ভাৰতীয় খাদ্য সুৰক্ষা আৰু মানক সংস্থাই বটলত বা পেকেটত ভৰোৱা খোৱাপানী আৰু মিনাৰেল পানীক ‘উচ্চ বিপদজনক খাদ্য’ বুলি চিনাক্ত কৰিছে। এই ঘোষণা কেন্দ্ৰৰ খাদ্য সুৰক্ষা প্ৰতিষ্ঠানে। ফলত এনে পানীয় সামগ্ৰীৰ কঠোৰ পৰীক্ষণ আৰু অডিটিং অনিবাৰ্য হৈ পৰিছে।
অক্টোবৰ মাহত কেন্দ্ৰীয় চৰকাৰে বটলত বা পেকেটত ভৰোৱা খোৱাপানীৰ বাবে ব্যুৰো অৱ ইণ্ডিয়ান ষ্টেণ্ডাৰ্ডছ (বিআইএছ)ৰ প্ৰমাণপত্ৰৰ প্ৰয়োজন নহ’ব বুলি সিদ্ধান্ত লৈছিল। সেই সিদ্ধান্তৰ পাছত এই নতুন নিয়ম বলবৎ হৈছিল।
নতুন নিয়মে কি কয়?
এফএছএছএআইৰ নিৰ্দেশনা অনুসৰি বটলত ভৰোৱা বা পেকেটত ভৰোৱা খোৱাপানী আৰু মিনাৰেল পানীৰ নিৰ্মাতাসকলক এফএছএছএআইৰ অনুমোদিত তৃতীয় পক্ষৰ সংস্থাসমূহে বছৰি পৰীক্ষা কৰিব লাগে। পৰীক্ষাত উত্তীৰ্ণ হোৱাৰ পাছতহে অনুজ্ঞাপত্ৰ নবীকৰণ কৰা হ’ব।
ফলত গ্ৰাহকে নিৰাপদ খোৱাপানী লাভ কৰিব। খোৱাপানীৰ মান বজাই ৰখাৰ লক্ষ্যৰে এয়া এক সতৰ্কতামূলক ব্যৱস্থা বুলি এফএছএছএআইয়ে প্ৰকাশ কৰে।
ইয়াৰ পূৰ্বে খোৱাপানী নিৰ্মাতাসকলে দাবী কৰিছিল যে বিআইএছ আৰু এফএছএছএআইৰ পৰা প্ৰমাণপত্ৰ লাভ কৰিবলৈ বহু সময় আৰু খৰচৰ প্ৰয়োজন হৈছিল। প্ৰশাসনিক জটিলতাৰ বাবে ব্যৱসায়তো ক্ষতিগ্ৰস্ত হৈছিল। এফ এছ এছ এ আইৰ নতুন নিয়মে সেই দ্বৈত প্ৰমাণীকৰণ সমস্যাৰ পৰা মুক্তি পাব বুলি আশা কৰা হৈছে।
উচ্চ বিপদজনক খাদ্য তালিকাত কি আছে?
পেকেটত ভৰোৱা খোৱাপানীৰ উপৰিও এফ এছ এছ এ আইৰ উচ্চ বিপদজনক খাদ্যৰ তালিকাত আছে—
- গাখীৰ আৰু গাখীৰৰ পৰা তৈয়াৰী সামগ্ৰী
- মাংস আৰু মাংসজাতীয় সামগ্ৰী
- মাছ আৰু সাগৰীয় খাদ্য
- কণী আৰু কণীৰ সামগ্ৰী
ৰাজ্য আৰু কেন্দ্ৰীয় শাসিত অঞ্চলৰ খাদ্য আয়ুক্তসকলে নিয়মীয়া নিৰীক্ষণৰ জৰিয়তে এই পৰীক্ষাসমূহৰ অগ্ৰগতি নিৰীক্ষণ কৰিব বুলি সংস্থাটোৱে অধিসূচনাত প্ৰকাশ কৰিছে।
যিহেতু নতুন নিয়ম প্ৰৱৰ্তনৰ ফলত ব্যৱসায়ীসকলে নিজৰ সামগ্ৰীৰ মান উন্নত কৰিবলৈ বাধ্য হ’ব, সেয়েহে গ্ৰাহকসকলকো বিশুদ্ধ খোৱাপানীৰ নিশ্চয়তা প্ৰদান কৰা হ’ব।
