কংগ্ৰেছৰ পৰা অজন্তা নেওগক বহিস্কাৰৰ বাবেই যেন বাট চাই আছিল ৰাজ্যৰ দক্ষ তথা প্ৰতাপী মন্ত্ৰী ড০ হিমন্ত বিশ্ব শৰ্মাই।
চল চাই কঠিয়া পেলোৱা বুলি নাম থকা মন্ত্ৰী হিমন্ত বিশ্ব শৰ্মাই অজন্তা নেওগক কংগ্ৰেছৰ পৰা বহিস্কাৰ কৰাৰ পাছতে আৰম্ভ কৰিলে একপ্ৰকাৰৰ ৰাজনৈতিক টিপ্পনী।
জনতা ভৱনত সম্বোধন কৰা এক সংবাদমেলত তেওঁ কয় ‘আজিৰ তাৰিখলৈকে প্ৰাক্তন কংগ্ৰেছী মন্ত্ৰী অজন্তা নেওগৰ সৈতে বিজেপিৰ কোনো ৰাজনৈতিক আলোচনা অনুষ্ঠিত হোৱা নাছিল।‘
ইপিনে, অজন্তা নেওগে নিজ মুখৰে মুখ্যমন্ত্ৰী সৰ্বানন্দ সোণোৱালক সাক্ষাৎৰ কাৰণ জনোৱা নাছিল যদিও সেই দায়িত্ব আজি সুচাৰুৰূপে পালন কৰিলে মন্ত্ৰী হিমন্ত বিশ্ব শৰ্মাই।
তেওঁ সাক্ষাতৰ কাৰণ জনাই কয় ‘অৱশ্যে, তেওঁ সতী সাধিনী বিশ্ববিদ্যালয়খন গোলাঘাট সমষ্টিৰ কোনো এক স্থানত স্থাপন কৰিব লাগে বুলি মুখ্যমন্ত্ৰীক সৌজন্যমূলক সাক্ষাৎ কৰিছিল।
সেই সাক্ষাতৰ পাছতেই ইয়াক এটা ৰাজনৈতিক ৰূপ দিয়া হয়। মুখ্যমন্ত্ৰীক সাক্ষাৎ কৰোতে মই উপস্থিত আছিলো য’ত তেওঁ মুখ্যমন্ত্ৰীৰ সৈতে সতী সাধিনী বিশ্ববিদ্যালয় স্থাপন সন্দৰ্ভতে আলোচনা কৰিছিল।‘
‘আজি যিহেতু তেওঁক কংগ্ৰেছ দলে বহিস্কাৰ কৰিলে গতিকে পৰৱৰ্তী সময়ত ভাৰতীয় জনতা পাৰ্টীৰ সৈতে তেওঁৰ যোগাযোগ স্থাপন হোৱাটো নিশ্চিত।‘ হিমন্তই সংবাদমেলত এইদৰে কয়।
তেওঁ লগতে কয় ‘মন্ত্ৰীক সাক্ষাতৰ বাবে বিধায়কসকল আহিলে সাধাৰণতে এনেধৰণৰ কথা কোৱা নহয়। মোৰ ঘৰতে সাক্ষাতৰ বাবে বিধায়কসকল আহি থাকে।‘
ইপিনে, অজন্তা নেওগৰ সৈতে হোৱা সাক্ষাতক লৈ হোৱা বিতৰ্কক দুৰ্ভাগ্যজনক আখ্যা দিয়ে হিমন্তই।
তাৎপয্যপূৰ্ণভাৱে, কংগ্ৰেছে বহিস্কাৰ কৰাৰ পাছতে অজন্তা নেওগৰ প্ৰশংসাত পঞ্চমুখ হৈ পৰে মন্ত্ৰীগৰাকী।
তেওঁ কয় ‘অজন্তা নেওগ ৰাজ্যখনৰ এগৰাকী অতি প্ৰতিষ্ঠাশালী ৰাজনৈতিক নেত্ৰী। তেওঁৰ এখন স্পষ্ট জনদৰদী আৰু জনমুখী ছবি আছে।‘
