগৰী নিশা কটাব লগা হৈছে।
বিশ্বনাথৰ দক্ষিণ মৰলগাওঁ, মধ্য মৰলগাওঁ, উত্তৰ মৰলগাওঁ, জাপৰি গুৰী আৰু বাহবৰীয়া পামত বন্যহস্তীয়ে উপদ্ৰৱ চলায় । প্ৰায় ৫০/৬০ টা বনৰীয়া হাতীৰ জাকটোৱে বহুকেইটা ঘৰ ভাঙি লণ্ড-ভণ্ড কৰাৰ উপৰিও বহুকেইখন গাঁৱত সিচঁৰিত হৈ তাণ্ডৱ সৃষ্টি কৰে ৷
ইপিনে, অসীম ভট্টাচাৰ্য নামৰ ব্যক্তি জনৰ ঘৰত নিশা বন্যহস্তীৰ জাকটো সোমাই ভঁৰালৰ ধান খোৱাৰ লগতে ক্ষতিসাধন কৰে চাৰিচকীয়া বাহনৰো। সমান্তৰালকৈ কমলেশ্বৰী শইকীয়া নামৰ মহিলাগৰাকীৰ ঘৰত মাজ নিশা হাতীৰ জাকটো সোমাই সম্পূৰ্ণ ৰূপে পাকঘৰটো ধ্বংস কৰে। সেইদৰে, চেনী গগৈ নামৰ মহিলা গৰাকীৰ ঘৰত হাতীৰ জাকটোৱে ঘৰৰ চৌহদত সোমাই বহু ক্ষয়-ক্ষতি কৰে।
নিশাৰ ভাগত বন বিভাগে স্থানীয় ৰাইজৰ সহযোগত বোমা-গুলী ফুটায় যদিও আতংকৰ মাজত পাৰ কৰিব লগা হয় গাওঁবাসী ৰাইজে।
অৱশ্যে বৰ্তমান হাতীৰ জাকটোৱে গাওঁখনৰ পৰা ওলাই নিৰাপদ স্থানত আশ্ৰয় গ্ৰহণ কৰি আছে যদিও নিশাৰ ভাগত পুনৰ গাওঁত প্ৰৱেশ কৰাৰ শংকাত ভূগিছে গাওঁবাসী।