আজি পুনেত অনুষ্ঠিত হোৱা ভাৰত আৰু ইংলেণ্ডৰ মাজৰ এদিনীয়া শৃখলাৰ দ্বিতীয়খন মেচত দুটাকৈ আন্তঃৰাষ্ট্ৰীয় অভিলেখৰ গৰাকী হৈছে।
মেচখনত কোহলীয়ে ৭৯ টা বলত ৬৬ ৰাণৰ সুন্দৰ বৰঙণি আগবঢ়ায়।
এই অৰ্ধশতেকেৰে কোহলীয়ে অধিনায়ক হিচাপে আন্তঃৰাষ্টীয় এদিনীয়াত আটাইতকৈ ৰাণ সংগ্ৰহ কৰাৰ তালিকাত পঞ্চম স্থানত উপৱিষ্ট হৈছে।
এইক্ষেত্ৰত তেওঁ দক্ষিণ আফ্ৰিকাৰ প্ৰাক্তন অধিনায়ক গ্ৰেম স্মিথক অতিক্ৰম কৰি যায়।
অধিনায়ক হিচাপে গ্ৰেম স্মিথে সংগ্ৰহ কৰিছিল ৫,৪১৬ ৰাণ।
মেচখনৰ ২৪ অভাৰত কোহলীয়ে ৪১ ৰাণ কৰা অৱস্থাত স্মিথক অতিক্ৰম কৰিছে।
স্মিথে অধিনায়ক ১৫০ খন মেচত ইমানসংখ্যক ৰাণ সংগ্ৰহ কৰাৰ বিপৰীতে কোহলীয়ে ৯৪খন মেচতে তেওঁক অতিক্ৰম কৰিবলৈ সক্ষম হয়।
তালিকাখনৰ প্ৰথম স্থানত আছে অষ্ট্ৰেলিয়াৰ কিংবদন্তি অধিনায়ক ৰিকী পণ্টিং।
অধিনায়ক হিচাপে পণ্টিঙে ২৩৪খন মেচত ৮৪৯৭ ৰাণ সংগ্ৰহ কৰিছিল।
পণ্টিঙৰ পাছতে আছে ভাৰতৰ মহেন্দ্ৰ সিং ধনী।
ধনীয়ে অধিনায়ক হিচাপে ২০০খন মেচত সংগ্ৰহ কৰিছিল ৬৬৪১ ৰাণ।
আনহাতে, বেটিং এভাৰেজ আৰু ষ্ট্ৰাইক ৰেটৰ ক্ষেত্ৰত কোহলীয়ে তালিকাখনৰ আটাইতকৈ শ্ৰেষ্ঠত্ব লাভ কৰিছে।
অধিনায়ক হিচাপে তেওঁৰ বেটিং এভাৰেজ ৭০ আৰু ষ্ট্ৰাইক ৰেট হৈছে ৯৮.৫৫।
আনহাতে, একেখন মেচতে কোহলীয়ে বেটিং ক্ৰমৰ তিনি নম্বৰ স্থানৰ বেটছমেন হিচাপে ১০,০০০ ৰাণ স্ংগ্ৰহ কৰিবলৈ সক্ষম হয়।
বৰ্তমান তেওঁ এইক্ষেত্ৰত অষ্ট্ৰেলিয়াৰ প্ৰাক্তন অধিনায়ক ৰিকী পণ্টিঙৰ পাছতে স্থান লাভ কৰিছে।
পণ্টিঙে এদিনীয়া মেচত সংগ্ৰহ কৰিছিল ১২৬৬২ ৰাণ।
টেষ্ট, এদিনীয়া আৰু টি-২০- আটাইকেওতা ফৰ্মেটতে পণ্টিঙে তিনি নম্বৰ স্থানত ২২,৮৬৯ ৰাণ সংগ্ৰহ কৰি গৈছে।
বৰ্তমানলৈকে কোহলীয়ে এদিনীয়াত এইক্ষেত্ৰত সংগ্ৰহ কৰিছে ১০,০৪৬ ৰাণ।
আনহাতে, আজি পুনেত অনুষ্ঠিত হৈ থকা মেচখনত ইংলেণ্ডে টছত জিকি বলিং কৰিবলৈ সিদ্ধান্ত লয়।
কেএল ৰাহুলৰ বিস্ফোৰক ১০৮ (১১৪) ৰাণৰ শতকীয় ইনিংছৰ সহায়ত ভাৰতে ৬টা উইকেট হেৰুৱায় সংগ্ৰহ কৰে ৩৩৬ ৰাণ।
ৰাহুলৰ উপৰিও দীৰ্ঘ দিনৰ অন্তত আন্তঃৰাষ্ট্ৰীয় এদিনীয়া মেচলৈ প্ৰত্যাৱৰ্তন ঘটা উইকেট কীপাৰ ঋষভ পণ্টে মাৰমুখী ৭৭ (৪০) আৰু অধিনায়ক কোহলীয়ে ৬৬ (৭৯) ৰাণৰ বৰঙণি আগবঢ়ায়।
ইংলেণ্ডৰ হৈ টম কুৰাণ আৰু ৰিচী টিপলেয়ে ২টাকৈ উইকেট লাভ কৰে।
বাতৰি লিখাৰ পৰলৈকে ইংলেণ্ডে ৩৩৭ ৰাণৰ বিশাল লক্ষ্য আগত লৈ মেচখনৰ দ্বিতীয় ইনিংছ মুকলি কৰিছে।
