ৰাছিয়াৰ ৰাষ্ট্ৰপতি ভ্লাদিমিৰ পুটিন পুনৰ বাতৰিৰ শিৰোনামালৈ আহিছে।
সোমবাৰে তেওঁ এখন চৰ্চিত বিধেয়কত চহী কৰিছে।
বিধেয়কখনৰ মতে, পুটিনে ২০৩৬ চনলৈকে দেশখনৰ ৰাষ্ট্ৰপতিৰ পদত অধিষ্ঠিত হৈ থাকিব পাৰিব।
যাৰ ফলত অনাগত ১৫ বছৰলৈ তেওঁ দেশখনৰ শীৰ্ষ পদত থকাটো নিশ্চিত হৈ পৰিল।
উল্লেখযোগ্য যে ২০২৪ চনত তেওঁৰ বৰ্তমানৰ শাসনকাল অন্ত পৰাৰ কথা আছিল।
কিন্তু নতুন বিধেয়কখনৰ মতে, তেওঁ ২০৩৬ চনলৈকে ৰাষ্ট্ৰপতি নিৰ্বাচনত প্ৰতিদ্বন্দ্বিতা আগবঢ়াব পাৰিব।
প্ৰতিদ্বন্দ্বিতাত জয়ী হ’লে তেওঁ ক্ষমতাত থকাটো নিশ্চিত।
বৰ্তমান পুটিনৰ বয়স ৬৮, সেই অনুসৰি ৮৩ বছৰ বয়সলৈকে তেওঁ ৰাষ্ট্ৰপতি হিচাপে অধিষ্ঠিত হৈ থাকিব পাৰিব।
যোৱা বছৰ দেশখনত বিধেয়কখনক লৈ এক গণভোট লোৱা হয়।
প্ৰবল বিৰোধিতাৰ সত্বেও গণভোটত বৃহৎ ব্যৱধানৰ ভোটত জয়ী হোৱাৰ দাবী কৰিছিল পুটিন।
তাৰপাছতে বিধেয়কখন ৰাছিয়াৰ সংসদৰ জৰিয়তে ৰাষ্ট্ৰপতি পুটিনৰ টেবুললৈ যায়।
পুটিনে তাত স্বাক্ষৰ কৰি নিজৰ ক্ষমতাৰ ম্যাদ বঢ়াই লয়।
দেশখনৰ প্ৰাক্তন ৰাষ্ট্ৰপতি ডিমিত্ৰি মেদভেদভকো এই বিধেয়কৰ জৰিয়তে নতুন ক্ষমতা প্ৰদান কৰা হৈছে।
মেদভেদভ ২০০৮ চনৰ ২০১২ চনলৈকে দেশখনৰ ৰাষ্ট্ৰপতি আছিল।
তেওঁকো আৰু দুবাৰৰ বাবে নিৰ্বাচনত অংশগ্ৰহণ কৰাৰ অনুমতি প্ৰদান কৰা হৈছে।
দেশখনৰ বিৰোধী পক্ষ এই আইনৰ বিৰুদ্ধে সোচ্চাৰ হৈ পৰিছে।
তেওঁলোকৰ দাবী, পুটিনে ক্ষমতাৰ অপপ্ৰয়োগ কৰি স্বৈৰাচ্চাৰী শাসন চলাইছে।
আনহাতে, পুটিনে বিৰোধীৰ অভিযোগ নস্যাৎ কৰিছে।
তেওঁ কৈছে যে ২০২৪ চন পৰ্যন্ত ক্ষমতাত অধিষ্ঠতি থকাটোৱেই তেওঁৰ বাবে যথেষ্ট।
সেয়ে, ২০২৪ চনৰ পাছত নিৰ্বাচনত অংশ লোৱা-নোলোৱাৰ সম্পৰ্কত এতিয়ালৈকে তেওঁ কোনো সিদ্ধান্ত লোৱা নাই।
যদি ২০৩৬ চনলৈকে তেওঁ ৰাষ্ট্ৰপতি হিচাপে থাকে, তেন্তে দেশখনৰ ভূতপূৰ্ব ৰাষ্ট্ৰপতি যোছেফ ষ্টালিনৰ অভিলেখ তেওঁ ভংগ কৰিব।
উল্লেখযোগ্য যে ভ্লাদিমিৰ পুটিনে ২০০০ চনৰ পৰা যোৱা দুই দশকধৰি দেশখনৰ ৰাষ্ট্ৰপতি পদত অধিষ্ঠিত হৈ আছে।
মাজতে কেৱল ডিমিত্ৰি মেদভেদভক ২০০৮ৰ পৰা ২০১২ চনলৈকে ৰাষ্ট্ৰপতি পদ তেওঁ এৰি দিছিল।
সেই সময়ছোৱাত তেওঁ দেশখনৰ প্ৰধানমন্ত্ৰী পদত আছিল।
