কেইবা দশক জুৰি সামৰিক জুণ্টা প্ৰশাসনৰ দখলত থকা ম্যানমাৰত এতিয়া গণতন্ত্ৰ প্ৰতিষ্ঠা হৈছে।
দেশ খনত আজি অনুষ্ঠিত হৈছে সাধাৰণ নিৰ্বাচনৰ ভোটগ্ৰহণ।দেওবাৰে পুৱা ৬ বজাৰ পৰা দেশ খনৰ ৪২,০৪৭ টা ভোট কেন্দ্ৰত ভোট গ্ৰহণ আৰম্ভ হয়।
বিয়লি ৪ বজালৈকে চলিব এই ভোটগ্ৰহণ।ম্যামমাৰৰ প্ৰায় ৩৭ নিযুত ভোটাৰে এইবাৰ ভোট দান কৰিব।
ম্যানমাৰৰ সংসদৰ ১,১১৭ খন আসনৰ বাবে এইবাৰ নিৰ্বাচনী যুঁজত নামিছে ৫,৬৩৯ গৰাকী প্ৰাৰ্থীয়ে। উল্লেখ্য ২০১৫ চনত অনুষ্ঠিত নিৰ্বাচনত আং চান ছ্যু কী নেতৃত্বাধীন নেছনেল লীগ ফৰ ডেম’ক্ৰেছিয়ে সংখ্যাগৰিষ্ঠ আসন লাভ কৰি চৰকাৰ গঠনৰ সুবিধা পাইছিল।
এইবাৰো ছ্যু কীৰ দলেই পুনৰ চৰকাৰ গঠন কৰিব পাৰিব বুলি বহুতে ধাৰণা কৰিছে। নিম্ন সদনৰ বাবে প্ৰতিদ্বন্দ্বিতা কৰা প্ৰাৰ্থীৰ সংখ্যা হৈছে ১,৫৬৫ গৰাকী। একেদৰে উচ্চ সদনৰ বাবে যুঁজত নামিছে ৭৭৯ গৰাকী প্ৰাৰ্থীয়ে।
৩,১১২ গৰাকী প্ৰাৰ্থীয়ে ৰাজ্যিক সংসদ আৰু ১৮৩ গৰাকী প্ৰাৰ্থীয়ে সংখ্যালঘু জনগোষ্ঠীয় আসনৰ বাবে প্ৰতিদ্বন্দ্বিতা কৰিছে। শাসকীয় এনএলডি দলে এইবাৰ ১,১০৬ গৰাকী প্ৰাৰ্থী প্ৰক্ষেপ কৰিছে।
আনহাতে ইউএছডিপিয়ে প্ৰক্ষেপ কৰা প্ৰাৰ্থীৰ সংখ্যা হৈছে ১,০৮৯ গৰাকী।
কাছিনকে ধৰি ১৫ খন চহৰ আৰু ৬৬৫ খন গাওঁত এইবাৰ দেশ খনৰ নিৰ্বাচন আয়োগে বিভিন্ন কাৰণত ভোট গ্ৰহণৰ অনুমতি দিয়া নাই।
