আজি কাহিলীপাৰা স্থিত ফৰেনচিক বিজ্ঞান সঞ্চালকৰ কাৰ্যালয়ত কাৰাৰুদ্ধ কৃষক নেতা অখিল গগৈ, ধৈৰ্য কোঁৱৰ আৰু বিতু সোনোৱালৰ ভয়চ চেম্পুল টেষ্ট কৰা হয়। গুৱাহাটী কেন্দ্ৰীয় কাৰাগাৰৰ পৰা ৰাষ্ট্ৰীয় তদন্তকাৰী সন্থা(NIA)ই কাৰাৰুদ্ধ নেতা তিনি গৰাকীক লৈ আহে কণ্ঠস্বৰ পৰীক্ষাৰ বাবে।
কণ্ঠস্বৰ পৰীক্ষা কৰি ওলাই অহাৰ মুহূৰ্তত কৃষক মুক্তি সংগ্রাম সমিতিৰ উপদেষ্টা অখিল গগৈয়ে সংবাদ মাধ্যমক কয়, “আমি মাতৃভূমিক ভাল পাওঁ, অসমক ভাল পাওঁ আৰু চৰকাৰক সমালোচনা কৰো আৰু কা’ৰ বিৰোধিতা কৰা বাবে আমাক এইদৰে শাস্তি দি থকা হৈছে।”
কণ্ঠস্বৰ পৰীক্ষাৰ বাবে আজি আহিছিলো বুলি উল্লেখ কৰি গগৈয়ে অসমবাসী ৰাইজক সুখে-শান্তিৰে থকাৰ আহ্বান জনায়। ৰাজ্য বাহিৰত থকা আমাৰ ৫-৬লাখ যুৱক-যুৱতীক ঘৰলৈ ঘূৰাই আনিবলৈ চৰকাৰক অনুৰোধ জনাই কৃষক নেতাগৰাকীয়ে ৷
আনহাতে কৃষক নেতা অখিল গগৈয়ে কয় – “মই যাতে বাহিৰলৈ ওলাব নোৱাৰো তাৰ বাবে ইটোৰ পিছত সিটোৰ গোচৰ লগাই থকা হৈছে। অসমবাসী ৰাইজক এই গোটেই কথা বিবেচনা কৰিবলৈ আহ্বান জনালো।”
আনহাতে ৰাইজৰ ভাল হওক বুলি কৈ অখিলে কয় “আমি বহুত কষ্টত আছো। মাতৃভূমি, মা আৰু ৰাইজক ভাল পোৱা বাবে কষ্ট খাই আছো।”
“অসমৰ দৰিদ্ৰ আৰু মধ্যবিত্ত পৰিয়ালক অহা ৬ মাহলৈ মাহে ৬ হাজাৰ টকা চৰকাৰে প্ৰদান কৰিব লাগে।” চৰকাৰৰ প্ৰতি আহ্বান কৃষক মুক্তি সংগ্রাম সমিতিৰ সাধাৰণ সম্পাদক ধৈৰ্য্য কোঁৱৰৰ।
“ৰাজ্যত কৰ’ণা বাবে ক্ষতিগ্ৰস্ত কৃষকক ক্ষতিপূৰণ দিয়াৰ লগতে মাইক্ৰফাইনেন্চ কোম্পানীৰ ঋণসমূহ তেওঁলোকক পৰিশোধ কৰি দিব লাগে।”-এই আহ্বান ছাত্ৰ মুক্তিৰ কেন্দ্ৰীয় সভাপতি নেতা বিতু সোনোৱালৰ৷
উল্লেখ কথা মাওবাদীৰে সম্পৰ্ক থকা গোচৰত অভিযুক্ত তিনি গৰাকীৰ কৃষক নেতাক কণ্ঠস্বৰ পৰীক্ষাৰ পিছত পুনৰ গুৱাহাটী কেন্দ্ৰীয় কাৰাগাৰলৈ লৈ যোৱা হয়।
