পশ্চিম অসম দুগ্ধ উৎপাদক সমবায় সংঘ চমুকৈ ৱামূল অৰ্থাৎ জনপ্ৰিয় দুগ্ধ ব্ৰেণ্ড পূৰবীয়ে সোমবাৰে গুৱাহাটীৰ নেডফি সন্মিলন কেন্দ্ৰত পূৰবী দহী আৰু মছালা লাচ্ছি শীৰ্ষক দুবিধ নতুন খাদ্য সামগ্ৰী মুকলি কৰে।
অসমৰ সমবায় বিভাগৰ মন্ত্ৰী ৰিহণ দৈমাৰী আৰু ৰাজ্য চৰকাৰৰ প্ৰধান সচিব বিশ্বৰঞ্জন ছামালে আনুষ্ঠানিকভাৱে ৱামূলৰ নতুন সামগ্ৰী দুবিধ মুকলি কৰে।
উল্লেখযোগ্য যে, পূৰবী হৈছে পশ্চিম অসম দুগ্ধ উৎপাদক সমবায় সংঘৰ গাখীৰ আৰু দুগ্ধজাত সামগ্ৰীৰ ব্যাণ্ড নাম। পূৰবী সমগ্ৰ উত্তৰ-পূব ভাৰতৰে সৰ্ববৃহৎ সক্ৰিয় ডায়েৰী।
২০১৮ চনত পূৰবীয়ে ‘ছুইট লাচ্ছি’ শীৰ্ষক সামগ্ৰী বিধ মুকলি কৰাৰ পাছতেই চেনী বিহীন সামগ্ৰী উৎপাদনৰ দিশটোৰ ওপৰত গুৰুত্ব প্ৰদান কৰাৰ কথা চৰ্চালৈ আহিছিল।
ইয়াৰ প্ৰায় এটা বছৰ পাছত মছালা লাচ্ছি মুকলি কৰা হয়। শেহতীয়াকৈ স্বাস্থ্যৰ প্ৰতি সচেতন উপভোক্তাৰ সংখ্যা তথা চাহিদাৰ প্ৰতি লক্ষ্য ৰাখিয়েই মছালা লাচ্ছি মুকলি কৰা হৈছে বুলি প্ৰকাশ কৰিছে পূৰবী কৰ্তৃপক্ষয়।
জলকীয়া আৰু অন্যান্য বিভিন্ন মছলাৰ প্ৰয়োগেৰে প্ৰতিটো বতৰতেই খাব পৰাকৈ প্ৰস্তুত কৰা হৈছে মছালা লাচ্ছি বিধ।
ইতিমধ্যেই বজাৰত পূৰবীৰ মিঠা আৰু টেঙা দুয়োবিধ দৈয়ে যথেষ্ট জনপ্ৰিয় অৰ্জন কৰিছে। ইয়াৰ পিছতো পূৰবী দহী নামেৰে বিশেষভাৱে ৪০০ গ্ৰামত ২৫ টকা পেকেটেৰে সজাই তোলা হৈছে নতুন দৈ বিধ।
গাখীৰ যদিহে পৰিস্কাৰ আৰু বিশুদ্ধ নহয়, তেন্তে গাখীৰে ইয়াৰ গুণাগুণ হেৰুৱাই পেলায়। এই আপ্তবাক্য শাৰী মানিয়েই পূৰবীৰ সকলো দুগ্ধজাত সামগ্ৰীৰ ক্ষেত্ৰত সতেজ গাখীৰ ব্যৱহাৰ কৰা হয়।
ৱামূলৰ সৈতে জড়িত হৈ থকা ১২,০০০ ৰো অধিক দুগ্ধ কৃষকৰ পৰা ২০০ খনতকৈও অধিক গাঁও পৰ্যায়ৰ দুগ্ধ সমবায় সমিতিৰ জৰিয়তে দৈনিক দুবাৰকৈ গাখীৰ সংগ্ৰহ কৰা হয়।
কৃষকৰ সমবায় হিচাপে ৱামূলে ধাৰাবাহিকভাৱে বজাৰ দখল কৰিবলৈ পাই যথেষ্ট গৌৰৱান্বিত বুলি প্ৰতিষ্ঠানটোৱে জানিবলৈ দিয়ে। গুৱাহাটীৰ পাঞ্জাবাৰীত থকা ৱামূলৰ ডায়েৰীত প্ৰতিদিনেই ৬৫,০০০ লিটাৰ গাখীৰ সংশোধন কৰা হয়।
আজি ৱামূলৰ দুয়োবিধ সামগ্ৰী মুকলি কৰি সমবায় মন্ত্ৰী ৰিহন দৈমাৰীয়ে কয়, “ৰাজ্যত শ্বেত বিপ্লৱ অনাৰ ক্ষেত্ৰত পূৰৱী অৰ্থাৎ ৱামূলে গুৰুত্বপূৰ্ণ ভুমিকা পালন কৰিছে। ইতিমধ্যেই ৰাজ্যবাসীয়ে পূৰৱীক আদৰি লৈছে। ঠিক তেনেদৰেই অনাগত দিনতো আজি মুকলি কৰা এই নতুন দুবিধ সামগ্ৰীও ৰাইজে আদৰি ল’ব।”