শনিবাৰে কেন্দ্ৰীয় বিত্ত মন্ত্ৰী নিৰ্মলা সীতাৰমনে সংসদত দাখিল কৰা কেন্দ্ৰীয় বাজেটত অসমৰ বাবে কিবা সুখৱৰ থাকিলনে?
আপাতত: তেনেকুৱা আনন্দিত হ’ব পৰা খৱৰ অসমৰ বাবে একো নাই।
এইবাৰ বাজেটত বিত্ত মন্ত্ৰীয়ে ঘোষণা কৰিছে যে ২০২০ ৰ ভিতৰতে অসমৰ ধুবুৰী-শদিয়া জলপথ কাৰ্যকৰী হৈ উঠিব।
সেয়ে হ’লে অসমৰ উজনিৰ পৰা নামনিলৈ কম খৰচী যাতায়ত ব্যৱস্থা সুচল হৈ পৰাৰ সম্ভাৱনা আছে।
কৃষি আৰু শিক্ষাক অগ্ৰাধিকাৰ দি উত্থাপন কৰা এইবাৰৰ কেন্দ্ৰীয় বাজেটত উত্তৰ-পূবৰ কৃষকৰ বাবে কিষান ৰেইলৰ কথাও কোৱা হৈছে।
আনহাতে, গুৰুত্বপূৰ্ণ কথাটো হ’ল পৰ্যটনৰ উন্নয়নৰ প্ৰতি লক্ষ্য ৰাখি কেন্দ্ৰীয় বাজেটত শিৱসাগৰকে ধৰি দেশৰ পাঁচটা প্ৰত্নতাত্ত্বিক স্থানক বিকশাই তোলাৰ প্ৰস্তাৱ ৰখা হৈছে।
উক্ত প্ৰত্নতাত্ত্বিক স্থানত মিউজিয়াম স্থাপন কৰা কৰা হ’ব। বাজেটত প্ৰস্তাৱ ৰখা পাঁটটা প্ৰত্নতাত্বিক স্থানৰ মাজত আছে হাৰিয়ানাৰ ৰাখী গাডী, উত্তৰ প্ৰদেশৰ হস্তিনাপুৰ, গুজৰাটৰ ঢোলাভিৰা, অসমৰ শিৱসাগৰ আৰু তামিলনাডুৰ আদিচানাল্লুৰ।
আনহাতে, ঝাৰখণ্ডৰ ৰাঁচীত এটা জনজাতীয় মিউজিয়াম স্থাপন কৰা হ’ব।
এই সকলোবোৰ কামৰ কাৰণে ২১’ বিত্তীয় বৰ্ষত সাংস্কৃতিক মন্ত্ৰালয়ৰ বাবে মুঠ ৩,১০০ কোটি টকা আছুতীয়াকৈ ৰখা হৈছে।
ইপিনে,, বিত্ত মন্ত্ৰীগৰাকীয়ে জিলা চিকিৎসালয় সমূহক চিকিৎসা মহাবিদ্যালয়লৈ উন্নীত কৰাৰ বাবেও চৰকাৰে পৰিকল্পনা গ্ৰহণ কৰাৰ কথা ঘোষণা কৰিছে।
সেয়ে হ’লে অসমৰ প্ৰায় প্ৰতিখন জিলাতে এখনকৈ চিকিৎসা মহাবিদ্যালয় স্থাপন হ’ব। অৱশ্যে, পূৰ্বৰ স্থাপন কৰা চিকিৎসা মহাবিদ্যালয়কেইখনৰ দৰে অৱস্থা হ’লে ই কিমান উপকৃত কৰিব সেইটো আন এক প্ৰশ্ন।
কেন্দ্ৰীয় বিত্ত মন্ত্ৰীয়ে বাজেটত কৰা কেইটামান উল্লেখযোগ্য ঘোষণা হ’ল-
*শিক্ষা খণ্ডলৈ ৯৯,৩০০ কোটি টকা
*অনলাইন স্নাতক স্তৰৰ পাঠ্যক্ৰমৰ প্ৰচাৰ
*১৫০ খন উচ্চ শিক্ষা কেন্দ্ৰত উদ্যমিতাৰ ডিগ্ৰীৰ ব্যৱস্থা
*ৰাষ্ট্ৰীয় ফৰেণছিক চায়েন্স বিশ্ববিদ্যালয় স্থাপন
*ৰাষ্ট্ৰীয় আৰক্ষী বিশ্ববিদ্যালয়ৰ প্ৰস্তাৱ
*নতুন অভিযন্তা সকললৈ ইণ্টাৰ্ণশ্বিপৰ সুবিধাৰ প্ৰস্তাৱ
*চিকিৎসকৰ অভাৱ হ্ৰাসৰ বাবে প্ৰতিখন জিলাত চিকিৎসা মহাবিদ্যালয় স্থাপন কৰাৰ প্ৰস্তাৱ।
*স্কিল ইণ্ডিয়াৰ বাবে ৩০০০ কোটি টকা ইত্যাদি।