তেওঁ যদি বিজেপিত যোগদানৰ বাবে আগ্ৰহ প্ৰকাশ কৰে তেন্তে নিশ্চয়কৈ ভাৰতীয় জনতা পাৰ্টীয়ে আদৰণি জনাব বুলি উল্লেখ কৰে।
ইপিনে, আওপকীয়াকৈ কাইলৈ অমিত শ্বাহৰ উপস্থিতিত প্ৰাক্তন কেন্দ্ৰীয় মন্ত্ৰীগৰাকীয়ে বিজেপিত যোগদান কৰিব বুলি স্বীকাৰ কৰে হিমন্তই।
তেওঁ ইংগিত দি কয় ‘অমিত শ্বাহৰ ভ্ৰমণকালত এনেধৰণৰ যোগদান কাৰ্য্যসূচী ৰখা হোৱা নাছিল। কিন্তু যিহেতু কংগ্ৰেছে তেওঁক বহিস্কাৰ কৰিছে তেন্তে নিশ্চয়কৈ যদি যোগদান কাৰ্য্যসূচী সংলগ্ন হয় সেয়া বিজেপিৰ দলীয় নেতৃত্বই জনাই দিব।
উল্লেখযোগ্য যে, কালি বিজেপি দলত অজন্তা নেওগৰ যোগদান সম্পর্কে প্ৰচাৰিত বাতৰি সন্দৰ্ভত আজিৰ ভিতৰত নিজৰ স্থিতি স্পষ্ট কৰিবলৈ প্ৰদেশ কংগ্ৰেছৰ তৰফৰ পৰা আহ্বান জনাইছিল।
কিন্তু সেই আহ্বানৰ প্ৰতি সহাৰি নজনোৱাত বা এই স্পষ্টীকৰণৰ উত্তৰ পদত্যাগৰে দিয়াত ক্ষুণ্ণ হৈ প্ৰদেশ কংগ্ৰেছৰ পৰা আজি বিয়লি ভাগত বহিস্কাৰ কৰে অজন্তা নেওগক।
প্ৰদেশ কংগ্ৰেছৰ সাধাৰণ সম্পাদকৰঞ্জন বৰাৰ স্বাক্ষৰ সম্বলিত এক জাননীৰ জৰিয়তে দলৰ পৰা বহিস্কাৰ কৰা হৈছে নেওগক।
ইপিনে, অজন্তা নেওগৰ পদত্যাগ পত্ৰ ৰিপুন বৰাই লাভ কৰিছে নেকি বুলি আমাৰ সাংবাদিকে ৰিপুন বৰাৰ ঘনিষ্ঠ প্ৰদেশ কংগ্ৰেছৰ নেতৃত্বক সোধাত তেওঁ বৰ্তমানলৈকে লাভ কৰা নাই বুলি কয়।
উল্লেখযোগ্য যে, যোৱা ১৭ ডিচেম্বৰত মুখ্যমন্ত্ৰী সৰ্বানন্দ সোণোৱালক চৰকাৰী বাসগৃহত সাক্ষাৎ কৰিবলৈ যোৱাৰ বাবে গোলাঘাট জিলা কংগ্ৰেছৰ সভাপতি পদৰ পৰা অপসাৰণ কৰিছিল অজন্তা নেওগক।
ইপিনে প্ৰদেশ কংগ্ৰেছৰ সভাপতি ৰিপুন বৰাৰ দাবী আছিল এনেধৰণৰ ‘অজন্তা নেওগক ভয়-ভাবুকি দেখুৱাইছে বিজেপিয়ে যাতে তেওঁ বিজেপিলৈ যায়। তেওঁক বিজেপিয়ে ব্লেক মেইলিঙ কৰিছে। যোৱা ৯ ডিচেম্বৰলৈকে কংগ্ৰেছৰ তত্বাবধায়কৰ সৈতে মই ঘৰলৈ যাওঁতে কোনো কাৰণতে বিজেপিত নাযায় বুলি স্পষ্ট কৰি দিছিল। বাহিৰৰ মানুহৰ পৰা শুনিছো বিজেপিৰ পৰা তেওঁৰ ওপৰত যথেষ্ট হেঁচা পৰিছে।’
